بۇگىن ءوتىپ جاتقان ۇلتتىق قوعامدىق سەنىم كەڭەسىنىڭ العاشقى وتىرىسىندا پرەزيدەنت ماسىلدىقتىڭ ۇلتتىق مىنەز-قۇلقىمىزعا كەرى اسەرىن تيگىزىپ جاتقانىنا ءوز «الاڭداۋشىلىعىن» ءبىلدىردى.

پارلامەنت ارقالاۋى ءتيىس جۇكتى ءوز مىندەتىنە العان ۇلتتىق قوعامدىق سەنىم كەڭەسىنىڭ العاشقى وتىرىسى باستالدى. كەڭەس مۇشەسى پرەزيدەنت توقاەۆ «مەملەكەت قىزمەتىنە قاتىستى وزەكتى ماسەلەلەردى اشىق تالقىلاپ، ناقتى ۇسىنىستار ازىرلەۋ قاجەتتىگىن» ايتىپ، مۇنى ءوزى شەشىم قابىلدار تۇستا ەسكەرەتىنىن مالىمدەدى. پرەزيدەنتتىڭ سوزىنشە، ەلدى جاڭعىرتۋ جوسپارىن كەڭەس مۇشەلەرىمەن بىرلەسىپ دايىنداۋ ارقىلى  «دامىتۋعا ارنالعان رەفورمالاردى جانداندىرماق». سونداي-اق مەملەكەت باسشىسى القالى كەڭەستەگى وكىلدەردىڭ «ازاماتتىق ۇستانىمدارى» مەن «ورتاق ىسكە قوسقان ۇلەستەرى  ءۇشىن» ءوز ريزاشىلىعىن ءبىلدىردى.

– ءبىزدىڭ گەنەتيكالىق كودىمىزدى ەڭسەرىلمەيتىن قاقتىعىس دەگەن ۇعىم جوق. جاۋلاسۋ مەن داۋلاسۋ حالقىمىزدىڭ ءومىر سالتىنا ءتان ەمەس. ءبىز ءاردايىم كۇردەلى ماسەلەنى مامىلەگە كەلۋ ارقىلى شەشىپ كەلەمىز، – دەگەن توقاەۆ قازاقستاندىقتاردىڭ پاتريوتيزمىنە سەنەتىنىن ايتتى.

جيىندا سوڭعى كەزدەرى جۋرناليستەر مەن بەلسەندىلەرگە اشىق شابۋىلدارى كۇشەيە تۇسكەن، زاڭگەرلەر قاۋىمداستىعى تاراپىنان تانىلعان «ساياسي تۇتقىندار» قاتارى كوبەيگەن قازاقستانداعى دەموكراتيا تۋرالى ءسوز قوزعالدى. استانادا ءوتىپ جاتقان كەڭەستە «ۇلتتىق بىرلىكتىڭ تاعى ءبىر تىرەگى – دامۋدىڭ دەموكراتيالىق مودەلىنە دەن قويۋ. ءوزىمىزدىڭ ۇلتتىق تاريحىمىزدا دەموكراتيانىڭ نەگىزگى تىرەكتەرىنە ادال بولا تۇرىپ، ءارتۇرلى وركەنيەتتىك توسقاۋىلداردان ءوتىپ كەتتىك. ۇلتتىق كونسەنسۋس – ءبىزدىڭ تاريحي باسىمدىعىمىز»، – دەدى قاسىم-جومارت توقاەۆ.

«حالقىمىزدىڭ مۇڭ-مۇقتاجىن  ارقاشاندا ەسكەرەمىز» دەگەن پرەزيدەنت جەردىڭ ەشكىمگە بەرىلمەيتىنىن «تاعى دا شەگەلەپ ايتۋعا» تىرىستى. سونىمەن قاتار، ول شارا بارىسىندا بيىلعى قازاقستاندىق شەنەۋنىكتەردىڭ باستى ارگۋمەنتىنە اينالعان  «ماسىلدىق» تۋرالى ءسوز ەتتى. توقاەۆ «ماسىلدىق پيعىلدىڭ ورىن الۋىنا جول بەرىلمەيدى. وكىنىشكە وراي، بۇل كەسەل ۇلتتىق مىنەز-قۇلقىمىزعا كەرى اسەرىن تيگىزۋدە. بۇكىل قوعام بولىپ جۇرتشىلىقتى ەڭبەككە باۋلۋعا ءتيىسپىز»، – دەپ ەرەكشە توقتالدى.

ازاماتتىق قوعام بەلسەندىلەرى مەن تاۋەلسىز ساياساتتانۋشى، ساراپشىلار قوعامنىڭ قۇقىقتىق ساناسى ويانىپ، ءوز تالاپتارىن ناقتى قويا باستاعان تۇستا بيلىكتىڭ «ماسىلدىق پسيحولوگياسى» تۋرالى تۇسىندىرمەسى جيلەي تۇسكەنىن ايتادى. توقاەۆتىڭ الەۋمەتتىك ساياساتتىڭ السىرەگەنىن، ەل ىشىندەگى كەدەيشىلىكتىڭ كۇشەيگەنىن مويىنداعانىنا قاراماستان، بيلىك «مۇتاجدىق پەن ماسىلدىقتىڭ اراجىگىن اجىراتا ءبىلۋ» تاقىرىبىندا جۇرت اشۋىن تۋدىرعان كوپتەگەن داۋلى مالىمدەمەلەر جاساپ ۇلگەرگەن.

"The Qazaq Times"