Qazaqstan pasportın beru. Foto: nur.kz

AVTOR: Täuelsizdikti alu jäne onı şetelderge tanıtudıñ qiın kezeñderinde Sırtqı ister ministriniñ orınbasarı qızmetin atqardıñız. Öz ülesiñizdi qosıp, älemdik arenada Qazaqstannıñ atın tanıtuda köp küş jwmsadıñız. Al täuelsiz eldiñ elşisi bolıp jwmıs istegen qalay eken? Körşi el Özbekstanğa Tötenşe jäne Ökiletti Elşi bolıp barğan uaqıtta diplomatiyanıñ bwrın kezdespegen qiındıqtarına jolıqtıñız ba?

S. B.: 1993 jılğı 13 mamırda Prezident N. Nazarbaevtıñ Jarlığımen Qazaqstannıñ Özbekstan Respublikasındağı twñğış Tötenşe jäne Ökiletti Elşisi bolıp tağayındaldım. Atalğ an qos memleket Ortalıq Aziyadağı ülken elder bolıp sanaladı. Eki körşi eldiñ tatulığı men ıntımağı, qarımqatınası jaqsı bolsa, Ortalıq Aziyadağı basqa memleketter de tınış boladı. Sondıqtan, Özbekstan biz üşin diplomatiyalıq baylanıs ornatuda mañızdı el retinde qaraldı. Oğan elşi etip tağayındauda meniñ diplomatiyalıq täjiribem jäne Taşkentte joğarı bilim alğanım eskerildi. Men Özbekstanda elşi bolıp jürgende, 1994 jılı qaraşada Qazaqstan Prezidenti N.Ä. Nazarbaev Özbekstan Respublikasına resmi saparmen keldi.  Taşkentte «Köksaray» rezidenciyasında QR Prezidenti Nwrswltan Nazarbaev pen ÖR Prezidenti Islam Kärimovtıñ arasında kelissözder ötti. Joğarı deñgeydegi kelissözderdiñ qorıtındısı boyınşa Qazaqstan men Özbekstan arasındağı sauda kelisimi jäne Özbekstannan tabiği gaz satıp alu turalı ekijaqtı qwjattarğa qol qoyıldı. Özbekstanmen aradağı sauda-sattıq mäselesinde bir pikirge kele almadıq. Biz Taşkentten SSSR kezinde arzan bağamen gaz satıp alatınbız. Olar Qazaqstanğa satatın gaz bağasın qımbattatıp, halıqaralıq narıqtağı bağanı swradı. Bağa tım joğarı bolğandıqtan, bizdiñ oğan qarjılay mümkindigimiz säykes kelmedi. Osınıñ saldarınan Oñtüstik Qazaqstan, Jambıl, Almatı oblıstarına Özbekstannan keletin gazdıñ mölşeri azayıp, jwrt otınğa ağaş kesip jağa bastadı. Almatı qalasınıñ key audandarında gaz toqtatılıp, qala twrğındarı qiınşılıq tarttı.

AVTOR: Eki el arasındağı bwrınnan kele jatqan problema –  Aral teñiziniñ tartılıp, teñiz aymağındağı jerlerdiñ twzdı sorğa aynaluı. Osı mäsele Taşkenttegi memleket basşılarınıñ kezdesuinde qaraldı ma?

