Bügin ötip jatqan Wlttıq qoğamdıq senim keñesiniñ alğaşqı otırısında prezident masıldıqtıñ wlttıq minez-qwlqımızğa keri äserin tigizip jatqanına öz «alañdauşılığın» bildirdi.

Parlament arqalauı tiis jükti öz mindetine alğan Wlttıq qoğamdıq senim keñesiniñ alğaşqı otırısı bastaldı. Keñes müşesi prezident Toqaev «memleket qızmetine qatıstı özekti mäselelerdi aşıq talqılap, naqtı wsınıstar äzirleu qajettigin» aytıp, mwnı özi şeşim qabıldar twsta eskeretinin mälimdedi. Prezidenttiñ sözinşe, eldi jañğırtu josparın keñes müşelerimen birlesip dayındau arqılı  «damıtuğa arnalğan reformalardı jandandırmaq». Sonday-aq memleket basşısı alqalı keñestegi ökilderdiñ «azamattıq wstanımdarı» men «ortaq iske qosqan ülesteri  üşin» öz rizaşılığın bildirdi.

– Bizdiñ genetikalıq kodımızdı eñserilmeytin qaqtığıs degen wğım joq. Jaulasu men daulasu halqımızdıñ ömir saltına tän emes. Biz ärdayım kürdeli mäseleni mämilege kelu arqılı şeşip kelemiz, – degen Toqaev qazaqstandıqtardıñ patriotizmine senetinin ayttı.

Jiında soñğı kezderi jurnalister men belsendilerge aşıq şabuıldarı küşeye tüsken, zañgerler qauımdastığı tarapınan tanılğan «sayasi twtqındar» qatarı köbeygen Qazaqstandağı demokratiya turalı söz qozğaldı. Astanada ötip jatqan keñeste «Wlttıq birliktiñ tağı bir tiregi – damudıñ demokratiyalıq modeline den qoyu. Özimizdiñ wlttıq tarihımızda demokratiyanıñ negizgi tirekterine adal bola twrıp, ärtürli örkeniettik tosqauıldardan ötip kettik. Wlttıq konsensus – bizdiñ tarihi basımdığımız», – dedi Qasım-Jomart Toqaev.

«Halqımızdıñ mwñ-mwqtajın  ärqaşanda eskeremiz» degen prezident jerdiñ eşkimge berilmeytinin «tağı da şegelep aytuğa» tırıstı. Sonımen qatar, ol şara barısında biılğı qazaqstandıq şeneunikterdiñ bastı argumentine aynalğan  «masıldıq» turalı söz etti. Toqaev «Masıldıq piğıldıñ orın aluına jol berilmeydi. Ökinişke oray, bwl kesel wlttıq minez-qwlqımızğa keri äserin tigizude. Bükil qoğam bolıp jwrtşılıqtı eñbekke bauluğa tiispiz», – dep erekşe toqtaldı.

Azamattıq qoğam belsendileri men täuelsiz sayasattanuşı, sarapşılar qoğamnıñ qwqıqtıq sanası oyanıp, öz talaptarın naqtı qoya bastağan twsta biliktiñ «masıldıq psihologiyası» turalı tüsindirmesi jiley tüskenin aytadı. Toqaevtıñ äleumettik sayasattıñ älsiregenin, el işindegi kedeyşiliktiñ küşeygenin moyındağanına qaramastan, bilik «mwtajdıq pen masıldıqtıñ arajigin ajırata bilu» taqırıbında jwrt aşuın tudırğan köptegen daulı mälimdemeler jasap ülgergen.

"The Qazaq Times"