Foto: aşıq derekköz

Qıtaydıñ Şıñjañdağı sayasi qısımınan Qazaqstanğa qaşıp ötken Qaster Mwsahanwlı men Mwrager Älimwlına bosqın märtebesi berildi.

Ötken jwmada, 16 qazan küni Aqmola oblısı policiya departamenti Köşi-qon janınan qwrılğan komissiya qos azamatqa bir jılğa bosqın märtebesin beru turalı şeşim qabıldadı.

Mwsahanwlı men Älimwlınıñ advokatı Baqbergenov Abdulla bosqın märtebesi bir jıldan keyin wzartıluı tiis deydi. Advokattıñ sözinşe, qazir olar azamattığı joq twlğa märtebesin alu qajet. YAğni eşqanday elge Qazaqstanğa da, Qıtayğa da qatısı joq. Azamattığı joq twlğa märtebesin alğan kezde, olar 5 jıl işinde şetelden kelgen etnikalıq qazaqtar retinde Qazaqstan Respublikasınıñ azamattığın beru turalı ötiniş bere aladı.

Ayta keteyik, bıltır qazanda Qıtay qısımınan, Şıñjañdağı sayasi lager'ge qamaludan qorıqqandıqtan qaşıp kelgenderin aytqan Qaster Mwsahanwlı men Mwrager Älimwlı şekaranı zañsız kesip ötip Qazaqstannan sayasi baspana swrağan edi. 2019 jılı qazanda Şığıs Qazaqstan oblısı Zaysan audandıq sotı olardı «memlekettik şekaranı zañsız bwzıp ötti» degen ayıppen 1 jılğa bas bostandığınan ayırğan.

"The Qazaq Times"