Elordadağı «Til tazalığı – barşağa ortaq is» jobası ayasında ötip jatqan şaralar keşe Esil audanında jürgizildi.

Almatı köşesinde ornalasqan nısandardı qarau boyınşa köptegen zañ bwzuşılıqtar anıqtaldı. Olardıñ keybiri jarnama taqtayşaların, körneki aqparattı köşege rwqsatsız qoyğan jäne til zañın öreskel bwzğan. Qazaq tilindegi nwsqasın qate audarğandarı da kezikti.

Qalalıq Tilderdi damıtu jäne arhiv isi basqarmasınıñ mamandarı men Esil audanı äkimdiginiñ qızmetkerleri nısan ielerine tüsindiru jwmıstarın jürgizdi. Olarğa üş jwmıs küni işinde qatelikti tüzep, jarnama men körneki aqparattardı zañ talaptarına say ornalastırudı eskertti. Biraz nısan ieleri sol mezette-aq jarnamalardı alıp tastadı.

Bwl retki şara Esil audanında da til zañın saqtamau jağdayı köp ekenine köz jetkizdi. Bir ğana Almatı köşesiniñ özinde zañ talaptarın orındamağan nısandar nazarğa alınıp, jwmıs tobı tarapınan eskertu jasaldı. Belgilengen uaqıt ötken soñ mamandar osı eskertpe boyınşa, nısandardı qayta qarap şığatın boladı.

Ayta keter bir jayt, tek orıs tilinde jarnama bergen nısan ieleri onıñ qazaqşa nwsqasın Tilderdi damıtu jäne arhiv isi basqarmasınıñ bekituinen ötkizui kerek. Basqarma qızmetkerleri onı qarap, dwrıstauğa kömek körsetedi. Käsipker ol üşin audarmaşı jaldap, aqı töleuiniñ qajeti joq. Bwl da qala äkimdiginiñ azamattar üşin jasağan tiimdiligi.

Eske sala ketsek, bas qalada «Til tazalığı – barşağa ortaq is» jobasınıñ ekinşi kezeñi bastalğanın habarlağan edik. Qazir auqımdı joba qalanıñ barlıq tört audanında jürgizilip jatır.

"The Qazaq Times"