S. B.: Bwrın dünie jüzinde kölemi jağınan 4 ülken su qoy masınıñ biri sanalatın Aral teñizi 1989 jılı suı tartıluı saldarınan ekige bölinip ketken. Teñizdiñ suı ötken ğasırdıñ 60-jıldarınan bastap azaya bastadı. Onıñ tartıluı Türikmenstan, Özbekstan jäne Qazaqstannıñ oñtüstik aymaqtarınıñ teñizge qwyatın Sırdariya men Amudariyanıñ suın egin şaruaşılıq maqsattarında bwrıp aluınan bastaldı. 1990 jıldardıñ basında teñiz aydınınıñ audanı 45%-dan astam kişireyip, sudıñ kölemi 65%-ğa kemidi, sudıñ twzdılığı 3 esege arttı. Tabiği orta sapasınıñ naşarlauına baylanıstı jergilikti halıqtıñ densaulığına ziyandı ekologiyalıq, äleumettik jağday qalıptastı. Halıqaralıq Araldı qwtqaru qorınıñ şeşimderin orındau maqsatında eki memleket basşısı Qaraqalpaq ASSR-niñ ortalığı Nökis qalasına arnayı bardı. Onda elşiliktiñ qatısuımen Aral teñiziniñ jağdayın sauıqtıru jäne eldi mekenderdiñ äleumettik, densaulıq saqtau şaraların qolğa alu turalı Kommyunikege qol qoyıldı. Aral teñizine qwyatın özenderdiñ su resurstarın birlese basqaruda şeşilmey jatqan mäseleler men äleumettik-ekonomikalıq, ekologiyalıq jağdaylardıñ uşığuı Ortalıq Aziya elderin bwl dağdarısqa qarsı küreste küş-jigerlerin biriktiruge müddeli etti. Kelissöz barısında Qazaqstan tarapı Özbekstanmen aradağı ekijaqtı qatınastardı joğarı bağalay otırıp, eki el arasında sayasi, sauda-ekonomikalıq, gumanitarlıq jäne basqa da salalarda özara tiimdi ıntımaqtastıqtı nığaytuğa kelisti. Elbasınıñ resmi saparı ekijaqtı qatınastardı jaña deñg eyge köteruge mümkindik berdi.

AVTOR: Özbekstanda ülken qazaq diasporası twradı. Ol jerdegi qandastarımız elge oraluı twrğısında Sizdiñ batıl qadamdarğa barıp, eleuli jwmıs jasağanıñızdı baspasöz betterinen oqığan edik. Wltı qazaq bolğanımen, Özbekstan azamatı bolıp ketken Qazaqstan Respublikası Eltañbasınıñ avtorı Jandarbek Mälibekovke sol uaqıtta Qazaqstan azamattığın berip, öz eline qaytuğa kömek jasadıñız. Sol kezde Özbekstandağı qandastarımızdıñ hal-jağdayı qalay eken?

S. B.: Jalpı, Özbekstanda 2 millionday qazaq bar edi. Sovet kezinde Özbekstan ükimeti olardıñ 150 mıñnan astamın bärimiz bir sovet halqı bolamız dep pasporttarına «özbek» etip jazdırıp jiberdi. Täuelsizdik alğan soñ wlttıq sayasattı jürgizu maqsatında Taşkent telearnaları arqılı aptasına üş ret beriletin qazaq tilindegi bağdarlama men radiodan beriletin qazaq tilindegi habardı qısqarttı. Nizami atındağı Orta Aziya pedagogika institutındağı qazaq toptarı qısqartıldı. Äkimşilik orındarında lauazımdı qızmette isteytin qazaqtardı ığıstıra bastadı. Osınıñ däleli retinde mına bir oqiğanı aytıp bereyin. Birde elşilikke bir özbek äyeli kelip, prokuraturada qızmet isteytin küyeuin para aluşı retinde jala jauıp, türmege qamap tastağanı, küyeuiniñ qazaq jäne üş balası bar ekenin ayttı. Özbek kelinşegi: «qandastarıñızdı jalğan jalamen türmege qamap tastap, özim üş balamen qañğıp jürmin, sizderdiñ namıstarıñız qayda?» – dep jıladı. Men Özbekstannıñ prokuraturasımen baylanısqa şığıp, sol qazaq jigitiniñ türmeden bosatıluına sebepker boldım. Qazaq tilindegi tele-radio habarların qaytadan qalpına keltiruge järdem berdim. Taşkent qalasında bwrınnan kele jatqan şoğırlanğan qazaq intelligenciyası bar. Olardıñ wrpaqtarı da sonda oqıdı, qızmet etti. Mäselen, Taşkenttegi Orta Aziya politehnikalıq institutınıñ rektorı, tehnika ğılımdarınıñ doktorı Niyazov, Socialistik Eñbek Eri Qınabek Ükibaev, Özbekstan Kompartiyası Ortalıq Komitetinde Serik Qarabaev, Respublika prezident kömekşisi Artıqbay Qınabekwlı jäne basqa mädeniet, ğılım, jazuşı qayratkerleri boldı. Osınday ziyalı qauımnıñ ökilderin jwmıldırıp «Halıqaralıq qazaq tili qoğamınıñ» filialın aştıq. Büginde Taşkentte qazaq tilinde Respublikalıq «Nwrlı jol» gazeti şığıp twradı. Osı orayda, Qazaqstan Respublikası Eltañbasınıñ avtorı Jandarbek Mälibekov turalı aytıp bereyin. Ol Qızılorda oblısında düniege kelgen. Taşkenttegi Orta Aziya politehnikalıq institutın öte üzdik bitirip, sol jerde qızmette qalğan. Özbekterdiñ bir wtımdı sayasatı – basqa wlttıñ talanttı adamdarın özine tartıp, siñirip, jwmıs istete biledi. Jäkeñ Taşkentte arhitektura salasında jemisti qızmet etip, arhitektura şeberhanasın basqardı. Men qazaq ziyalı qauım ökilderimen tığız baylanısta boldım. Diplomatiyanıñ eki el arasındağı qwzırına sayasat, ekonomika, sauda baylanıstarımen qosa şeteldegi qazaq diasporasına järdem beru de kiredi.

AVTOR:  Saylau ağanıñ ömir jolın, onıñ eñbegin zerdelegen avtor retinde aytarım, Säkeñ talay ret Baukeñniñ wlt namısı, ana tili, el üşin qajırlı küresin qaytaladı jäne ol kisini twlğa retinde biikten köre almaytın mäñgürtterden talay qısım da kördi. Bwl turalı mısaldar öte köp. Sonıñ bireuin keltire keteyin. Taşkentte Elşi bolıp jürgende Qazaqstannıñ Eltañbasın Özbekstannıñ azamatı Jandarbek Mälibekov jasap berdi dep özbekter ünemi jariya etip jürdi. Diplomattar arasında «Eltañbañızdı jasauğa Respublikada bir qazaq tabılmadı ma?» dep keyipkerimizge talay ret «äñgime» aytqandar da boldı. Sonda Säkeñ QR «Azamattıq turalı» Zañına säykes, öz şeşimimen oğan Qazaqstan azamattığın beredi. Oğan negiz bolğan J. Mälibekovtiñ Qızılorda oblısında tuılğanı, wltınıñ qazaq ekeni. Ol Taşkenttegi politehnikalıq institutında oqıp, sonda qızmette qalıp qoyğan. «Qazaqstan Respublikasınıñ azamatı» degen pasportına öz qolımen ştamp basıp, Elşiniñ mörin salıp, qol qoyğan osı Säkeñ bolatın. Söytip, onıñ öz otanına keluine tikeley sebepker bolğan qaysar diplomat. Bwl is-äreketke Özbekstan Respublikasınıñ sırtqı ister ministrligi elşige narazılıq bildirgen. Sonımen qatar, öz otandastarı tarapınan da qırın qarağandar tabıldı. Ayta berseñiz, QR sırtqı ister ministrliginiñ basşısı «Zaçem naruşaeş' zakon o grajdanstve Kazahstana, sağan şettegi qazaqtardıñ ne keregi bar?» – dep eskertu jasaydı. Säkeñniñ aytuımen, täuelsiz Qazaqstannıñ Gimni, Tuı jäne Eltañbasınıñ avtorları özimizdiñ azamattar boluı tiis. Sondıqtan da men «Qazaqstan Respublikasınıñ azamattığı turalı» 1991 jılğı 20 jeltoqsandağı Zañına säykes Eltañbanıñ avtorı J. Mälibekovti Qazaqstannıñ azamattığına qabıldau turalı şeşim qabıldadım. Joğarıda aytılğan zañda «Qazaqstanda tuıp-ösken azamattar basqa respublikalarda qızmet istep jürse, şetelde oqudağı studentter jäne äskeri borışın atqarıp jürgen adamdar Qazaqstan azamattığın aluğa tolıq qwqılı» dep jazılğan. Şeteldegi Qazaqstan elşilerine mwnday şeşim qabıldau qwqığı berilgen. Men Eltañba avtorı Mälibekovpen jüzdeskende, ol kisi bılay dedi:

