سوڭعى جىلدارى قىتايداعى ازشىلىق ۇلتتارعا جاسالىپ جاتقان قىسىمنىڭ اسەرىمەن شەكارا كەسىپ وتۋشىلەر كوبەيىپ كەلەدى. كەشە قوعام الدىنا اشىق شىعىپ، «اتامەكەنىمنەن پانا ىزدەپ كەلدىم» دەگەن ءتورت ازاماتتىڭ ءبىرى قايشا اقاننىڭ العاشقى سوت وتىرىسى ءوتتى.

قاراشانىڭ 12-ءسى الماتى وبلىسىنا قاراستى جاركەنت قالاسىنداعى پانفيلوۆ اۋداندىق سوتىندا قازاقستان - قىتاي شەكاراسىنان زاڭسىز وتكەن قحر ازاماتى، ەتنيكالىق قازاق قايشا اقاننىڭ ءىسى بويىنشا سوت پروتسەسى باستالدى.
پانا سۇراپ كەلگەن قايشا اقاننىڭ سوزىنشە، ول بىلتىر مامىر ايىنىڭ 7-ءسى قازاقستانعا قورعاس كەدەن بەكەتى ارقىلى، كوپشىلىككە ىلەسىپ وتكەن.
ال بيىل تامىز ايىندا ءوز ەركىمەن ۇقك-عا بارىپ، لاجسىزدىقتان شەكارادان زاڭسىز وتكەنى تۋرالى حابارلاعان. سودان سوڭ بىردەن قىلمىستىق ءىس قوزعالىپ، سوت باستالعان.
ول شەكارادان زاڭسىز ەلگە كەلگەن تۇستا قوعامدىق رەزونانس تۋدىرعان ەتنيكالىق قازاق سايراگۇل ساۋىتبايدىڭ اتىشۋلى ءىسىن سىرتتاي باقىلاعانىن ايتادى. ءوز تاعدىرىن قازاقستاندا ۋاقىتشا پانالاپ، بوسقىن مارتەبەسىن الا الماعان سوڭ، شۆەتسياعا باس ساۋعالاپ كەتكەن سايراگۇلدىڭ تاعدىرىمەن ۇقساتادى. ونىڭ ايتۋىنشا، قىتايداعى ىلە-قازاق اۆتونوميالىق اۋدانىنىڭ پوليتسياسى وعان «قايتا تاربيەلەۋ لاگەرىنە» قامالاتىنىن اشىق ەسكەرتكەن. وسىدان كەيىن قازاقستانعا كەتۋگە بەل بايلاپ، قحر شەكاراسىنا ءۇش رەت كەلگەن.

– قولىمدا قازاقستاننىڭ ۆيزاسى بولا تۇرا جىبەرمەدى. شەتەلگە شىعۋعا تىيىم سالىنعاندار تىزىمىندەسىڭ دەپ قايتاردى. قازاقستاننان پانا ىزدەپ كەلدىم. مەنى قىتايعا قايتارماۋدى سۇرايمىن. قىتايدا مەنى ساياسي قۋعىن كۇتىپ تۇر، – دەيدى ول.

قايشا اقان سوت بارىسىندا «قازاقستان شەكاراسىنان زاڭسىز وتكەنىن» مويىنداپ، بۇعان قىتايداعى از ۇلتتارعا جاسالاتىن قىسىمنان سەسكەنگەندىكتەن بارعانىن ايتىپ اعىنان جارىلدى.
43 جاستاعى قايشا اقاننىڭ قارت شەشەسى مەن بۇرىن اجىراسقان كۇيەۋىنىڭ قولىندا جالعىز ۇلى قىتايدا قالعان. بۇگىنگى تاڭدا الماتى قالاسىندا پاتەر جالداپ تۇرادى، تۇراقتى جۇمىسى جوق. ول 11 قاراشا الماتى قالالىق كوشى-قون پوليتسياسىنان «پانا ىزدەۋشى تۇلعا» قۇجاتىن العان كورىنەدى. سۋديا كەلەسى سوت وتىرىسىن 22 قاراشاعا بەلگىلەدى.

جوعارىدا ايتقان ءتورت قازاقتىڭ ۇشەۋى: ەۋروپادان پانا تاپقان سايراگۇل ساۋىتباي مەن شاراسىزدىقتان شەكارا اسقان قاستەر مۇسحانۇلى مەن مۇراگەر ءالىمۇلى.

"The Qazaq Times"