2020 جىلدىڭ اقپانىندا نۇر وتان پارتياسىنىڭ سەزىن وتكىزبەك. نازارباەۆ پارتيا قۇرامىنا قابىلداۋدىڭ جاڭا تالاپتارىن ەنگىزدى.

كەشە ەكس-پرەزيدەنت ن.نازارباەۆتىڭ توراعالىق ەتۋىمەن «بيلىكتىك پارتيانىڭ» (نۇر وتان) اۋماقتىق فيلالدارى وكىلدەرىنىڭ باسقوسۋى ءوتىپ, وعان ۇكىمەت باسشىسى اسقار مامين مەن پارتيا جەتەكشىلەرىنىڭ ءبىرى باۋىرجان بايبەك قاتىسقان.

نۇرسۇلتان نازارباەۆ نۇر وتان پارتياسى اۋماقتىق وكىلدەرىمەن باسقوسۋدا. 25 قاراشا 2019 جىل. فوتو: elbasy.kz

بايبەك باستاعان ءبىر توپ بايانداماشىلاردىڭ سوزىنەن كەيىن نازارباەۆ:

– نۇر وتان ءبىزدىڭ قوعامىمىزدىڭ الۋان تۇرلىلىگىن كورسەتەدى. ءبىز – ەل بولاشاعىنا جاۋاپتى بۇكىل قازاقستان حالقىنىڭ پارتياسىمىز، ناقتى ىستەر پارتياسىمىز.  بىزدە قازاقستاننىڭ دامۋىنا قاتىستى ناقتى ۇستانىم بار، ءتيىستى ستراتەگيا مەن جۇمىس جوسپارلارى بەكىتىلدى، قاجەتتى رەسۋرستار قاراستىرىلعان، – دەدى.

پارتيا كوسەمىمەن شۇيىركەلەسىپ تۇرعان دەپۋتات بەكبولات تىلەۋحان. 25 قاراشا 2019 جىل. فوتو: elbasy.kz

تاۋەلسىز ساراپشى-ساياساتكەرلەر مەن ازاماتتىق قوعام جاعى «كوممۋنيستىك پارتيا مۇراگەرى» رەتىندە ءجيى سىنايتىن «نۇر وتان» كوشىنىڭ كەرۋەنباسى قازاقستاننىڭ تاۋەلسىزدىك جىلدارىنداعى تابىستارىن ءتىزىپ، «ەلدىڭ بارلىق جەتىستىكتەرى پارتيامەن جانە پارتيا مۇشەلەرىنىڭ كۇندەلىكتى جۇمىسىمەن تىعىز بايلانىستى» ەكەنىن ايتتى.

قاۋىپسىزدىك كەڭەسىنىڭ ءومىر بويعى توراعاسى نازارباەۆ پارتيانىڭ پارلامەنتتىك سايلاۋعا ارنالعان سايلاۋالدى باعدارلاماسىن ازىرلەۋدى تاپسىردى. ەل ىشىندە «كىتاپحانا» اتالىپ كەتكەن ەكس-پرەزيدەنت كەڭسەسىنىڭ ءباسپاسوز قىزمەتى جاريالاعان اقپار بويىنشا، نازارباەۆ 2020 جىلى وڭىرلەردى دامىتۋدىڭ بەس جىلدىق باعدارلاماسى اياقتالاتىنىن ەسكە سالىپ:

– جاڭا باعدارلامالاردى قابىلداۋ قاجەتتىلىگى جاڭا ەلەكتورالدىق كەزەڭگە تۇسپا-تۇس كەلىپ وتىر. سوندىقتان بۇل باعدارلامالار ءار ءوڭىر بويىنشا ءماسليحات سايلاۋىندا پارتيانىڭ سايلاۋالدى باعدارلاماسىنىڭ نەگىزىنە اينالۋعا ءتيىس، – دەگەن.

حالىقتىق پارتيانىڭ كوسەمىنىڭ سوزىنشە، «ءماجىلىس سايلاۋىنا ارنالعان سايلاۋالدى باعدارلاماسىن ساياسي كەڭەس بيۋروسىنىڭ مۇشەسى رەتىندە پرەمەر-مينيستر باسقارىپ، ازىرلەۋگە قازىردەن باستاپ كىرىسۋى كەرەك».