– Säkeñniñ eñbegi, batıldığı arqasında men Qazaqstan azamattığın alıp elge oraldım. Osınday wltşıl twlğa bolmasa, Özbekstanda qaluım mümkin edi.

Al büginde jwrtşılıq Respublika Eltañbasın jasağan qazaq azamatı öz eline kelip, Astanadağı Euraziya wlttıq universitetinde jemisti eñbek etip jatqanın maqtanış etedi.

S. B.: Memlekettik egemendik turalı deklarac iyanıñ  12-tarmağında «Qazaqstan Respublikası Respublikadan tıs jerlerde twratın qazaqtardıñ wlttıq-mädeni, ruhani jäne til jönindegi qajetin qanağattandıruğa qamqorlıq jasaydı» dep jazılğan. Tura osınday qağidat «Qazaqstan Respublikasınıñ memlekettik täuelsizdigi turalı» Zañınıñ  2-tarauı 8-babında körsetilgen. Ökinişke qaray, Deklaraciya qabıldanğan kün 25-qazan «Respublika küni» dep atalatın resmi mereke tiziminen keyin alınıp tastalıp, Deklaraciyanıñ biraz baptarı eskerusiz qaldı. Sol qwjatta «Biz Qazaqstannıñ Memlekettik egemendigi turalı Deklaraciyasın qazaq wltınıñ damuı üşin qabıldaymız» dep jazılğan. Al qazirgi 1995 jılı qabıldanğan Konstituciyada «qazaq halqı», «qazaq wltı», «qazaq jeri», «qazaq memleketi» degen sözder alınıp tastalğan. Bwl sözderdi Konstituciyağa qayta kirgizu kerek. Sebebi Konstituciyanıñ özi «Memlekettik egemendik turalı deklaraciyanı» negizge aluı tiis edi. 1995 jılı 1 qañtarda Qazaqstan Respublikasınıñ pasportın keş engizdik. Oğan deyin Sovet Odağınıñ pasportımen jürgen bolatınbız. YAğni, üş jıl boyı älemde joq memlekettiñ pasportın paydalandıq. Men öz memleketimizdiñ pasportın tezirek şığaru kerek dep wsınıs bildirgenimmen, ükimet qarjı joq dep, pasport şığarudı sozıp jiberdi.

