ءبىر توپ قوعام بەلسەندىسى ابىشەۆ ءىسىن قاراپ جاتقان سۋديا قاجىمۇقان مەكەمتاستىڭ باق وكىلدەرىنىڭ سوت پروتسەسىن اۋديو-بەينەجازباعا تاسپالاۋىنا تىيىم سالعان قاۋلىسىنا بايلانىستى جوعارى سوت توراعاسى جاقىپ اسانوۆقا اشىق حات جاريالادى.

قوعام بەلسەندىلەرى مەن بەلگىلى جۋرناليستەر ساۋلە ابەدينوۆا، قازىبەك يسا، ومىرزاق اقجىگىت، زاۋرە مۇساحودجاەۆا، نۇربەك قويلىباي، اسحات بەرساليموۆ، نۇربولات ادىربەك ت.ب. ۇيىمداسىپ، جوعارى سوت توراعاسى  جاقىپ اسانوۆقا ابىشەۆ ىسىنە قاتىستى ءوتىنىش جولدادى. سوت جۇيەسىن ىزگىلەندىرۋدى، سۋديالاردان ءادىل شەشىم شىعارۋدى تالاپ ەتىپ، باق الدىندا «كۇرەسكەر» يميدجىمەن تانىلعان اسانوۆتىڭ ابىشەۆ ءىسىن قاراپ جاتقان سۋديا قاجىمۇقان مەكەمتاسقا قانداي شارا قولداناتىنى ازىرگە بەلگىسىز. بۇعان دەيىن «پارا الۋعا ىڭعاي تانىتتى» دەگەن ايىپپەن بەلگىلى شەنەۋنىك يسلام ابىشەۆ كۇدىككە ءىلىنىپ، تەرگەۋ امالدارى اياقتالىپ، ءىس سوتقا جولدانعان. ەل ىشىندە «كوپ سەريالى كۇزگى كومەديا» اتانعان ىسكە قاتىستى قۇقىق قورعاۋشىلار ابىشەۆتىڭ «بولىنگەن قاراجاتتى ۇلكەن ويىنشىلارمەن بولىسپەي، بيۋدجەتكە كەرى قايتارعانى» ءۇشىن «ارنايى تاپسىرىس بەرىلگەن ستسەنراي» بويىنشا ايىپتاپ جاتقانىن ايتادى. ابىشەۆ سوتىنا تورەلىك ەتىپ جاتقان سۋديانىڭ ادۆوكات ابزال قۇسپان «پروكۋروردان دا وتكەن ايىپتاۋشى» ەكەنىن مالىمدەگەن بولاتىن. ءار سوت وتىرىسىن تىكەلەي ەفيردەن ۇزبەي قارايتىن ازاماتتىق قوعام وكىلدەرى سۋديا قاجىمۇقان مەكەمتاستىڭ سوت وتىرىسىندا ءوزىن ۇستاۋى مەن مەملەكەتتىك ءتىلدى جەتىك مەڭگەرگەنىنە كۇمانمەن قارايدى. بۇعان سەبەپ سۋديا مەكەمتاس وقىعان ەكى بەت قاۋلىدا 70-كە تارتا قاتە تابىلعان. مۇنى ابىشەۆتىڭ ادۆوكاتتارى مەن قورعاۋشىلارى تەكسەرىپ انىقتاعان.

كەشە سۋديا مەكەمتاس ابىشەۆ ءىسى بويىنشا وسى كۇنگە دەيىن ەش شەكتەۋسىز اشىق جۇرگىزىلىپ كەلگەن سوت پروتسەسىندە باق وكىلدەرىنە اۋديوعا جازىپ، ۆيدەوعا تاسپالاۋعا تىيىم سالۋى قوعامنىڭ نارازى كوڭىل-كۇيىن ورشىتە ءتۇستى. ادۆوكاتتار مەن سوتقا قاتىسۋشىلارعا قايتا-قايتا ەسكەرتۋ جاساپ، «شىعارىپ جىبەرەتىنىن» ايتاتىن سۋديا مەكەمتاس پەن شاياحمەتوۆانىڭ ارەكەتىنەن «ايىپتاۋشىلىق پافوسى» بايقالادى. سۋديانىڭ باق قىزمەتى، سونىڭ ىشىندە قىزمەتتىك قۇرىلعىلارىن پايدالانۋدى شەكتەۋىنىڭ قۇقىقتىق نەگىزى بار-جوعىن قۇزىرلى ورگان تاراپىنان ەشكىم تۇسىندىرگەن جوق.

قر جوعارى سوت توراعاسى ج.اسانوۆ مىرزانىڭ نازارىنا:

ەلورداداعى اۋدانارالىق مامانداندىرىلعان سوتىنىڭ سۋدياسى ق.مەكەمتاستىڭ «ابىشەۆ ىسىنە» قاتىستى سوت پروتسەسىن اۋديو-ۆيدەوتاسپاعا تۇسىرۋگە تىيىم سالۋى وبەكتيۆتىلىكتى قامتاماسىز ەتپەيدى، كەرىسىنشە، اقپاراتتاردىڭ شىنايى بەرىلۋىن توقتاتىپ، وبەكتيۆسىز مالىمەت تارالۋىنا جول بەرەدى.
سىزدەردىڭ سوت رەتىندە جۇمىس قۇرالدارىڭىز ءارتۇرلى زاڭدار جانە ءىس ماتەريالدارى بولسا، ءبىزدىڭ، ياعني جۋرناليستەردىڭ جۇمىس قۇرالى – جازۋ، ءتۇسىرۋ قۇرالدارى. قازىر ءححى عاسىر. اق پاراق پەن قالام ارقىلى سوت پروتسەسىن قاز-قالپىندا قاعازعا ءتۇسىرۋ مۇمكىن ەمەس.
بىزگە ءوز جۇمىس قۇرالىمىزدى پايدالانۋعا تىيىم سالۋى – ءجۋرناليستىڭ جۇمىسىنا كەدەرگى جاساۋ دەپ بىلەمىز. بۇل پروكۋرور سۇلەيمەنوۆتىڭ، سۋديا مەكەمتاستىڭ ءىستى تەك ايىپتاۋ باعىتىندا، بىرجاقتى جۇرگىزۋگە مۇددەلى ەكەنىن كورسەتەدى.
ءوزىڭىز ەلىمىزدىڭ ەڭ ءادىل ءارى جوعارى سوت توراعاسى رەتىندە سۋديا مەكەمتاستىڭ جۋرناليستەردىڭ قۇقىعىن تاپتاعان قاۋلىسىنىڭ كۇشىن جويۋعا ىقپال ەتىپ، سوت بارىسىن اۋديو-ۆيدەو تاسپاعا جازۋعا رۇقسات بەرۋىڭىزدى سۇرايمىز.
بولاشاقتا ءتارتىپ بۇزعان جۋرناليستەر بولسا، جەكە ەسكەرتۋ جاساسا، جەكە شەشىم شىعارسا، قارسى ەمەسپىز. بارلىق جۋرناليستەرگە بىردەي تىيىم سالۋىن جوعارىدان، ياعني قاندايدا ءبىر ىقپالدى تۇلعالاردان تۇسكەن تاپسىرىس دەپ قابىلداۋدان باسقا امالىمىز جوك.
مۇنداي تسەنزۋرالىق كوزقاراس زايىرلى مەملەكەت رەتىندە ەل يميدجىنە كەرى اسەر ەتەرى ءسوزسىز.
ءوتىنىشىمىزدى اشىق حات رەتىندە دە، رەسمي تۇردە دە مالىمدەيمىز.

"The Qazaq Times"