Bügin elimizdiñ birneşe qalası Almatı, Şımkent, Aqtöbe, Aqtau, Öskemen, Qarağandı, Kökşetau, Taraz jäne elordasında qoğam belsendileri  «qıtay ekspansiyası» men 55 zauıttıñ salınuına qarsılıq tanıtıp, jañaözendikterdiñ bastamasın qoldau şaraların ötkizdi.

Tüske deyin ötken jiındarda azamattıq qoğam ökilderi men twrğındar Qazaqstan biligine qıtaylıq käsiporındardıñ kelmeuin, memleket basşısı Toqaevtıñ 11-12 qırküyek künderine josparlanğan QHR-na is-saparınan bas tartuın talap etti.

Sağat 10:00 şamasında Almatı qalalıq äkimdiginiñ aldına jinalğan otız şaqtı azamat öz pikirlerin bildirip, bwqaralıq jiın bastamaşısı jañaözendikterdi qoldaytının jetkizdi. Narazı toptıñ işine qalalıq qoğamdıq damu basqarmasınıñ basşısı Aydar Esenbekov kelip, köpşilikti kompramistke keluge şaqırıp, işke kiruin äri sonda wsınıs-talaptardı qağazğa tüsiruin swradı. Äytse de jiındağı azamattar «äkimniñ ortağa kelsin, halıqtan ülken emes» dep bas tarttı. Artınşa qala äkimi B.Sağıntaevtıñ orınbasarı «Bolaşaq» tülegi Saparbek Twyaqbaev Qazaqstandağı qıtaylıq 55 jobağa qatıstı tüsinikteme berip, «ärbir jobanıñ öz mañızı bar, onı egjey-tegjeyli tüsinidirip bere alamın» dep, ekonomikalıq-investiciyalıq qarım-qatınastıñ «qajettilik» uäjin aytuğa tırıstı. Şarağa belgili jurnalist, qoğam belsendisi Rısbek Särsenbaywlı kelip qosılıp, «jañaözendikterdiñ talabın bükil el bolıp köteruge» ündep, 7 qırküyek ötetin Halıq qwrıltayına qatısuğa şaqırdı. Jiın barısında «sayasi twtqındardı: Aron Atabek, Mwhtar Jäkişev...» dereu bosatu, qaladağı «Qıtaymen baylanısı bar mektepterdi jabudı» qolğa alu mäseleleri köterildi.

Almatı qalası qoğamdıq damu basqarmasınıñ basşısı Aydar Esenbekov narazılardı ğimarat işine kiruge şaqıruda. Almatı qalası. 4 qırküyek 2019 jıl. Foto: QT

Stihiyalı türde ötken jiında jazuşı Talğat Aytbaywlı öziniñ ötkir pikirin bildirdi. Almatı qalası. 4 qırküyek 2019 jıl. Foto: QT

Qıtay ekspansiyasına qarsı öz wstanımın bildirgenderdiñ arasındağı egde jastağı azamattardıñ biri 83 jastağı Külpaş Şaymerdenova. Almatı qalası. 4 qırküyek 2019 jıl. Foto: QT

Qala äkiminiñ orınbasarı Saparbek Twyaqbaev narazılarğa 55 jobanıñ büge-şügesine deyin tüsindirip beruge dayın ekenin ayttı. Almatı qalası. 4 qırküyek 2019 jıl. Foto: QT

Al Aqtöbede tañerteñgi 10-dar kezinde oblıstıq äkimdiktiñ aldına jinalğan jüzge juıq azamat «qıtaylıq zauıttarğa qatıstı jobağa tüpkilikti türde tıyım salınsın» dep talap qoydı. Azattıqtıñ habarlauınşa, mwnda da elde «Qıtay jobalarınıñ qaptap bara jatqanın» sınağan azamattar arasına oblıs äkiminiñ orınbasarı Marat Toğjanov, oblıstıq işki sayasat basqarmasınıñ basşısı Bwlbwl Eleusinova jäne özge de şeneunikter şığıp, «bwl rwqsat etilmegen jiın» dep jwrttı taratuğa tırısqan. Alayda narazılıq bildiruşi top şendilerdiñ eskertulerine qwlaq türmedi.

Däl osı mazmwndağı qarsılıq akciyaları Şımkent pen el astanasında da ötti. Jiında «Qıtay ekspansiyası», «Jañaözendikterdi qoldau», «Jemqorlıqtıñ etek jayuı», «Otızdıqqa talpınğan eldiñ küni eki siırğa qarauı», «Ädil memleket», «Şıñjañ qazaqtarınıñ qısım körui», «Biliktiñ rwqsatınsız talabın aşıq bildiru» t.b. taqırıptar söz boldı.

Sonımen qatar osı sipattağı şeru ötken öñirdiñ biri Aqtau. Qalanıñ 11 ıqşam audanında ornalasqan «Intımaq» alañına jinalğan jüzdegen jañaözendikterdi qoldaytının, «Qazaqstan jeri barşağa ortaq» ekendigin aytıp, «qıtay zauıttarına qarsımız» dep ayqayladı.

Aqtau qalasınıñ Intımaq alañında da jañaözendikterdi qoldau akciyası ötti. Almatı qalası. 4 qırküyek 2019 jıl. Foto: Lada.kz

Öskemen qalasında on şaqtı adam sayasi twtqındar men Qıtay ekspansiyasın qarsı mändegi bannerler wstap şıqsa, Qarağandı ortalığında sport salasınıñ ökilderi men erikti azamattar Jañaözen bastamasın qoldaytının jetkizdi. Sonday-aq Taraz qalasınıñ äkimdik aldındağı Dostıq alañında belsendilerden qwralğan bir top azamat "Biz de qıtaylıq 55 zauıttıñ elimizge äkelinuine qarsımız, bwl bizdiñ azamattıq borışımız" dep jañaözendiktermen birge ekenin mälimdedi.

55 qıtaylıq jobanı Qazaqstanda jüzege asıru mäselesi tamızdıñ soñınan beri qoğam tarapınan qattı sınğa wşırap keledi. Jalpıhalıqtıq sipat ala bastağan narazılıqtarda tüske deyin  qwqıq qorğau organdarı tosın äri öreskel äreketterge bara qoyğan joq. Alayda sağat 13:00 şamasında Kökşetau qalasınıñ ortalığındağı Abılay han eskertkişi mañına jinalğan bir top orta-egde jastağı azamattardı wzaq twrğızbay, "5-10 minut işinde kelgen policiya" narazılardı alıp ketken. Bügin İİM ministri Erlan Twrğımbaev İşki ister ministrligi Jañaözende zañsız miting wyımdastıru şaralarınıñ jolın kesetinin mälimdedi.

Aytpaqşı, 4 qırküyekte Jañaözen qalasınıñ äkimi qızmetine 49 jastağı Ibağarov Maqsat Oñğarbaywlı tağayındaldı. Kadrlıq auıs-tüyistiñ üş kündik Jañaözen protesterine qandayda bir baylanısı bar ma degen swraqtıñ bası aşıq qalıp otır.

"The Qazaq Times"