AVTOR: Özbekstannıñ Memlekettik sıylığınıñ laureatı, suretşi jäne müsinşi Äbdimälik Bwqarbaev turalı äñgime aytılğanda diplomat ağamız meni öz üyindegi jwmıs kabinetine ertip apardı. Onda ataqtı suretşiniñ qazaqtıñ äygili hanswltandarı, bi-şeşenderi, Alaş arıstarı, elbasımız N. Nazarbaevtıñ, büginde elge qızmet etip jürgen memleket jäne qoğam qayratkerleriniñ baspadan şıqqan portretterin körsetti. Äbdimäliktiñ öz qolımen salğan Saylau ağamızdıñ portreti bar eken. Adamnıñ işki jan-düniesi men ruhani kelbetin, sırtqı bet-pişinin de anıq körsetipti. Bayqağanımız, öner iesi bizdiñ keyipkerimizdiñ özine tän bolmısın bwljıtpay beynelepti. Bwlar jeke darın, halıqtıñ birtuar twlğalarınıñ biik beynesin anıq körsetken jädigerler, qwndı suretter. Qazir osı portretter mektepter men universitetter jäne ministrlikter ğimaratında iluli twr. Bügingi wrpaqtı ötken zamandağı tarihi twlğalarımen qayta bettestirgen, solardıñ tarih qoynauındağı bet-beynesin elimen qauıştırğan Äbdimälik Bwqarbaevtıñ önerine bas imey twra almaysız. Diplomatiyalıq qızmetin paydalanıp, ol Taşkenttegi biraz qazaq ziyalıların, sonıñ işinde talanttı suretşi jäne ataqtı arhitektordıñ Qazaqstan azamattığın aluına küş saladı. 1993 jılğı 25 qazan – Memlekettik egemendik Deklaraciyası qabıldanğan mereke künine oraylastırıp, osı eki kisige jäne basqa qazaqtarğa saltanattı türde öz qolı qoyılğan, Qazaqstan Respublikasınıñ azamatı degen gerbi bar mörin basıp, pasporttarın tabıstaydı. Söytip, basqa respublikanıñ örkendeuine qızmet etip jürgen talanttı azamattar öz otanına qaytadı. Onıñ aldınan bilim alğan talay şäkirtter, elimizdiñ tükpir-tükpirinde eñbek etip jür. Al Äbdimälik Bwqarbaev Almatı qalası mañındağı Rayımbek auılında twradı, jasınıñ wlğayğanına qaramastan, öziniñ jeke studiyasında elimizdiñ öner salasına ülesin qosuda. Osınday talanttı azamattardı izdep, olardı öz otanına qaytaruğa barın salğan elşi, wlt qamqorşısınıñ da dañqı arta tüseri sözsiz. Mwnday otanşıldıq äreketti şet memleketterdegi elşiler jasamadı. Mäskeude twratın qanşama belgili qayratkerler, bwrın joğarı qızmette bolğan qazaqtar sonda qalıp qaldı. Sebebi Mäskeudegi elşilik olarğa Qazaqstannıñ azamattığın bermedi. Kezinde N.S. Hruşev tağayındağan Qazaqstan Kompartiyası Ortalıq Komitetine I. YUsupov basşı bolıp twrğanda, oñtüstiktegi Jetisay, Maqtaaral jäne Kirov audandarın Özbekstanğa berip jibergen. Alayda tügel qazaqtar twratın öñirlerge özbekter basşılıqqa kelip, öz ıqpaldarın jürgize bas tağan soñ, halıq narazılıq bildirip, Almatığa jäne Mäskeuge arız jazıp, atalğan audandardı Qazaqstanğa qaytarudı swra ğan. Keyin L.I. Brejnev bilikke kelgende, osı 3 audandı Qazaqstanğa qaytarıp berdi. Alayda Özbekstan üş audannıñ jerin tolıq qaytarmay biraz şaruaşılıqtar qalıp qoydı. Al Siz elşi bolıp barğanda, Özbekstan men Qazaqstan arasındağı sayasi qatınas qalay boldı? Qazaqtarğa azamattıq berip, öz otanına qaytarğanızğa Özbekstan ükimeti narazılıq bildirgen joq pa?

