Toqaev Arıs oqiğasındağı evakuaciyalau barısın qalay bağaladı?

Toqaevtıñ Arıs oqiğasında közge tüsken birqatar azamattardı marapttau kezinde «twtas bir qalanıñ twrğındarın bar-joğı eki sağat işinde qwtqarğanı» turalı aytqan sözi sınğa ilikti.

Osıdan 75 kün bwrın, mausımnıñ 24-i küni tañerteñ Arıs qalasındağı äskeri oq-däri qoymasında ört şığıp, artınşa auqımdı jarılıs bolğan edi.

Jañbırşa jauğan snaryadtardan şoşınğan jwrt jalañ ayaq, künniñ ıstığında bosıp, toğız joldıñ torabında ornalasqan qala qañırap qaldı.  Resmi derek boyınşa, 45 mıñğa juıq twrğını bar Arıs halqınıñ 39 mıñday adamı jansauğalap öz betinşe qalanı tastap şıqqan. Tek üş mıñnan astam azamat Türkistan oblısı äkimdigi wsınğan avtobustarmen Şımkentke evakuaciyalanğan.

Jarılıs saldarınan 4 kisi köz jwmıp, 160-tan astam adam zardap şekken.

Aqordanıñ habarlauınşa, bügin el prezidenti Toqaev bütin jwrttı alañdatqan qayğılı Arıstağı oqiğada «erlik pen janqiyarlıq körsetken jäne mindetin adal atqarğan bir top azamattı memlekettik nagradamen marapattadı».

Prezident nagradalardı saltanattı räsim barısında tabıstadı. Ol öz alğı sözinde arıstıqtarğa qol wşın sozğan halıqtıñ birlik-ıntımağı, orın alğan oqiğanıñ mäni turalı söz etti.

Memleket basşısınıñ aytuınşa, «qiındıqqa qaramay twtas bir qalanıñ twrğındarın qauipsiz jerge köşiru nağız erlik boldı».

– Bwl bar-joğı eki sağattıñ işinde jüzege astı. Bizdiñ tarihımızda bwnday jağday bolğan emes. Qalanı köşiru turalı der kezinde şeşim qabıldaudıñ arqasında qauip-qaterdiñ aldın aldıq. Qarapayım eñbek adamdarı sın sağatta sabır saqtap, eren erliktiñ ülgisin körsetti, – degen Qazaqstan prezidentiniñ uäji köptiñ köñilin küpti etti.

Bwdan  bilik  halıqtıñ özin-özi evakuaciyalağanın köre twra, bile twra  öz eñbegi retinde tanıtqısı kele me degen oy tuadı. Rasında da halıqtıñ bosıp, beti auğan jaqqa qaşıp, qır töbesi-kün astında tüs auğanşa otırğanın elegisi kelmey me?

Halıq der kezinde jüyeli is-qimıl negizinde qauipsiz orındarğa köşirilmegendikten eki kün boyı köz jazıp qalğan bala-şağa, tuıs-jaqındarın jariyalı türde izdestiruge mäjbür boldı. Arıstıqtardıñ aytuı boyınşa, soñğı on jılda kisi şığınımen ayaqtalğan 4 jarılıstan keyin de jalpıhalıqtıq ya mekeme köleminde birde-bir evakuaciyalıq dayındıq-jattığu jwmıstarı jürgizilmegen.

Toqaev öz Jarlığımen Arıstağı oqiğasında közge tüsken bir top azamattı memlekettik nagradamen marapattau şarasında. Astana. 6 qırküyek 2019 jıl. Foto: baq.kz/B.Juasbaev

Arıstağı jarılıs kezinde qalanı tastap qaşqan twrğındar. 24 mausım 2019 jıl. Foto: aşıq derekköz

"The Qazaq Times"