قازاقستان پرەزيدەنتى قاسىم-جومارت توقاەۆ اقش قالاسى نيۋ-يورككە ساپارلاپ باردى. ول بۇۇ باس اسسامبلەياسىنىڭ 74-ءشى سەسسياسىنا قاتىسادى. بۇل تۋرالى پرەزيدەنتتىڭ ءباسپاسوز حاتشىسى بەرىك قۇرمانعالي Facebook جەلىسىندەگى پاراقشاسىندا جاريالادى.

مالىمەتتەر بويىنشا، قازاقستان پرەزيدەنتى بۇۇ باس اسسامبلەياسىنىڭ «كەدەيلىكتى جويۋ، ساپالى ءبىلىم بەرۋدى جانە كليماتتى ساقتاۋ ءىس-قيمىلدارى مەن جان-جاقتى تاسىلدەردى ىلگەرىلەتۋ ءۇشىن كوپجاقتى كۇش-جىگەردى شوعىرلاندىرۋ» تاقىرىبىمەن وتەتىن جالپى پىكىرسايىسىندا بايانداما جاسايدى.

ساپار بارىسىندا ق.توقاەۆ بۇۇ-نىڭ باس حاتشىسى انتونيۋ گۋتەرريشپەن، بىرقاتار مەملەكەت جانە ۇكىمەت باسشىلارىمەن، حالىقارالىق ۇيىم جەتەكشىلەرىمەن، امەريكالىق بيزنەس، ترانسۇلتتىق كومپانيا وكىلدەرىمەن، اقش-تىڭ ساياسي ءارى ساراپشى توپ مۇشەلەرىمەن كەزدەسۋى جوسپارلانعان. پرەزيدەنت سوزىندە: «ءبىز امەريكا قۇراما شتاتتارىمەن تىعىز ارىپتەستىك بايلانىس ورناتتىق جانە سىرتقى ساياساتتاعى كوپتەگەن ماڭىزدى ماسەلەلەر بويىنشا بىرلەسىپ جۇمىس ىستەپ كەلەمىز. بولاشاقتا دا سولاي بولادى. قازاقستان سوڭعى ءۇش ونجىلدىقتىڭ بەدەرىندە ءساتتى جۇزەگە اسىرىپ كەلە جاتقان تاۋەلسىز، كوپجاقتى جانە سىندارلى سىرتقى ساياساتىن مەنىڭ باسشىلىعىممەن دە جالعاستىرا بەرەدى»، – دەدى.

بيىل 114 مەملەكەت كوشباسشىلارى مەن 80-نەن استام ەلدىڭ سىرتقى ىستەر مينيسترلەرى 24-30 قىركۇيەك اراسىندا بۇۇ باس اسسامبلەياسىنىڭ 74-ءشى سامميتىنە قاتىسىپ، جاھاندىق ماسەلەلەردى تالقىعا سالماق. تاقىرىپتار عالامدىق ماسەلەلەردىڭ بارلىق سپەكترى قاراستىرىلاتىن 170-تەن استام ماسەلەلەردى قامتيدى: ايماقتىق قاقتىعىستاردان باستاپ، قازىرگى ەكونوميكالىق، ەكولوگيالىق جانە گۋمانيتارلىق ماسەلەلەرگە دەيىن.

ايتا كەتەيىك، قۇراما شتاتتارىنا رەسمي ساپارمەن قاڭتاردا بۇرىنعى پرەزيدەنت نۇرسۇلتان نازارباەۆ بارعان بولعان. ول ساپارىندا اق ءۇي باسشىسى دونالد ترامپپەن كەزدەسۋ ۇيىمداستىرعان. ال قاسىم-جومارت توقاەۆ قازاقستان پرەزيدەنتى رەتىندە اقش-قا العاش رەت ساپارمەن باردى. ول بۇرىن بۇۇ باس حاتشىسىنىڭ ورىنباسارى بولىپ ىستەگەن.

"The Qazaq Times"