QR İMM-niñ forması. Körneki suret. Foto: aşıq derekköz

25-26 tamız künderi el astanası men Almatı qalalarında qoğamdı tiksintken qılmıstıq faktilerdiñ orın aluı, belsendilerdiñ jwmbaq jağdayda oq nısanasına iligui – qoğamnıñ qauipsizdik senimine selkeu tüsirude. 

25 tamız el astanasında er adam atıs şığarıp, tört adamdı jaralağan. Onısımen qoymay küdiktiler qılmıs ornınan boy tasalağan. Qalalıq policiya departamenti baspasöz qızmetiniñ habarlauınşa, jaralanğan tört kisiniñ bireui auruhanada häliniñ auırlığına baylanıstı köz jwmğan. Maman köşesiniñ qaq ortasında bir top adam janjaldasıp qalıp, bireui mıltıqpen qarsılastarına oq jaudırğan. Qazirgi tañda oqiğağa qatısı bar eki küdikti qamauda. Sotqa deyingi tergeu jürip jatqan iste oq atılğan qaru-jaraq tärkilenip, tiisti sot-medicinalıq saraptama tağayındalğan.

Däl sol tüni tañğa qarağan 4-ter şamasında oñtüstik astananıñ ortalığında da jantürşiktirerlik oqiğa boldı. Apat emes, adam qolınan tuğan qılmıs. Sebep – Gagarin köşesindegi körşiles eki köñil köteru orındarınıñ keluşileri arasındağı janjal. Äleumettik jelide lezde tarağan videodan aq tüsti avtoköliktiñ jürgizuşisi eregeskenderdiñ bireuin qağıp kete jazdağanın, al qara tüsti köliktiñ jürgizuşisi qasaqana quıp jürip üş adamdı qaqqanın köruge boladı. Policiya mälimetinşe, «janjal soñında eregeskenderdiñ biri qarsılastarın kölikpen qağıp, oqiğa ornınan qaşıp ketken». Sonday-aq qoğam tarpınan «terakt» retinde bağalanıp ülgergen oqiğa saldarınan üş kisi zardap şekken, olardıñ qol-ayağı jaraqattanıp, bas süyek miı şayqalğan. Soñğı mälimetterge qarağanda, aq Toyota Camry markalı kölikti tizgindegen Almatı oblısınıñ Eñbekşiqazaq audanınıñ twrğını 24 jastağı A. esimdi azamat wstalğan.

Aq toyota köligi qılmıs ayğağı retinde arnayı avtotwraqqa qoyılğan. Foto: Almatı PD baspasöz qızmeti

Üş kisini qaqqan qara kölik te avtotwraqqa äkelingen. Foto: Almatı PD baspasöz qızmeti

Eki künniñ işinde älem jarıqtı jañğırtıp jibergen bwl oqiğalardan bölek, keşe Almatı mañındağı Talğarda azamattıq belsendi Galina Arzamasovağa belgisiz bireuler oq atqan. Bwğan deyin mamır ayında «jiırma jıldan beri qoğamdıq jwmıspen aynalısıp, twrğındar mäselesin köterip jürgen» qarağandılıq belsendi Ğalı Baqtıbaevqa belgisiz bireuler oq atıp, mert bolğan. Sonımen qatar, Taldıqorğanda biılğı jeti aydıñ özinde kämeletke tolmağandar arasında 39 qılmıs tirkelgen. Bwl ötken jıldıñ osı merzimimen salıstırğanda 11 faktige artıq ekendigi turalı jariyalandı.

Jartı jıldıñ özinde orın alıp otırğan oqiğalarğa qarap otırıp, elimizdegi qauipsizdik mäselesi dabıl deñgeyinde körinedi. Konstituciya men «Nwr Otan» bağdarlamasında «Adam bastı qwndılığı sanalatın» azamattıq-zayırlı qoğamda beybit twrğındardıñ uayım-tolğanısı küşeye tüsti. Mänerlep sırğanauşı Denis Tenniñ qayğılı qazasınan keyin Qazaqstan jwrtşılığı İşki ister ministrligin sınap, "kosmetikalıq" özgerister emes, tüpkilikti reforma talap etken edi. Top kisige oq jaudıratın qarular qılmıskerlerdiñ qolına qalayşa tüsti? Fobiya men agressiya trendine aynalğan pedofiliya aktilerine qatıstı profilaktika  nelikten önimsiz, älsiz? Qılmıs jasauşılardıñ sanı nege jasaruda? Keudesin aşu kernegender qılmısqa jeñil qaraytındığı zañ älsizdiginen be, älde aynalıp öter jolına senimdiliginen be? Aqordağa şağımın ayta barğan bes-altı ananıñ aldınan şığa qoyatın top-top äskeriler qılmıs uaqıtında qayda ketedi? Narazılıqtardı mıñdağan kisini wstap-qamauğa qauqarlı qwqıq qorğau organdarı osınday qılmıstardıñ jolın kesuge kelgende nege därmensiz? İİM nelikten aldı-artı eki türli nömirli kölikpen jüredi? Osı tärizdi azamattıq qoğam ökilderin mazalağan san aluan saualdardıñ jauabı äzirge tabıla qoyğan joq. Jol policiyası ala tayaqşanı birde al deydi, birde qaytaru kerek deydi. Äyteuir, ekinşi plandağı taqırıptar töbe körsetuge şeber. Bwqaranı uayımğa salğan, erteñine alañdatqan eñ özekti mäseleler tüpkilikti türde şeşim tabudıñ bir jolı – jüyeniñ aşıqtığı deydi sarapşılar. İİM eldiñ senim kreditine qol jetkizui – üyrenisken teris tüsinikterinen tolıqtay arılıp, izgilik mwrattarın käsibi müddesine qabıstıra biluinde.

P.S.: Elorda men Almatığa balaların oquğa jibergen öñirdegi ata-ana är küni tileuin tilep, eleñdep jüreri sözsiz mınaday bassızdıqtardan soñ. Qoğamğa mälim bolğan ärbir qılmıstıñ astarında azamattarğa stress «sıylaytın» janjegi bar ekenin wmıtpağan jön.

"The Qazaq Times"