S. B.: Eki el arasındağı qatınas bir qalıpqa tüse qoymağan edi. Sebebi, azamattıq mäselesi, şekara, onıñ mañındağı eldi me kenderdi ayqındau kezinde de ortaq şeşimge kele almay, talastartıs orın aldı. Osı problemalarmen şw ğıldanuğa tura keldi. Qandastarımızğa Qazaqstan pasportın alıp bergenim üşin özbek biliginiñ nazarına ilindim. Bauırlarımızğa eldiñ jağ dayı jaqsı, jeri bay, bolaşağınıñ bar ekenin aytıp jüretinm in. Sol arqılı talay adamdarğa jaqsı oy-pikir qalıptastırdım. Bir küni özin institutta jwmıs isteymin dep tanıstırğan qazaq azamatı elşilikke kelip, Qazaqstanğa köşkisi kelip jür genin aytıp, aqıl-keñes swradı. Men oğan köşudiñ zañdı twrğıdağı tärtibin tüsindirdim. Özbekstan bizge tuısqan el, biraq tübinde wrpaqtıñ bolaşağı üşin Qazaqstanğa qaytqanı dwrıs ekenin ayttım. Keyin anıqtasam älgi jigit Özbekstan Qauipsizdik komitetiniñ qızmetkeri eken. Suretşi Äbdimälik Bwqarbaev olar üşin taptırmas öner adamı ekeni dausız. Ol kisi tek suretşi emes, dizayner, mozayka jasaudıñ şeberi. Taşkenttegi üş ayaqtı televiziya mwnarasınıñ barlıq mozaykası Äbdimälik Äbdiqadırwlınıñ qolınan şıqqan. Ündistan elşiliginiñ, köp zäulimdi ğimarattardı bezendiru isterin atqardı. Özi ğana emes eki balası da äkesiniñ jolın quğan şeber eken. Onıñ Özbekstannan ketui de oñay bola qoyğan joq. Suretşiniñ öner tuındıları şekaradan tek Mädeniet ministrliginiñ rwqsatımen ötkiziledi. Sebebi ol eñbekterdiñ iesi, avtorı Äbekeñ bolğanımen, memlekettik qwndı şığarmalar ükimettiñ qamqorlığında boladı. Ärbir tuındı sol eldiñ qwndı mädeni qorı bolıp sanaladı. Sondıqtan suretşi jasağan dünielerin Almatıda jäne oblıs ortalıqtarında körme ötkizgen soñ, barlıq suretterin Qazaqstanda qaldırıp otırdı. Söytip, Özbekstandağı ataqtı suretşi Oral Tañsıqbaevtan keyin öz tuğan eline oralğan Äbdimälik boldı. Talanttı qazaq intelligenciya ökilderi jäne öner talanttarınıñ ketip jatqanı turalı Özbek Respublikasınıñ elşiligi bizdiñ Sırtqı ister ministrligine narazılıq bildirip, nota jiberipti. Sizderdiñ elşiñiz Taşkenttegi qazaqtardıñ ziyalı qauımın elderine qaytuğa ügittep jür, – dep şağım jasağan. Sırtqı ister ministri T. Süleymenov telefon şalıp, «qazaqtardı nege elge qaytuğa ügittep, jwmıs jasap jürs iñ», – dedi. Oğan «Diplomatiya qızmeti turalı» zañ ayasında Otanına qaytamın degen adamdarğa kömek körsetu elşiliktiñ bir mindeti ekenin ayttım. Osı arada bügingi şeteldegi elşilikterge baylanıstı jağday turalı da ayta ketu kerek. Qazir biraz elşilikterimiz sol jerdegi qazaqtardıñ ötinişteri jäne köşiqon jwmısına qatıstı mäselelerine nazar audara bermeydi. Kelgen ağayındardı äure-sarsañğa saladı. Tipti, Qıtaydıñ Şıñjañ ölkesindegi qandastarımız Qazaqstanğa kelip qaytuğa viza alu üşin aylap kezekte twradı. Özbekstanda qızmet etken kezimde elşiliktiñ esigi ärdayım aşıq boldı. Qolımnan kelgenşe kömek körsetip, jön siltedim, şaruaların bitirip berdim. Al menen keyin Özbekstanğa kelgen elşi qandastarımızdı elşilikke kirgizbeydi eken.

