«Wsaq oyınşılar twtılğan kezekti nömir»: Para alğan tergeuşige ükim oqıldı  

Elordasında Almatı audandıq Policiya basqarmasınıñ tergeuşisi Dihanov QR QK 366-babınıñ 1-bölimimen kinäli dep tanılıp, zañsız jolmen 80 mıñ teñge alğanı üşin, para köleminen 25 ese ayıppwl salındı.

Astanalıq Sıbaylas jemqorlıqqa qarsı departamentiniñ habarlauınşa, eks-tergeuşige 2 million teñge ayıppwl salınıp, eñ auırı, ömir boyına memlekettik qızmettegi lauazımdardı atqaru qwqığınan, «policiya leytenantı» arnaulı atağınan da ayırıldı.

Antikorrupciya vedomstvosı QR QPK 200-babına säykes sıbaylas jemqorlıq qılmıstardı jasauğa ıqpal etetin jağdaylardı joyu ayasında Almatı audandıq Policiya basqarmasınıñ jeke qwramımen kezdesui ötkizdi.

Kezdesu barısında departament qızmetkerleri jäne arnayı monitoringtik toptıñ törağası Şavkat Ismailov adaldıq qwndılıqtarın qalıptastıru jäne qoğamnıñ memlekettik organdarğa senimin arttıruğa bağıttalğan aldın alu şaraları turalı, sonımen qatar «Astana – adaldıq alañı» jobası ayasında sıbaylas jemqorlıqqa qarsı qızmet pen halıqtıñ birlesken jwmıstarı jöninde söz etti.

Qazaqstanda sıbaylas jemqorlıq qılmısı bäseñdemey, kerisinşe örşip twr. Sıbaylas jemqorlıqqa qarsı is-qimıl agenttiginiñ oblıstıq departamentiniñ deregi oyınşa, bir ğana Aqtöbe oblısınıñ özinde biılğı 9 ayda jemqorlıqqa qatıstı bası bütin 99 is tirkelip, tergeu jürip jatır. Onıñ 50%-ı auır sanatqa jatadı desedi: qarjı jımqıru, memleket qarjısın talan-tarajğa salu deregi boyınşa 30 is, qılmıstıq ökilettiligin asıra paydalanuda 38 is, para aluda 24 qılmıstıq is bar.

Künbe-kün örşigen jemqorlıqtıñ «saldarımen küres» qaşanğı jalğaspaq? Sıbaylas jemqorlıqtı qabıldau indeksi boyınşa 124-şi orınğa jayğasqan Qazaqstanda qazına wrılarınıñ ülkeni şalqıp, wsağı oñay twtılıp jür. Azamattıq qoğamnıñ belsendi ökilderi «Wsaq oyınşılar twtılğan kezekti profilaktika», «Aranı zor paraqorlar men wrılardı wstauğa därmensiz, sebebi bäriniñ auızı bir» dep sanaydı.

«Ayran işkeni qwtılıp, şelek jalağanı twtıla qoyatın» sıbaylas jemqorlıqpen küres sayasatınıñ kurs-bağdarın özgertuge aqjağalılardıñ batılı bara qoyar ma eken?

"The Qazaq Times"