Körneki suret. Joğarı sot törağası Jaqıp Asanov pen Äbişev isin qarap jatqan sud'ya Qajımwhan Mekemtas. Foto: aşıq derekközden

Bir top qoğam belsendisi Äbişev isin qarap jatqan sud'ya Qajımwqan Mekemtastıñ BAQ ökilderiniñ sot procesin audio-beynejazbağa taspalauına tıyım salğan qaulısına baylanıstı Joğarı sot törağası Jaqıp Asanovqa aşıq hat jariyaladı.

Qoğam belsendileri men belgili jurnalister Säule Äbedinova, Qazıbek Isa, Ömirzaq Aqjigit, Zäure Mwsahodjaeva, Nwrbek Qoylıbay, Ashat Bersalimov, Nwrbolat Adırbek t.b. wyımdasıp, Joğarı sot törağası  Jaqıp Asanovqa Äbişev isine qatıstı ötiniş joldadı. Sot jüyesin izgilendirudi, sud'yalardan ädil şeşim şığarudı talap etip, BAQ aldında «küresker» imidjimen tanılğan Asanovtıñ Äbişev isin qarap jatqan sud'ya Qajımwqan Mekemtasqa qanday şara qoldanatını äzirge belgisiz. Bwğan deyin «para aluğa ıñğay tanıttı» degen ayıppen belgili şeneunik Islam Äbişev küdikke ilinip, tergeu amaldarı ayaqtalıp, is sotqa joldanğan. El işinde «köp seriyalı küzgi komediya» atanğan iske qatıstı qwqıq qorğauşılar Äbişevtiñ «bölingen qarajattı ülken oyınşılarmen bölispey, byudjetke keri qaytarğanı» üşin «arnayı tapsırıs berilgen scenraiy» boyınşa ayıptap jatqanın aytadı. Äbişev sotına törelik etip jatqan sud'yanıñ advokat Abzal Qwspan «prokurordan da ötken ayıptauşı» ekenin mälimdegen bolatın. Är sot otırısın tikeley efirden üzbey qaraytın azamattıq qoğam ökilderi sud'ya Qajımwqan Mekemtastıñ sot otırısında özin wstauı men memlekettik tildi jetik meñgergenine kümänmen qaraydı. Bwğan sebep sud'ya Mekemtas oqığan eki bet qaulıda 70-ke tarta qate tabılğan. Mwnı Äbişevtiñ advokattarı men qorğauşıları tekserip anıqtağan.

Keşe sud'ya Mekemtas Äbişev isi boyınşa osı künge deyin eş şekteusiz aşıq jürgizilip kelgen sot procesinde BAQ ökilderine audioğa jazıp, videoğa taspalauğa tıyım saluı qoğamnıñ narazı köñil-küyin örşite tüsti. Advokattar men sotqa qatısuşılarğa qayta-qayta eskertu jasap, «şığarıp jiberetinin» aytatın sud'ya Mekemtas pen Şayahmetovanıñ äreketinen «ayıptauşılıq pafosı» bayqaladı. Sud'yanıñ BAQ qızmeti, sonıñ işinde qızmettik qwrılğıların paydalanudı şekteuiniñ qwqıqtıq negizi bar-joğın qwzırlı organ tarapınan eşkim tüsindirgen joq.

QR Joğarı sot törağası J.Asanov mırzanıñ nazarına:

Elordadağı audanaralıq mamandandırılğan sotınıñ sud'yası Q.Mekemtastıñ «Äbişev isine» qatıstı sot procesin audio-videotaspağa tüsiruge tıyım saluı ob'ektivtilikti qamtamasız etpeydi, kerisinşe, aqparattardıñ şınayı beriluin toqtatıp, ob'ektivsiz mälimet taraluına jol beredi.
Sizderdiñ sot retinde jwmıs qwraldarıñız ärtürli zañdar jäne is materialdarı bolsa, bizdiñ, yağni jurnalisterdiñ jwmıs qwralı – jazu, tüsiru qwraldarı. Qazir HHİ ğasır. Aq paraq pen qalam arqılı sot procesin qaz-qalpında qağazğa tüsiru mümkin emes.
Bizge öz jwmıs qwralımızdı paydalanuğa tıyım saluı – jurnalistiñ jwmısına kedergi jasau dep bilemiz. Bwl prokuror Süleymenovtiñ, sud'ya Mekemtastıñ isti tek ayıptau bağıtında, birjaqtı jürgizuge müddeli ekenin körsetedi.
Öziñiz elimizdiñ eñ ädil äri Joğarı sot törağası retinde sud'ya Mekemtastıñ jurnalisterdiñ qwqığın taptağan qaulısınıñ küşin joyuğa ıqpal etip, sot barısın audio-video taspağa jazuğa rwqsat beruiñizdi swraymız.
Bolaşaqta tärtip bwzğan jurnalister bolsa, jeke eskertu jasasa, jeke şeşim şığarsa, qarsı emespiz. Barlıq jurnalisterge birdey tıyım saluın joğarıdan, yağni qandayda bir ıqpaldı twlğalardan tüsken tapsırıs dep qabıldaudan basqa amalımız jok.
Mwnday cenzuralıq közqaras zayırlı memleket retinde el imidjine keri äser eteri sözsiz.
Ötinişimizdi aşıq hat retinde de, resmi türde de mälimdeymiz.

"The Qazaq Times"