Özbektiñ toy saltı. Foto: UMIDA AHMEDOVA

Özbekstan parlamenti üylenu toyın, merekelik şaralar jäne jerleu räsimderin retke keltiretin zañ jobasın bekitti. Bwl zañ jobasında as pen toyda şaqırılatın adam sanına, ötkizilgen jäne as pen toy üşin kredit aluğa şekteu qoyılğan.

Jaña erejege say, Özbekstandağı barlıq toy salttarı keşki 18:00 men 23:00 arasında ötkizilui kerek. Jerleu jäne aza twtu salttarı eñ wzaq bolğanda üş künge deyin jalğasuı kerek. Bwğan qosa, saltanattı dastarhandarğa şaqırılğan qonaqtardıñ sanı 200-den aspauı kerek. Al, üylenu toyınıñ qonaqtarı 250-men şekteledi. Al, jerleu saltına jiılğan adamdardıñ sanına şekteu qoyılmaydı.

Özbek eliniñ jaña zañında, Üylenu toyındağı saltanattı kortejdegi kölikterdiñ sanı üşten aspauı kerek jäne üylenu toyınıñ bolatını turalı jergilikti özin-özi basqaru organdarına habarlanuı tiis. Bwğan qosa as pen toy üşin kredit aluğa qatañ tıyım salınğan.

Özbekstan qabıldağan zañda tağı da: «Wlttıq salt-dästürge say kelmeytin, şığını köp ırım-jırımdarğa da jol berilmeydi», – dep jazılğan. Bwl boyınşa, «Küyeu köru», «Qwda şaqıru», «Kelin şaqıru» sekildi tolıp jatqan şığını mol ırım-jırımdarğa şekteu qoyılğan. Ölim jöneltu salttarına da osınday şekteuler qoyılğan, özbek zañı boyınşa «jetisi», «qırqı», «jıldığı», «jırtısı» degen ırımdarğa tıyım salındı.

Zañ jobası talqılanğan kezde, özbek deputattarı el azamattarınıñ bäsekege salınıp, qarızdanıp, şığındalıp toy-tomalaq ötkizip soñında qarızğa batu ürdisiniñ artqanın köbirek alğa tartqan. Äri, keybir ırım-jırımdar özbektiñ salt-dästürine de jatpaytının atadı. Toy-tomalaq ötkizu üşin qarızğa batqandardıñ, otbasın tastap aqşa tabu üşin şetelge ketkenderden de mısaldar qayırıldı. Ne kerek, özbek Parlamentti osınday jaña zañ qabıldap, eldiñ «assa-tök» sırapşıldığın şektemek.

Eñ mañızdısı, zañ jobasınıñ qanşalıqtı atqarıluında. Qazirşe, zañnıñ qatañ atqarıluına jergilikti qwqıq qorğau organdarı baqılau jürgizedi. Keybir pikirlerge nazar audarar bolsaq, «şaş al dese bas alatın» özbekstandıq qwqıq qorğau salası atalğan zañ jobasın asıra paydalanuı da mümkin deydi.

“The Qazaq Times”