Taliban jetekşileri. Foto: VOA.

Biz osıdan bwrın, AQŞ-tıñ Auğanstannan şeginui Qıtaydıñ osı el men aymaqtağı ıqpalınıñ artuına äkelip soğatının boljay aytqan edik. Endi mine sol boljamımızdıñ dwrıstığın däleldegendey, Qıtay men auğanstandıq tälipter arasında dialogtar jürip jatqanı mälim boldı.

Auğanstannıñ «Taliban» wyımı Qıtayğa delegaciya jiberip, Qıtaydıñ joğarı lauazımdı twlğalarımen kezdesu ötkizgen. Qıtaydıñ Auğanstan isi jönindegi arnayı ökili Dıñ Şijünmen «Taliban» jäne AQŞ arasındağı kelissöz mäselesin talqılağan.

Qıtaydıñ Sırtqı ister ministrligi keşe jasağan mälimdemesinde «Taliban» sayasi keñesiniñ jetekşisi bastağan delegaciya ökilderiniñ Beyjiñde Qıtay lauazımdılarımen kezdeskenin rastadı. Qıtay SİM tarabı: «Kezdesude Auğanstan jağdayı jäne Auğanstandağı beybitşilik procesin damıtu turalı talqı boldı», – dep mälimdegen.

Qıtay men «Taliban» arasında kezdesu bolğanın tälipter de rastap mälimdeme jasadı. Olardıñ mälimetinde Beyjiñge 9 adamnan twratın delegaciyanı «Talibannıñ» Katardağı sayasi byurosınıñ jetekşisi Baladal bastap barğan. Baladal öziniñ «Tvitter» paraqşasına: «Eger Tramp öz uädesin orındamaytın bolsa Auğanstandağı bolğan qantögistiñ jauapkerşiligin öz moynına aladı», – degen bolatın.

Bwğan deyin, naqtıraq aytqanda bıltır jıl soñınan beri AQŞ pen Taliban arasında Auğanstandağı 18 jıldıq soğıstı toqtatıp, beybit bitimge kelu maqsatındağı kelissözder jürgizip kelgen. Kelissöz kezderinde de tälipterdiñ qarulı şabuıldarı jalğasıp jattı. AQŞ prezidenti Donal'd Tramp tälipterdiñ qarulı şabuılın alğa tarta otırıp, beybitşilik kelissözderin toqtatqan bolatın.

«Taliban» mälimdemeşisi, Qıtay tarabı AQŞ pen tälipter arasındağı kelisimdi qoldaytının ayttı. Qıtaydıñ arnayı ökili AQŞ pe tälipter arasındağı kelissözdi «beybitşiliktiñ negizi» retinde bağalağan.

Qıtaydıñ Şınjañ jeri Auğanstanmen şekaralasıp jatır. Beyjiñ biligi köpten beri Auğanstandağı terrorlıq toptar men Şınjañdağı «separatistik küşterdiñ» (şın mänisinde tikeley qauip töndirgen separatistik küşter Şınjañnıñ öz işinde joq) birigip ketuinen alañdap kelgen.

Al, jaqında Ortalıq Aziya elderiniñ SİM basşılarımen kezdesude AQŞ mem. hatşısı Mayk Pompeo «Qıtaydıñ Şınjañdağı äreketi terrorizmge qarsı kürespen eş qatısı joq ekenin» ayttı. Tilşilerdiñ bwl turalı swrağına Qıtay SİM ökili Gıñ Şuañ: «AQŞ öziniñ müddesine nwqsan keltirmeui üşin ayıptalğan küşterdi qoldauın toqtatuı kerek», – degen. Bwl sözi Qıtay ükimeti ayıptağan küşterdi qoldau, AQŞ-tıñ müddesine ziyan keltiredi degendi bildirse kerek.

Qalay bolğan künde de, Auğanstandağı Qıtay ıqpalınıñ artuı Şınjañ mäselesine, onıñ özgeristerine tikeley qatıstı bolmaq. Jäne bwl tikeley Ortalıq Aziyadağı Qıtaydıñ äskeri ıqpalın da arttıruı mümkin.

“The Qazaq Times”