Nwrswltan Nazarbaev Nwr Otan partiyası oblıstıq filialdarınıñ ökilderimen saylauğa dayındıq jiınında. 25 qaraşa 2019 jıl. Foto: elbasy.kz

2020 jıldıñ aqpanında Nwr Otan partiyasınıñ s'ezin ötkizbek. Nazarbaev partiya qwramına qabıldaudıñ jaña talaptarın engizdi.

Keşe eks-prezident N.Nazarbaevtıñ törağalıq etuimen «biliktik partiyanıñ» (Nwr Otan) aumaqtıq filaldarı ökilderiniñ basqosuı ötip, oğan ükimet basşısı Asqar Mamin men partiya jetekşileriniñ biri Bauırjan Baybek qatısqan.

Nwrswltan Nazarbaev Nwr Otan partiyası aumaqtıq ökilderimen basqosuda. 25 qaraşa 2019 jıl. Foto: elbasy.kz

Baybek bastağan bir top bayandamaşılardıñ sözinen keyin Nazarbaev:

– Nwr Otan bizdiñ qoğamımızdıñ aluan türliligin körsetedi. Biz – el bolaşağına jauaptı bükil Qazaqstan halqınıñ partiyasımız, naqtı ister partiyasımız.  Bizde Qazaqstannıñ damuına qatıstı naqtı wstanım bar, tiisti strategiya men jwmıs josparları bekitildi, qajetti resurstar qarastırılğan, – dedi.

Partiya kösemimen şüyirkelesip twrğan deputat Bekbolat Tileuhan. 25 qaraşa 2019 jıl. Foto: elbasy.kz

Täuelsiz sarapşı-sayasatkerler men azamattıq qoğam jağı «kommunistik partiya mwrageri» retinde jii sınaytın «Nwr Otan» köşiniñ keruenbası Qazaqstannıñ täuelsizdik jıldarındağı tabıstarın tizip, «eldiñ barlıq jetistikteri partiyamen jäne partiya müşeleriniñ kündelikti jwmısımen tığız baylanıstı» ekenin ayttı.

Qauipsizdik keñesiniñ ömir boyğı törağası Nazarbaev partiyanıñ parlamenttik saylauğa arnalğan saylaualdı bağdarlamasın äzirleudi tapsırdı. El işinde «Kitaphana» atalıp ketken eks-prezident keñsesiniñ baspasöz qızmeti jariyalağan aqpar boyınşa, Nazarbaev 2020 jılı öñirlerdi damıtudıñ bes jıldıq bağdarlaması ayaqtalatının eske salıp:

– Jaña bağdarlamalardı qabıldau qajettiligi jaña elektoraldıq kezeñge twspa-tws kelip otır. Sondıqtan bwl bağdarlamalar är öñir boyınşa mäslihat saylauında partiyanıñ saylaualdı bağdarlamasınıñ negizine aynaluğa tiis, – degen.

Halıqtıq partiyanıñ köseminiñ sözinşe, «mäjilis saylauına arnalğan saylaualdı bağdarlamasın sayasi keñes byurosınıñ müşesi retinde prem'er-ministr basqarıp, äzirleuge qazirden bastap kirisui kerek».

Nazarbaev är öñir, qala jäne audan boyınşa saylaualdı bağdarlama dayındığına qamdanudı tapsırdı. Sonımen qosa partiyaişilik irikteu sayasatına nwsqau berdi:

– Är mäslihattıñ saylaualdı partiyalıq tizimine keminde 30% äyelder jäne 20% (35 jasqa deyingi) jastar kirui tiis. Sonday-aq tizimge halıqtıñ türli sanatınıñ ökilderi, atamekenimizge oralğan otandastar, mümkindigi şekteuli jandar, käsipkerler men BAQ ökilderi engen jön, – dep.

Bwdan bılay «nwrlı partiya» basşısınıñ pärmenimen jergilikti ökildikter «jwmısın küşeytu» kerek.

Eks-prezident Nazarbaev partiya müşelerimen mäz-meyram suretke tüsip twr. 25 qaraşa 2019 jıl. Foto: elbasy.kz

Söz soñında Nazarbaev aldağı jılı aqpanda partiyanıñ ruspublikalıq kölemdegi auqımdı s'ezi ötetinin mälimdedi.

– Onda biz jandandıru josparınıñ aldın ala qorıtındısın şığarıp, aldağı elektoraldıq mindetterdi jan-jaqtı talqılaymız. Qazir «Jas Otan» memlekettik organdarmen birlesip, 2025 jılğa deyingi «Jastar – Otanğa» jaña bağdarlamasın äzirlep jatır. Onda qazirgi jastardıñ barlıq swranısına jauap tabuğa boladı. Säuirde jaña bağdarlamanı «Jas Otan» s'ezine engizu qajet, – dedi ol.

Replika)) Otız jılğa juıq bilikte bolğan Nazarbaevtıñ «jeñiske jetu üşin barlıq resurstardı jwmıldıruımız kerek» degenin sarapşılar özge partiyalardıñ «jolın kesip, tınısın tarıltu» dep sanaydı. Tipti täuelsiz sayasattanuşı Dosım Sätpaev eks-prezident jii aytatın «bilik tranzitiniñ sätti ötkenin» joqqa şığaradı. Azamattıq qoğam belsendileri «kezekten tıs sayasi aktilerge» äuestengen bilikti «bwqara pikirimen sanaspaytınına» narazı. Elde jürip jatqan «köpqırtıstı sayasi jük jiyu» procesteri eldi eleñdetip, şınına közi jetpey esi şığuda. Qaytken künde de aqpan-toqpan arası ne erte köktemde parlamenttik saylau boları anıq is tärizdi. Basqası aldağı uaqıt enşisinde.

"The Qazaq Times"