Mäjilis saylauınıñ dauıstarın saylau kezi. Foto: QHA

Qala äkiminiñ baspasöz qızmeti Almatı mäslihatına Nur Otan partiyasınan saylanğan deputattardıñ tizimi bekitilgenin habarladı. Nätijesinde 37 orınnıñ 29-ı (bıltır 35 mandat alğan – QT) bilik partiyasına bwyırğan. 

29 deputattıñ tizimi Aumaqtıq saylau komissiyasına jiberilgen. Onıñ 19-ı aldıñğı şaqırılımda bolmağan, 10-ı qayta deputat atanğan.

Nur Otan partiyası Almatı mäslihatına wsınğan kandidattardıñ arasında belgili şahmatşı-grossmeyster Jansaya Äbdilmälik, oqu orındarınıñ basşılarınan Arman Jüdebaev, Güljan Bekenova men Rayhan Bölekbaeva, Forbes jurnalınıñ Qazaqstan, Özbekstan jäne Gruziyadağı franşizasınıñ iesi Armanjan Baytasov, saylau küngi mitingte azamattıq belsendilerge küş körsetken tanımal Olimpiada çempionı, Bokstan olimpiadağa dayarlau ortalığınıñ direktorı Ermahan Ibraimov pen sol küni bilikti jaqtap alañğa kelgen «Almatı aqşamı» gazetiniñ bas redaktorı  Qali Särsenbay, şeru-mitingterde ünemi kontr-sipker bolıp jüretin, Nwr Otannıñ qalalıq filalı basşısınıñ orınbasarı Stanislav Kankurov, bilikşil käsipker Qayrat Qwdaybergen t.b. biznes ökilderi, därigerler bar.

Partiyanıñ qalalıq filialınıñ törağası, Almatı qalasınıñ äkimi Baqıtjan Sağıntaevtıñ aytuınşa, jaña frakciyanıñ aldında «Almatı-2050» strategiyası negizinde äzirlengen saylaualdı bağdarlama men saylauşılardıñ amanattarınıñ orındaluın jüyeli türde qadağalau mindeti twr. Wsınılğan tizimde äyelderdiñ ülesi 31%, jastardıñ ülesi – 24% eken. Deputattardıñ ortaşa jası – 43 jas körinedi.

10 qañtarda ötken mäjilis jäne mäslihattar saylauında arnayı jasaq alañğa narazılıq bildiruge kelgen Dempartiya bastamaşıl tobı men Oyan, Qazaqstan azamattıq qozğalısın on sağatqa deyin qorşauda wstağan. Bwl halıqaralıq adam qwqıqtarı jönindegi wyımdar men EQIW tarapınan ötkir sınğa wşıradı. Saylau küngi ayazda sağattap twruğa mäjbür bolğan azamattıq qoğam belsendilerine qarsı ärtürli arandatu äreketteri orın aldı. Ermahan Ibraimov belsendiniñ birine jwlqıp, qolındağı plakatın jırtıp tastağan. Sonımen qosa, belsendilerdiñ sözin teristep, bilik sayasatın ügittep baqqandar qatarında jüzi tanıs, biraq atı-jönin aytqısı kelmeytin «ädettegi aytqıştar» men Abay atındağı QazWPU rektorı Tahir Balıqbaev, Twran universitetiniñ basşısı Rahman Alşanov, «Almatı aqşamı» gazetiniñ bas redaktorı  Qali Särsenbay t.b. boldı. Odan özge elge tanımal aqın-jazuşılar Esenğali Rauşanov, Maraltay Rayımbek, Baqıt Bedelhanov ta töbe körsetti, degenmen eşqanday pikir bildirgen joq.

Saylaudı jiti baqılağan «Täuelsiz baqılauşılar» wyımı särsenbi resmi nwsqadan  ayırmaşılığı edäuir köp balama esebin jariyaladı. OSK Almatı qalası respublika boyınşa eñ az körsetkişpen saylauşılardıñ nebäri 30,3%-ı saylauğa qatıstı dese, wyım bwl körsetkiş 15,3% boldı deydi. Sonday-aq, OSK / «Täuelsiz baqılauşılar» wyımınıñ deregin salıstırsaq, saylauğa barğan almatılıqtardıñ 55,54 / 45,8%-ı Nur Otan, 15,21 / 20,8%-ı «Aq jol», 13,49 / 10%-ı QHP, 9,9 / 9,5%-ı Auıl, 5,86 / 13,9%-ı Adal partiyalarına dauıs bergen.

"The Qazaq Times"