ەلورداداعى «ءتىل تازالىعى – بارشاعا ورتاق ءىس» جوباسى اياسىندا ءوتىپ جاتقان شارالار كەشە ەسىل اۋدانىندا جۇرگىزىلدى.

الماتى كوشەسىندە ورنالاسقان نىسانداردى قاراۋ بويىنشا كوپتەگەن زاڭ بۇزۋشىلىقتار انىقتالدى. ولاردىڭ كەيبىرى جارناما تاقتايشالارىن، كورنەكى اقپاراتتى كوشەگە رۇقساتسىز قويعان جانە ءتىل زاڭىن ورەسكەل بۇزعان. قازاق تىلىندەگى نۇسقاسىن قاتە اۋدارعاندارى دا كەزىكتى.

قالالىق تىلدەردى دامىتۋ جانە ارحيۆ ءىسى باسقارماسىنىڭ ماماندارى مەن ەسىل اۋدانى اكىمدىگىنىڭ قىزمەتكەرلەرى نىسان يەلەرىنە ءتۇسىندىرۋ جۇمىستارىن جۇرگىزدى. ولارعا ءۇش جۇمىس كۇنى ىشىندە قاتەلىكتى تۇزەپ، جارناما مەن كورنەكى اقپاراتتاردى زاڭ تالاپتارىنا ساي ورنالاستىرۋدى ەسكەرتتى. ءبىراز نىسان يەلەرى سول مەزەتتە-اق جارنامالاردى الىپ تاستادى.

بۇل رەتكى شارا ەسىل اۋدانىندا دا ءتىل زاڭىن ساقتاماۋ جاعدايى كوپ ەكەنىنە كوز جەتكىزدى. ءبىر عانا الماتى كوشەسىنىڭ وزىندە زاڭ تالاپتارىن ورىنداماعان نىساندار نازارعا الىنىپ، جۇمىس توبى تاراپىنان ەسكەرتۋ جاسالدى. بەلگىلەنگەن ۋاقىت وتكەن سوڭ ماماندار وسى ەسكەرتپە بويىنشا، نىسانداردى قايتا قاراپ شىعاتىن بولادى.

ايتا كەتەر ءبىر جايت، تەك ورىس تىلىندە جارناما بەرگەن نىسان يەلەرى ونىڭ قازاقشا نۇسقاسىن تىلدەردى دامىتۋ جانە ارحيۆ ءىسى باسقارماسىنىڭ بەكىتۋىنەن وتكىزۋى كەرەك. باسقارما قىزمەتكەرلەرى ونى قاراپ، دۇرىستاۋعا كومەك كورسەتەدى. كاسىپكەر ول ءۇشىن اۋدارماشى جالداپ، اقى تولەۋىنىڭ قاجەتى جوق. بۇل دا قالا اكىمدىگىنىڭ ازاماتتار ءۇشىن جاساعان تيىمدىلىگى.

ەسكە سالا كەتسەك، باس قالادا «ءتىل تازالىعى – بارشاعا ورتاق ءىس» جوباسىنىڭ ەكىنشى كەزەڭى باستالعانىن حابارلاعان ەدىك. قازىر اۋقىمدى جوبا قالانىڭ بارلىق ءتورت اۋدانىندا جۇرگىزىلىپ جاتىر.

"The Qazaq Times"