قازاقستان پرەزيدەنتى قاسىم-جومارت توقاەۆتىڭ قوعام نارازىلىعىن تۋدىرعان قىتاي ەلىنە ەكى كۇندىك رەسمي ءىس-ساپارى باستالدى. العاشقى كەزدەسۋ شاراسى قكپ وك ساياسي بيۋروسىنىڭ مۇشەسى، قكپ سىرتقى ىستەر جونىندەگى باسقارۋشى توپ كەڭسەسىنىڭ باسشىسى يان تسزەچيمەن ءوتتى.
مەملەكەت باسشىسى توقاەۆ كەزدەسۋ بارىسىندا قىتاي حالىق رەسپۋبليكاسىنىڭ وكىلى يان تسزەچي مىرزانى بۇرىننان بىلەتىنىن، ونىڭ قكپ سىرتقى ىستەر ءمينيسترى لاۋازىمىنداعى تابىستى قىزمەتىمەن بۇعان دەيىن دە ءجىتى تانىس ەكەنىن اتاپ ءوتتى. پرەزيدەنت بۇل ساپاردىڭ قازاقستان ءۇشىن وتە ماڭىزدى ەكەنىن دە ايتقان.
– ءبىز قىتايدى كورشىلەس ءارى دوستىق قارىم-قاتىناستاعى مەملەكەت دەپ ەسەپتەيمىز. سونداي-اق، الەمدەگى ەكونوميكاسى دامىعان ەكىنشى ەل ەكەنىن دە نەگىزگە الامىز. قازاقستان بۇل ساپارعا ۇلكەن ءمان بەرەدى. ءبىز قازاقستاننىڭ ازياداعى ءىس-قيمىل جانە ءوزارا سەنىم شارالارى جونىندەگى كەڭەس پەن حالىقارالىق ارەناداعى باسقا دا باستامالارىن قولداعانى ءۇشىن قىتاي مەملەكەتىنە ريزاشىلىق بىلدىرەمىز. ەكونوميكالىق ىنتىماقتاستىققا كەلەر بولساق، ونىڭ ستراتەگيالىق سيپاتى بار. تۇڭعىش پرەزيدەنتىمىز نۇرسۇلتان نازارباەۆ پەن توراعا شي جيڭپيڭ قول جەتكىزگەن ۋاعدالاستىقتار ودان ءارى دامي بەرەدى، – دەدى قازاقستان پرەزيدەنتى.
يان تسزەچي دە ماقتاۋ-قۇرمەتتەن كەندە قالماي قاسىم-جومارت توقاەۆتى بيىلعى ماۋسىمدا قازاقستان پرەزيدەنتى لاۋازىمىنا سايلانۋىمەن قۇتتىقتادى. ونىڭ ايتۋىنشا، «سايلاۋداعى جەڭىس – قازاقستان حالقىنىڭ جوعارى سەنىمىنىڭ كورسەتكىشى». تسزەچي قازاقستان باسشىسىنىڭ بۇل ساپارىن ەكى ەل اراسىنداعى جان-جاقتى ستراتەگيالىق سەرىكتەستىككە تىڭ سەرپىن بەرەدى دەپ باعالادى.
قىركۇيەكتىڭ 9-ى كۇنى توقاەۆ قىتايدىڭ ورتالىق مەملەكەتتىك تەلەارناسىنا (CCTV) بەرگەن سۇحباتىندا بەيجىڭمەن «جان-جاقتى ستراتەگيالىق ارىپتەستىكتى نىعايتۋ» قازاقستان ءۇشىن «اسا ماڭىزدى» مىندەت ەكەنىن ايتقان بولاتىن.
ەستەرىڭىزگە سالا كەتسەك، ايدىڭ باسىنان بەرى ەل اۋماعىندا قىتايلىق «55 جوبانىڭ قازاقستاندا جۇزەگە اسۋىنا، «قىتاي ەكسپانسياسىنا» قارسىلىق اكتسيالارى كوبەيىپ كەلەدى. وننان استام قالا مەن اۋدان-وبلىستاردى قامتىعان نارازىلىقتاردا بەلسەندىلەر تاراپىنان «قىتايمەن قارىم-قاتىناستى شەكتەۋ»، «توقاەۆتىڭ ءىس-ساپاردان باس تارتۋىن»، «قازاقستاندا سالىناتىن قىتايلىق 55 جوبانىڭ توقتاتىلۋىن»، «قىتايدان قارىز-نەسيە الماۋىن» تالاپ ەتكەن بولاتىن.
ەل پرەزيدەنتى توقاەۆ قكپ باسشىلارىنىڭ ءبىرى يان تسزەچيمەن، ەكىجاقتى دەلەگاتتاردىڭ كەزدەسۋى. 11 قىركۇيەك 2019 جىل. بەيجىڭ، قحر. فوتو: اقوردا
قازاقستان باسشىسى توقاەۆ قىتايعا رەسمي ساپارمەن باردى. 10 قىركۇيەك 2019 جىل. فوتو: بەرىك ءۋالي
توقاەۆ قىتايدىڭ CCTV تەلەارناسىنا قحر-نىڭ 70 جىلدىق مەرەيتويىمەن قۇتتىقتاپ قازاقشا جانە قىتاي تىلىندە سۇحبات بەرۋدە. 9 قىركۇيەك 2019 جىل. فوتو: بەرىك ءۋالي
الماتى وبل پركۋراتۋراسى. بەلسەندىلەر: «جالعان جالامەن قاماۋداعى ايگەرىم مەن دۋمانعا بوستاندىق!»
ارمان الىمبەكوۆ: مەن ول جەردىڭ رەزيدەنتسيا ەكەنىن بىلمەدىم. ەشنارسە بۇلدىرمەدىم.
قوساي ماحامباەۆ: وق تيگەن ادامدى قۇتقارام دەگەندە ءوزىمدى اتىپ تاستادى
رەزيدەنتسيا ءىسى. ورىنعازى سەرىكبول: بەيبىت شەرۋگە شىقتىم. ال، 269 باپتى مويىندامايمىن
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى