Körneki kollaj. Foto: aşıq derekközderden

Qıtay şekarasın zañsız kesip ötken eki etnikalıq qazaq – Qaster Mwsahanwlı men Mwrager Älimwlı Qıtayğa qaytarıladı.

WQK törağasınıñ orınbasarı, Şekara qızmetiniñ direktorı Darhan Dilmanov mälimdeuinşe, sot isi ayaqtalğannan keyin şekaranı zañsız bwzıp ötken eki etnikalıq qazaq Qıtayğa qaytarıladı.

«Ratifikaciyalanğan qwjat märtebesi bar qoldanıstağı kelisim boyınşa sot pen barlıq qılmıstıq jauapkerşilikter ayaqtalğannan keyin biz bwl azamattardı sol elge qaytaramız. Biz olardı Qıtay Halıq Respublikasına şekara ökilderiniñ qızmeti arqılı auıstıramız. Aldağı uaqıtta osığan baylanıstı körşi memleket tarapınan tiisti jauap boladı. Sondıqtan olar osında bolsa da bostandıqqa şığuğa mümkindikteri joq», – dedi Dilmanov.

Vedomstvo ökiliniñ sözine sensek, «qıtaydan qaşıp kelgen» qos qazaq «ŞQO policiya departamentiniñ tergeu izolyatorında otır». Qazir tergeu jwmıstarı ayaqtalğan.

14 qazanda Almatıdağı adam qwqığın qorğau byurosında ötken baspasöz mäslihatında Qaster Mwsahanwlı Şıñjañdağı «sayasi lager'de qamauda bolğanın», Mwrager Älimwlı Qıtayda «qısım körgenin» mälimdegen. Osıdan keyin WQK ekeuin «şekaranı zañsız kesip ötti» degen ayıppen wstap, erteñinde Şığıs Qazaqstan oblısına alıp ketken.

Qazan ayınıñ 30-ı küni WQK Şekara qızmetiniñ direktorı Darhan Dilmanov şekaranı zañsız bwzıp ötu faktisi boyınşa qılmıstıq is qozğalıp, tergeu jürip jatqanın jäne birqatar lauazımdı twlğalar tärtiptik jauapkerşilikke tartılğandığın habarlağan.

Eki jigittiñ advokatı Läzzat Ahatova Qazaqstan biligi oñ şeşim tappağan jağdayda 10-15 şaqtı el olarğa «pana boluı mümkin» ekendigin, ol üşin arnayı kelissözder jürip jatqanın mälimdegen edi. Sonday-aq qaraşanıñ basında Qazaqstandağı AQŞ konsuldığı «el ükimetin halıqaralıq konvenciyada bekitilgen keri qaytarmau qağidasın saqtauğa şaqırıp», «pana izdegen eşbir adam belgisiz tağdır kütip twrğan elge mäjbürli türde keri jiberilmeui tiis» degen.

"The Qazaq Times"