AVTOR: Bar qazaqtı bir tudıñ astına, Atamekendegi qara şañıraqtıñ astına jinau keşegi babalardan qalğan arman. Qazaqstan täuelsizdik alıp, öz erkindigi qolına tigen kezde keşegi ata-baba armanın Säkeñ jalğastıruğa wmtıldı. Azattıqqa qolı jetken soñ, älemdegi qazaqtı elge şaqırğan Prezident N. Nazarbaevtıñ sayasatına ün qostı. Elge belgili twlğalardıñ öz otanına oraluına septigin tigizgeni tarihtıñ parağında jazılıp qaları anıq, jazılıp ta jatır. Qazirgi tañda şeteldegi elşilikter öz qızmetin qalay atqarıp jür? Keyde özge elde jürgen qazaqtarğa kömek körsete almay jatatın jağdaylar kezdesedi. Oğan mısal, bir wyğır saudageri Qazaqstan azamatşasına Qıtaydan kökönis, jemis jibergen. Ol jolda bwzılıp ketedi. Tauar aluşı qazaq äyeli Ürimjige kelgende, onıñ bar qwjattarın esepke almay, sottap jiberedi. Sonda osındağı pasport-viza bölim konsuldığı järdem körsetpegen. Bizdiñ memleket twrğısınan şetelde qiındıqqa wşırağan azamattarğa kömek körsetu mäselesi zañdı jäne qarjılıq negizde qarastırılmağan eken. Biraq Ürimjide biraz jıl qwl esebinde ömir sürgen qazaq äyeliniñ jağdayı qılmıstıq iske jatpaytın. Bwl oqiğa sol uaqıtta Qıtaydağı diplomattardıñ wlttıq seziminiñ tömendigin körsetedi. Abıroy bolğanda atalğan jağday Qıtayğa Nwrlan Ermekbaev jaña elşi bolıp barğan twsta oñ şeşimin tabadı. Şıñjañda jürgen qazaq äyeline janaşır adamdar tauıp, aqşa jinap, onı eline qaytarıp, anasımen qauıştıradı. Onıñ mwnday azamattıq isine alğısımız şeksiz. Bwl jağdaydı elşimiz Saylau ağağa özi aytıp bergen. Bizdiñ keyipkerimizdi Özbekstanda elşi qızmetin atqarıp jürgen kezinde Qazaqstannıñ Türikmenstandağı Tötenşe jäne Ökiletti Elşisi etip jibermekşi bolğan. 1994 jılı eki memleket arasındağı diplomatiyalıq baylanıs jolğa qoyılmağan edi. Türikmenstan üş ay boyı Sırtqı ister ministrligi jibergen Elşi tağayındau turalı notağa jauap bermeydi. Diplomatiya tilinde mwnı «agreman» deydi. Ol elşige sol elde qızmet atqaruğa kelisim beru. Aşhabadtıñ agreman bermeuiniñ sebebi S. Batırşa-wlınıñ jeke basına qatıstı emes edi. Türkimen Prezidenti S. Niyazov Euraziya odağın qwru turalı Qazaqstannıñ wstanımımen kelispeytin. Sol sebepti ol memlekettiñ elşisin de qabıldamaymız degendi añdatsa kerek. Odan keyin de elşilik aşuına köp jıldar boyı rwqsat bermegen. Söytip, keyipkerimiz Almatığa oralıp, sırtqı ister ministriniñ keñesşisi boladı. Biraz uaqıt ötken soñ, Egipet Arab Respublikasındağı diplomatiyalıq qızmetke tağayındaldı.

Diplomat, qoğam qayratkeri Saylau Batırşa-wlınıñ ömiri men qızmet jolına arnalğan "Täuelsizdik jolındağı diplomatiya" kitabınan.

Avtor: Mwrat Almasbekwlı

«The Qazaq Times»