Qazaqstan prezidenti Qasım-Jomart Toqaev AQŞ qalası N'yu-Yorkke saparlap bardı. Ol BWW Bas assambleyasınıñ 74-şi sessiyasına qatısadı. Bwl turalı prezidenttiñ baspasöz hatşısı Berik Qwrmanğali Facebook jelisindegi paraqşasında jariyaladı.

Mälimetter boyınşa, Qazaqstan prezidenti BWW bas assambleyasınıñ «Kedeylikti joyu, sapalı bilim berudi jäne klimattı saqtau is-qimıldarı men jan-jaqtı täsilderdi ilgeriletu üşin köpjaqtı küş-jigerdi şoğırlandıru» taqırıbımen ötetin jalpı pikirsayısında bayandama jasaydı.

Sapar barısında Q.Toqaev BWW-nıñ Bas hatşısı Antoniu Guterrişpen, birqatar memleket jäne Ükimet basşılarımen, halıqaralıq wyım jetekşilerimen, amerikalıq biznes, transwlttıq kompaniya ökilderimen, AQŞ-tıñ sayasi äri sarapşı top müşelerimen kezdesui josparlanğan. Prezident sözinde: «Biz Amerika Qwrama Ştattarımen tığız äriptestik baylanıs ornattıq jäne sırtqı sayasattağı köptegen mañızdı mäseleler boyınşa birlesip jwmıs istep kelemiz. Bolaşaqta da solay boladı. Qazaqstan soñğı üş onjıldıqtıñ bederinde sätti jüzege asırıp kele jatqan täuelsiz, köpjaqtı jäne sındarlı sırtqı sayasatın meniñ basşılığımmen de jalğastıra beredi», – dedi.

Biıl 114 memleket köşbasşıları men 80-nen astam eldiñ sırtqı ister ministrleri 24-30 qırküyek arasında BWW Bas Assambleyasınıñ 74-şi sammitine qatısıp, jahandıq mäselelerdi talqığa salmaq. Taqırıptar ğalamdıq mäselelerdiñ barlıq spektri qarastırılatın 170-ten astam mäselelerdi qamtidı: aymaqtıq qaqtığıstardan bastap, qazirgi ekonomikalıq, ekologiyalıq jäne gumanitarlıq mäselelerge deyin.

Ayta keteyik, Qwrama Ştattarına resmi saparmen qañtarda bwrınğı prezident Nwrswltan Nazarbaev barğan bolğan. Ol saparında Aq üy basşısı Donal'd Tramppen kezdesu wyımdastırğan. Al Qasım-Jomart Toqaev Qazaqstan prezidenti retinde AQŞ-qa alğaş ret saparmen bardı. Ol bwrın BWW bas hatşısınıñ orınbasarı bolıp istegen.

"The Qazaq Times"