El prezidenti Toqaev QKP basşılarınıñ biri YAn Czeçimen kezdesude. 11 qırküyek 2019 jıl. Beyjiñ, QHR. Foto: Aqorda

Qazaqstan prezidenti Qasım-Jomart Toqaevtıñ qoğam narazılığın tudırğan Qıtay eline eki kündik resmi is-saparı bastaldı. Alğaşqı kezdesu şarası QKP OK Sayasi byurosınıñ müşesi, QKP Sırtqı ister jönindegi basqaruşı top Keñsesiniñ basşısı YAn Czeçimen ötti.

Memleket basşısı Toqaev kezdesu barısında Qıtay Halıq Respublikasınıñ ökili YAn Czeçi mırzanı bwrınnan biletinin, onıñ QKP sırtqı ister ministri lauazımındağı tabıstı qızmetimen bwğan deyin de jiti tanıs ekenin atap ötti. Prezident bwl sapardıñ Qazaqstan üşin öte mañızdı ekenin de aytqan.

– Biz Qıtaydı körşiles äri dostıq qarım-qatınastağı memleket dep esepteymiz. Sonday-aq, älemdegi ekonomikası damığan ekinşi el ekenin de negizge alamız.  Qazaqstan bwl saparğa ülken män beredi. Biz Qazaqstannıñ Aziyadağı is-qimıl jäne özara senim şaraları jönindegi keñes pen halıqaralıq arenadağı basqa da bastamaların qoldağanı üşin Qıtay memleketine rizaşılıq bildiremiz. Ekonomikalıq ıntımaqtastıqqa keler bolsaq, onıñ strategiyalıq sipatı bar. Twñğış prezidentimiz Nwrswltan Nazarbaev pen törağa Şi Jiñpiñ qol jetkizgen uağdalastıqtar odan äri dami beredi, – dedi Qazaqstan prezidenti.

YAn Czeçi de maqtau-qwrmetten kende qalmay Qasım-Jomart Toqaevtı biılğı mausımda Qazaqstan Prezidenti lauazımına saylanuımen qwttıqtadı. Onıñ aytuınşa, «saylaudağı jeñis – Qazaqstan halqınıñ joğarı seniminiñ körsetkişi». Czeçi Qazaqstan basşısınıñ bwl saparın eki el arasındağı jan-jaqtı strategiyalıq seriktestikke tıñ serpin beredi dep bağaladı.

Qırküyektiñ 9-ı küni Toqaev Qıtaydıñ ortalıq memlekettik telearnasına (CCTV) bergen swhbatında Beyjiñmen «jan-jaqtı strategiyalıq äriptestikti nığaytu» Qazaqstan üşin «asa mañızdı» mindet ekenin aytqan bolatın.

Esteriñizge sala ketsek, aydıñ basınan beri el aumağında qıtaylıq «55 jobanıñ Qazaqstanda jüzege asuına, «Qıtay ekspansiyasına» qarsılıq akciyaları köbeyip keledi.  Onnan astam qala men audan-oblıstardı qamtığan narazılıqtarda belsendiler tarapınan «Qıtaymen qarım-qatınastı şekteu», «Toqaevtıñ is-sapardan bas tartuın», «Qazaqstanda salınatın qıtaylıq 55 jobanıñ toqtatıluın», «Qıtaydan qarız-nesie almauın» talap etken bolatın.

El prezidenti Toqaev QKP basşılarınıñ biri YAn Czeçimen, ekijaqtı delegattardıñ kezdesui. 11 qırküyek 2019 jıl. Beyjiñ, QHR. Foto: Aqorda

Qazaqstan basşısı Toqaev Qıtayğa resmi saparmen bardı. 10 qırküyek 2019 jıl. Foto: Berik Uäli

Toqaev Qıtaydıñ CCTV telearnasına QHR-nıñ 70 jıldıq mereytoyımen qwttıqtap qazaqşa jäne qıtay tilinde swhbat berude. 9 qırküyek 2019 jıl. Foto: Berik Uäli

 

"The Qazaq Times"