Körneki kollaj: Äbişev pen antikorrupciya qızmeti arasındağı "ayqas". Foto: QT

Astanada auıl şaruaşılığı ministrligi Su resurstarı komitetiniñ bwrınğı törağası Islam Äbişev pen Serik Tükievtiñ isine baylanıstı advokattar baspasöz mäslihatın ötkizdi. Olardıñ sözinşe, sıbaylas jemqorlıqqa qarsı wlttıq byuro bastı küditilerdiñ kinäsizdigi däleldengen soñ, olardıñ tuıstarına «jala jauıp jatqan» körinedi.

Advokat Abdurahmanov A., Qwspan A., Esqaraev M., Jünisbay S. istiñ jay-japsarın aşıp ayttı.

Abzal Qwspannıñ sözinşe, Islam Äbişev kezinde özine wsınılğan 2 mlrd teñge paradan bas tartqanın aytqan, al endi 60 mln teñge aqşanı tanımaytın bireuden aluğa oqtaldı degen ayıppen qazir türmede otır. Belsendiler «sıbaylas jemqorlıqpen küres wlttıq byurosı Islam Äbişev pen Serik Tükievtiñ üstinen üş aydıñ üstinde jasırın tergeu amaldarın jürgizip, Äbişevtiñ eşqanday para alu oyı da, nieti de bolmağanına közderi jetken soñ, ol kisini «para alğısı keldi» degen ayıppen qamadı» deydi.

– Para aluğa oqtaldı degen ayıptı sot tergeuinde kül-talqanın şığardıq. Sot procesi barısında wlttıq byuro qızmetkerleri zañsız aralasıp, kuägerge qısım körsetti. Bwğan naqtı dälel jetkilikti. Üş ay jasırın tergeu jürgizgen antikorrupciya qızmeti eşqanday qılmıstı anıqtay almasa da,  qaralau maqsatında aqparat qwraldarına jalğan beynehabar tarattı. KTK-dan bastap Azattıqqa deyin osını tarattı. ...Küdikti retinde tartılğan Äbişev pen Tükievke qatıstı «para aluğa oqtalu» degen ayıp öz dälelin tappağan soñ, endi Wlttıq byuro qızmetkerleri olardıñ tuğan-tuıstarınıñ (qızdarı men bauırlarınıñ) üstinen «para beruge oqtalu» degen ayıppın is qozğap qoyıptı. Oğan negiz retinde tergeu izolyatorındağı bizdiñ keybir äñgimemizdi jazıp alğan eken. Biraq onda aytılğan sözdiñ eşbirinde para beru arqılı isti toqtatu turalı şeşim-toqtam bolmağan,– dedi Abzal Qwspan.

Dese de qwqıq qorğau organdarı «qwpiyalılığına kepildik» berilui tiis kezdesudegi sözdiñ stenogrammasın wsınbağan. Osılayşa, «wlttıq byuro zañdı attap ötip, arandatu ädisimen köpe körneu, negizsiz is qozğadı» deydi.

Qwqıq qorğauşılar «antikorrupciyalıq wlttıq byuro sot ädildigin jüzege asıruğa kedergi keltirude» dep şağındı. Äbişev-Tükiev jaqtastarınıñ aytuınşa, wlttıq byuro men qwqıq qorğau organdarı qorğauşı men küdikke tartılğan adamnıñ izolyatordağı qwpiya sözin zañdı bwza otırıp tıñdağan, arandatuşılar advokattar men qorğaluşılardıñ äbden mazasın alğan, sotqa tartılğan azamattardıñ tuısına qaysıbir isti qozğau arqılı qısım jasağan, olardıñ üyine mezgilsiz kez kelgen uaqıtta tekseru-tintu jürgizgen, 30 tomdıq isti on kün emes, eki-aq künde sotqa joldağan...

Sonday-aq «eñ quattı organnıñ betperdesin aşuşı» advokattar küdiktiler men sud'yağa qısım körsetilip jatqanın habarladı. Ükim şığatın sätte sud'yanıñ isten şetteuin qwqıq qorğauşılar «aralasuınan» dep sanaydı.

Qwqıq qorğauşı «Äbişev isiniñ bastı figurasınıñ biri, arızdanuşı äri kuäger Azamat Şaymerdenov küştik qwrılımnıñ adamı, bwrınğı qarjı salasına qatısı bar twlğa. Ol arnayı dayındalğan person» deydi.

Bwğan deyin Islam Äbişev 2012 jılı AŞM Su resurstarı komitetiniñ törağası qızmetine tağayındaldı. 2013 jıldıñ şildesinde qızmetinen alastatıldı. 2014 jıldıñ şildesinde qaytadan komitet törağası qızmetine keldi. Al 2019 jılğı 14 naurızda Äbişevti Sıbaylas jemqorlıqqa qarsı is-qimıl agenttiginiñ qızmetkerleri twtqındadı.

"The Qazaq Times"