Körneki kollaj. Foto: aşıq derekköz

Bügin Qazmedia ortalığınıñ küzet böliminiñ qızmetkerleri Vlast basılımınıñ astanalıq byurosınıñ jetekşisi Tamara Vaal'di qorşap alıp, qolın qayırıp doq körsetken.

Vlast.kz internet-jurnalınıñ habarlauınşa, Qazmedia ortalığındağı Ortalıq kommunikaciyalar qızmetinde ötken kezekti brifingten soñ vice-prem'er Roman Sklyardan pikir almaq bolğan jurnalisti eki küzetşi jalma-jan wstap, qolın qayırğan.

«Men äriptestermen birge brifing bitken boyda Nwrlan Jwmaswltanovtiñ «Bek Air»-ğa resmi qatıstılığı jäne onıñ nelikten äuekompaniya atınan mälimdeme jasağanı jaylı Roman Sklyardıñ pikirin biluge tırıstıq. Degenmen policiya formasındağı jäne iskerlik ülgide kost'yum kigen eki küzetşi bizge böget jasadı. Kedergiden ötuge tırısqanım sol eken, olar birden şap berip wstadı da, qolımdı qayıra bastadı.

Bosap şığuğa ärekettenip jatqan kezimde, äriptesim sıtılıp ülgerip, ükimet bastığınıñ orınbasarın quıp jete bildi. Älgiler äriptesime qaray bergende men de qaşıp şıqtım», – deydi basılım jurnalisi.

Sonday-aq, redakciya Qazmedia ortalığı men Ortalıq kommunikaciyalar qızmetiniñ basşılığına tilşiniñ «qoğamdı mañızdı oqiğa turalı habardar etu» mindetin eske salıp, qajet dep tapqan swrağın spikerge tek resmi jiında ğana emes, kez kelgen jerde, sonıñ işinde Qazmedia ğimaratınıñ dälizinde de qoya alatının eskertti.

Sonımen qatar basılım Qazmedia ortalığınıñ qauipsizdik-küzet qızmeti jurnalistiñ käsibi mindetine fizikalıq türde kedergi keltiruin «jol beruge bolmaytın» ädis dep sanaydı. Jäne redakciya öz mälimdemesinde elimizdiñ mediahabı atanudı közdeytin ortalıq basşılığı jäbir körgen jurnalisten keşirim swrauın, äri küzet qızmetiniñ qoldanuğa bolatın amal-äreketiniñ nwsqaulığı turalı tolıq aqpar beruin talap etken.

Jalpı Qazaqstanda jurnalisterdiñ käsibi qızmetine qatıstı qısım jii jasaladı. Bıltır sayasi özgerister kezinde köptegen miting-jiındarda tilşilerdiñ tüsirilim-efir jwmısına ärtürli ädispen kedergi keltirgen. Kamera közin gazet qağazımen, qap-qara qolşatırmen kölegeyleu äreketi de köp kezdesti. Tipti jazda Azattıq, Almatı.tv jurnalisteri men operatorına jwrt auzında «işki sayasattıñ jansızdarı» delinetin «tetuşkalar» tobı tap berip, şabuıl jasağan edi. Qazir kamera-mikrafondı sındırıp, tilşige twra wmtılğan «memleketşil äyelderge» qatıstı qılmıstıq istiñ izi tügil, deregi de joq.

Mausımda bolğan prezidentti saylau oqiğasınan keyingi sankciyalanbağan şerulerdiñ birinde Tengrinews.kz tilşisin arnayı jasaq sözge kelmesten küş körsetip, soqqığa jıqqanı köptiñ esinde bolsa kerek.

Tağı bir «ilgek» mäsele, otandıq BAQ-tıñ «basqaşa oylatın» mamandarına qarsı QK-tiñ «jala jabu» jäne «qorlau» baptarın tañu tehnikası jii qoldanıladı. Küni keşe ğana äleumettik jelidegi jazbası üşin 27 ayğa sottalıp, naqaqtan naqaq tört ay türmede otırğan öñir (Türkistan oblısı, Sarıağaş audanı) jurnalisi Amangeldi Batırbekov halıqaralıq adam qwqıqtarı wyımdarınıñ qayta-qayta aralasuımen oblıstıq sot ükimimen aqtaldı. Sonday-aq, juırda tikeley efirde sarapşınıñ siltemeli sözine bola sotqa şaqırılğan qoğam belsendisi, jurnalist Säule Äbildahanqızınıñ üstinen arızdanğan belgili käsipker Arman Şoraevtıñ 10 million teñge ötemaqı turalı talabı qarausız qalğan bolatın.

RSF halıqaralıq wyımınıñ reytingisinde Qazaqstan söz bostandığı  boyınşa 180 eldiñ işinde 158-orında twr. Sonday-aq «Ädil söz» söz bostandığın qorğaudıñ halıqaralıq qorınıñ esebinşe, «Jurnalisterdiñ zañdı käsibi qızmetine kedergi jasau» reestrinde HHİ ğasır bastalğalı beri, 2000 jıldıñ qañtarı-2019 jıldıñ qırküyegi aralığında tilşiler jwmısına 839 kedergi keltiru faktisi tirkelgen.

"The Qazaq Times"