توقاەۆتىڭ ارىس وقيعاسىندا كوزگە تۇسكەن بىرقاتار ازاماتتاردى ماراپتتاۋ كەزىندە «تۇتاس ءبىر قالانىڭ تۇرعىندارىن بار-جوعى ەكى ساعات ىشىندە قۇتقارعانى» تۋرالى ايتقان ءسوزى سىنعا ىلىكتى.
وسىدان 75 كۇن بۇرىن، ماۋسىمنىڭ 24-ءى كۇنى تاڭەرتەڭ ارىس قالاسىنداعى اسكەري وق-ءدارى قويماسىندا ءورت شىعىپ، ارتىنشا اۋقىمدى جارىلىس بولعان ەدى.
جاڭبىرشا جاۋعان سناريادتاردان شوشىنعان جۇرت جالاڭ اياق، كۇننىڭ ىستىعىندا بوسىپ، توعىز جولدىڭ تورابىندا ورنالاسقان قالا قاڭىراپ قالدى. رەسمي دەرەك بويىنشا، 45 مىڭعا جۋىق تۇرعىنى بار ارىس حالقىنىڭ 39 مىڭداي ادامى جانساۋعالاپ ءوز بەتىنشە قالانى تاستاپ شىققان. تەك ءۇش مىڭنان استام ازامات تۇركىستان وبلىسى اكىمدىگى ۇسىنعان اۆتوبۋستارمەن شىمكەنتكە ەۆاكۋاتسيالانعان.
جارىلىس سالدارىنان 4 كىسى كوز جۇمىپ، 160-تان استام ادام زارداپ شەككەن.
اقوردانىڭ حابارلاۋىنشا، بۇگىن ەل پرەزيدەنتى توقاەۆ ءبۇتىن جۇرتتى الاڭداتقان قايعىلى ارىستاعى وقيعادا «ەرلىك پەن جانقيارلىق كورسەتكەن جانە مىندەتىن ادال اتقارعان ءبىر توپ ازاماتتى مەملەكەتتىك ناگرادامەن ماراپاتتادى».
پرەزيدەنت ناگرادالاردى سالتاناتتى ءراسىم بارىسىندا تابىستادى. ول ءوز العى سوزىندە ارىستىقتارعا قول ۇشىن سوزعان حالىقتىڭ بىرلىك-ىنتىماعى، ورىن العان وقيعانىڭ ءمانى تۋرالى ءسوز ەتتى.
مەملەكەت باسشىسىنىڭ ايتۋىنشا، «قيىندىققا قاراماي تۇتاس ءبىر قالانىڭ تۇرعىندارىن قاۋىپسىز جەرگە كوشىرۋ ناعىز ەرلىك بولدى».
– بۇل بار-جوعى ەكى ساعاتتىڭ ىشىندە جۇزەگە استى. ءبىزدىڭ تاريحىمىزدا بۇنداي جاعداي بولعان ەمەس. قالانى كوشىرۋ تۋرالى دەر كەزىندە شەشىم قابىلداۋدىڭ ارقاسىندا قاۋىپ-قاتەردىڭ الدىن الدىق. قاراپايىم ەڭبەك ادامدارى سىن ساعاتتا سابىر ساقتاپ، ەرەن ەرلىكتىڭ ۇلگىسىن كورسەتتى, – دەگەن قازاقستان پرەزيدەنتىنىڭ ءۋاجى كوپتىڭ كوڭىلىن كۇپتى ەتتى.
بۇدان بيلىك حالىقتىڭ ءوزىن-ءوزى ەۆاكۋاتسيالاعانىن كورە تۇرا، بىلە تۇرا وز ەڭبەگى رەتىندە تانىتقىسى كەلە مە دەگەن وي تۋادى. راسىندا دا حالىقتىڭ بوسىپ، بەتى اۋعان جاققا قاشىپ، قىر توبەسى-كۇن استىندا ءتۇس اۋعانشا وتىرعانىن ەلەگىسى كەلمەي مە؟
حالىق دەر كەزىندە جۇيەلى ءىس-قيمىل نەگىزىندە قاۋىپسىز ورىندارعا كوشىرىلمەگەندىكتەن ەكى كۇن بويى كوز جازىپ قالعان بالا-شاعا، تۋىس-جاقىندارىن جاريالى تۇردە ىزدەستىرۋگە ءماجبۇر بولدى. ارىستىقتاردىڭ ايتۋى بويىنشا، سوڭعى ون جىلدا كىسى شىعىنىمەن اياقتالعان 4 جارىلىستان كەيىن دە جالپىحالىقتىق يا مەكەمە كولەمىندە بىردە-ءبىر ەۆاكۋاتسيالىق دايىندىق-جاتتىعۋ جۇمىستارى جۇرگىزىلمەگەن.
توقاەۆ ءوز جارلىعىمەن ارىستاعى وقيعاسىندا كوزگە تۇسكەن ءبىر توپ ازاماتتى مەملەكەتتىك ناگرادامەن ماراپاتتاۋ شاراسىندا. استانا. 6 قىركۇيەك 2019 جىل. فوتو: baq.kz/ب.جۋاسباەۆ
ارىستاعى جارىلىس كەزىندە قالانى تاستاپ قاشقان تۇرعىندار. 24 ماۋسىم 2019 جىل. فوتو: اشىق دەرەككوز
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