Qıtaydan qaşıp, Qazaqstannan pana swrap kelgen Qayşa Aqan sot zalında. Almatı oblısı. 12 qaraşa 2019 jıl. Foto: Azattıq/Nwrtay Lahan

Soñğı jıldarı Qıtaydağı azşılıq wlttarğa jasalıp jatqan qısımnıñ äserimen şekara kesip ötuşiler köbeyip keledi. Keşe qoğam aldına aşıq şığıp, «Atamekenimnen pana izdep keldim» degen tört azamattıñ biri Qayşa Aqannıñ alğaşqı sot otırısı ötti.

Qaraşanıñ 12-si Almatı oblısına qarastı Jarkent qalasındağı Panfilov audandıq sotında Qazaqstan - Qıtay şekarasınan zañsız ötken QHR azamatı, etnikalıq qazaq Qayşa Aqannıñ isi boyınşa sot procesi bastaldı.
Pana swrap kelgen Qayşa Aqannıñ sözinşe, ol bıltır mamır ayınıñ 7-si Qazaqstanğa Qorğas keden beketi arqılı, köpşilikke ilesip ötken.
Al biıl tamız ayında öz erkimen WQK-ğa barıp, lajsızdıqtan şekaradan zañsız ötkeni turalı habarlağan. Sodan soñ birden qılmıstıq is qozğalıp, sot bastalğan.
Ol şekaradan zañsız elge kelgen twsta qoğamdıq rezonans tudırğan etnikalıq qazaq Sayragül Sauıtbaydıñ atışulı isin sırttay baqılağanın aytadı. Öz tağdırın Qazaqstanda uaqıtşa panalap, bosqın märtebesin ala almağan soñ, Şveciyağa bas sauğalap ketken Sayragüldiñ tağdırımen wqsatadı. Onıñ aytuınşa, Qıtaydağı İle-Qazaq avtonomiyalıq audanınıñ policiyası oğan «qayta tärbieleu lagerine» qamalatının aşıq eskertken. Osıdan keyin Qazaqstanğa ketuge bel baylap, QHR şekarasına üş ret kelgen.

– Qolımda Qazaqstannıñ vizası bola twra jibermedi. Şetelge şığuğa tıyım salınğandar tizimindesiñ dep qaytardı. Qazaqstannan pana izdep keldim. Meni Qıtayğa qaytarmaudı swraymın. Qıtayda meni sayasi quğın kütip twr, – deydi ol.

Qayşa Aqan sot barısında «Qazaqstan şekarasınan zañsız ötkenin» moyındap, bwğan Qıtaydağı az wlttarğa jasalatın qısımnan seskengendikten barğanın aytıp ağınan jarıldı.
43 jastağı Qayşa Aqannıñ qart şeşesi men bwrın ajırasqan küyeuiniñ qolında jalğız wlı Qıtayda qalğan. Bügingi tañda Almatı qalasında päter jaldap twradı, twraqtı jwmısı joq. Ol 11 qaraşa Almatı qalalıq köşi-qon policiyasınan «Pana izdeuşi twlğa» qwjatın alğan körinedi. Sud'ya kelesi sot otırısın 22 qaraşağa belgiledi.

Joğarıda aytqan tört qazaqtıñ üşeui: Europadan pana tapqan Sayragül Sauıtbay men şarasızdıqtan şekara asqan Qaster Mwshanwlı men Mwrager Älimwlı.

"The Qazaq Times"