«جالا جاپتى ءارى قورلادى» دەگەن ايىپپەن  27 ايعا سوتتالعان بەلگىلى ايماق ءجۋرناليسى امانگەلدى باتىربەكوۆ اقتالدى.

ازاتتىق تاراتقان اقپارات بويىنشا،  حالىقارالىق دەڭگەيدە ءجيى كوتەرىلگەن باتىربەكوۆتىڭ «ناقاق قامالۋ» ماسەلەسىن  تۇركىستان وبلىستىق سوتى 13 قاراشادان بەرى اپەللياتسيالىق شاعىم رەتىندە قاراپ،  بۇگىن ونى اقتاپ شىققان.

سۋديا تاۋباي قادىرباەۆ ۇكىم سوڭىندا «باتىربەكوۆ سوت زالىنان بوساتىلسىن» دەدى.

بىلتىر كۇزدە (23 قىركۇيەك) سارىاعاش اۋداندىق سوتى كەلەس اۋداندىق ءبىلىم ءبولىمىنىڭ باسشىسى باحتيار ابديەۆتىڭ تۇسىرگەن ارىزىمەن اۋداندىق «سارىاعاش ينفو» گازەتىنىڭ رەداكتورى، ازاماتتىق قوعام بەلسەندىسى، ءجۋرناليستى قىلمىستىق كودەكستىڭ «جالا جابۋ» (130-باپ) جانە «قورلاۋ» (131-باپ) باپتارى بويىنشا كىنالى دەپ تانىپ، ەكى جىلدان كوپ مەرزىمگە باس بوستاندىعىنان ايىرعان ەدى.

كەلەس اۋداندىق ءبىلىم ءبولىمىنىڭ باسشىسى باحتيار ابديەۆ پەن "زاڭعار مەدەت" قوعامدىق بىرلەستىگىنىڭ باستىعى ءلايلا دارحانباەۆا باتىربەكوۆتىڭ ۇستىنەن «الەۋمەتتىك جەلىدە پىكىر جازعانى ءۇشىن» سوتقا بەرگەن.

بۇعان دەيىن كوپتەگەن حالىقارالىق ۇيىمدار مەن قۇقىق قورعاۋشىلار جوعارعى ينستانتسيالاردان قاماۋدا وتىرعان جۋرناليست باتىربەكوۆتى بوساتۋدى سۇراعان. ناقتىراق ايتقاندا، قازان ايىنىڭ  سوڭىندا بۇرىن حالىقارالىق «شەكاراسىز تىلشىلەر» (Reporters sans frontières/RSF) جانە «جۋرناليستەردى قورعاۋ كوميتەتى» (Committee to Protect Journalists/CPJ) ۇيىمدارى قازاقستان بيلىگىن ايماقتاعى بەلگىلى جۋرناليست امانگەلدى باتىربەكوۆتى دەرەۋ بوساتۋعا، ءسوز بوستاندىعىن شەكتەمەۋگە شاقىردى.

«جۋرناليستەردى قورعاۋ كوميتەتى» (CPJ) ۇيىمى «جالا جابۋ جانە قورلاۋ تۋرالى قىلمىستىق زاڭدارىن زايىرلىلىققا ءتان قۇندىلىقتارمەن جەتىلدىرۋ كەرەك، مۇنداي ماسەلەلەر ازاماتتىق ىستەر قاتارىندا قارالۋى ءتيىس» دەگەن بولاتىن.

RSF حالىقارالىق ۇيىمىنىڭ رەيتينگىسىندە قازاقستان ءسوز بوستاندىعى  بويىنشا 180 ەلدىڭ ىشىندە 158-ورىندا تۇر. سونداي-اق «ءادىل ءسوز» ءسوز بوستاندىعىن قورعاۋدىڭ حالىقارالىق قورىنىڭ ەسەبىنشە، «جۋرناليستەردىڭ زاڭدى كاسىبي قىزمەتىنە كەدەرگى جاساۋ» رەەسترىندە ءححى عاسىر باستالعالى بەرى، 2000 جىلدىڭ قاڭتارى-2019 جىلدىڭ قىركۇيەگى ارالىعىندا تىلشىلەر جۇمىسىنا 839 كەدەرگى كەلتىرۋ فاكتىسى تىركەلگەن.

"The Qazaq Times"