نازارباەۆ ءار ءوڭىر، قالا جانە اۋدان بويىنشا سايلاۋالدى باعدارلاما دايىندىعىنا قامدانۋدى تاپسىردى. سونىمەن قوسا پارتياىشىلىك ىرىكتەۋ ساياساتىنا نۇسقاۋ بەردى:

– ءار ءماسليحاتتىڭ سايلاۋالدى پارتيالىق تىزىمىنە كەمىندە 30% ايەلدەر جانە 20% (35 جاسقا دەيىنگى) جاستار كىرۋى ءتيىس. سونداي-اق تىزىمگە حالىقتىڭ ءتۇرلى ساناتىنىڭ وكىلدەرى، اتامەكەنىمىزگە ورالعان وتانداستار، مۇمكىندىگى شەكتەۋلى جاندار، كاسىپكەرلەر مەن باق وكىلدەرى ەنگەن ءجون، – دەپ.

بۇدان بىلاي «نۇرلى پارتيا» باسشىسىنىڭ پارمەنىمەن جەرگىلىكتى وكىلدىكتەر «جۇمىسىن كۇشەيتۋ» كەرەك.

ەكس-پرەزيدەنت نازارباەۆ پارتيا مۇشەلەرىمەن ءماز-مەيرام سۋرەتكە ءتۇسىپ تۇر. 25 قاراشا 2019 جىل. فوتو: elbasy.kz

ءسوز سوڭىندا نازارباەۆ الداعى جىلى اقپاندا پارتيانىڭ رۋسپۋبليكالىق كولەمدەگى اۋقىمدى سەزى وتەتىنىن مالىمدەدى.

– وندا ءبىز جانداندىرۋ جوسپارىنىڭ الدىن الا قورىتىندىسىن شىعارىپ، الداعى ەلەكتورالدىق مىندەتتەردى جان-جاقتى تالقىلايمىز. قازىر «Jas Otan» مەملەكەتتىك ورگاندارمەن بىرلەسىپ، 2025 جىلعا دەيىنگى «جاستار – وتانعا» جاڭا باعدارلاماسىن ازىرلەپ جاتىر. وندا قازىرگى جاستاردىڭ بارلىق سۇرانىسىنا جاۋاپ تابۋعا بولادى. ساۋىردە جاڭا باعدارلامانى «Jas Otan» سەزىنە ەنگىزۋ قاجەت، – دەدى ول.

رەپليكا)) وتىز جىلعا جۋىق بيلىكتە بولعان نازارباەۆتىڭ «جەڭىسكە جەتۋ ءۇشىن بارلىق رەسۋرستاردى جۇمىلدىرۋىمىز كەرەك» دەگەنىن ساراپشىلار وزگە پارتيالاردىڭ «جولىن كەسىپ، تىنىسىن تارىلتۋ» دەپ سانايدى. ءتىپتى تاۋەلسىز ساياساتتانۋشى دوسىم ساتپاەۆ ەكس-پرەزيدەنت ءجيى ايتاتىن «بيلىك ءترانزيتىنىڭ ءساتتى وتكەنىن» جوققا شىعارادى. ازاماتتىق قوعام بەلسەندىلەرى «كەزەكتەن تىس ساياسي اكتىلەرگە» اۋەستەنگەن بيلىكتى «بۇقارا پىكىرىمەن ساناسپايتىنىنا» نارازى. ەلدە ءجۇرىپ جاتقان «كوپقىرتىستى ساياسي جۇك جيۋ» پروتسەستەرى ەلدى ەلەڭدەتىپ، شىنىنا كوزى جەتپەي ەسى شىعۋدا. قايتكەن كۇندە دە اقپان-توقپان اراسى نە ەرتە كوكتەمدە پارلامەنتتىك سايلاۋ بولارى انىق ءىس ءتارىزدى. باسقاسى الداعى ۋاقىت ەنشىسىندە.

"The Qazaq Times"