كورنەكى كوللاج. فوتو: اشىق دەرەككوزدەردەن

قىتاي شەكاراسىن زاڭسىز كەسىپ وتكەن ەكى ەتنيكالىق قازاق – قاستەر مۇساحانۇلى مەن مۇراگەر ءالىمۇلى قىتايعا قايتارىلادى.

ۇقك توراعاسىنىڭ ورىنباسارى، شەكارا قىزمەتىنىڭ ديرەكتورى دارحان ءدىلمانوۆ مالىمدەۋىنشە، سوت ءىسى اياقتالعاننان كەيىن شەكارانى زاڭسىز بۇزىپ وتكەن ەكى ەتنيكالىق قازاق قىتايعا قايتارىلادى.

«راتيفيكاتسيالانعان قۇجات مارتەبەسى بار قولدانىستاعى كەلىسىم بويىنشا سوت پەن بارلىق قىلمىستىق جاۋاپكەرشىلىكتەر اياقتالعاننان كەيىن ءبىز بۇل ازاماتتاردى سول ەلگە قايتارامىز. ءبىز ولاردى قىتاي حالىق رەسپۋبليكاسىنا شەكارا وكىلدەرىنىڭ قىزمەتى ارقىلى اۋىستىرامىز. الداعى ۋاقىتتا وسىعان بايلانىستى كورشى مەملەكەت تاراپىنان ءتيىستى جاۋاپ بولادى. سوندىقتان ولار وسىندا بولسا دا بوستاندىققا شىعۋعا مۇمكىندىكتەرى جوق»، – دەدى ءدىلمانوۆ.

ۆەدومستۆو وكىلىنىڭ سوزىنە سەنسەك، «قىتايدان قاشىپ كەلگەن» قوس قازاق «شقو پوليتسيا دەپارتامەنتىنىڭ تەرگەۋ يزولياتورىندا وتىر». قازىر تەرگەۋ جۇمىستارى اياقتالعان.

14 قازاندا الماتىداعى ادام قۇقىعىن قورعاۋ بيۋروسىندا وتكەن ءباسپاسوز ءماسليحاتىندا قاستەر مۇساحانۇلى شىڭجاڭداعى «ساياسي لاگەردە قاماۋدا بولعانىن»، مۇراگەر ءالىمۇلى قىتايدا «قىسىم كورگەنىن» مالىمدەگەن. وسىدان كەيىن ۇقك ەكەۋىن «شەكارانى زاڭسىز كەسىپ ءوتتى» دەگەن ايىپپەن ۇستاپ، ەرتەڭىندە شىعىس قازاقستان وبلىسىنا الىپ كەتكەن.

قازان ايىنىڭ 30-ى كۇنى ۇقك شەكارا قىزمەتىنىڭ ديرەكتورى دارحان ءدىلمانوۆ شەكارانى زاڭسىز بۇزىپ ءوتۋ فاكتىسى بويىنشا قىلمىستىق ءىس قوزعالىپ، تەرگەۋ ءجۇرىپ جاتقانىن جانە بىرقاتار لاۋازىمدى تۇلعالار تارتىپتىك جاۋاپكەرشىلىككە تارتىلعاندىعىن حابارلاعان.

ەكى جىگىتتىڭ ادۆوكاتى ءلاززات احاتوۆا قازاقستان بيلىگى وڭ شەشىم تاپپاعان جاعدايدا 10-15 شاقتى ەل ولارعا «پانا بولۋى مۇمكىن» ەكەندىگىن، ول ءۇشىن ارنايى كەلىسسوزدەر ءجۇرىپ جاتقانىن مالىمدەگەن ەدى. سونداي-اق قاراشانىڭ باسىندا قازاقستانداعى اقش كونسۋلدىعى «ەل ۇكىمەتىن حالىقارالىق كونۆەنتسيادا بەكىتىلگەن كەرى قايتارماۋ قاعيداسىن ساقتاۋعا شاقىرىپ»، «پانا ىزدەگەن ەشبىر ادام بەلگىسىز تاعدىر كۇتىپ تۇرعان ەلگە ءماجبۇرلى تۇردە كەرى جىبەرىلمەۋى ءتيىس» دەگەن.

"The Qazaq Times"