قر ءىمم-ءنىڭ فورماسى. كورنەكى سۋرەت. فوتو: اشىق دەرەككوز

25-26 تامىز كۇندەرى ەل استاناسى مەن الماتى قالالارىندا قوعامدى تىكسىنتكەن قىلمىستىق فاكتىلەردىڭ ورىن الۋى، بەلسەندىلەردىڭ جۇمباق جاعدايدا وق نىساناسىنا ىلىگۋى – قوعامنىڭ قاۋىپسىزدىك سەنىمىنە سەلكەۋ تۇسىرۋدە. 

25 تامىز ەل استاناسىندا ەر ادام اتىس شىعارىپ، ءتورت ادامدى جارالاعان. ونىسىمەن قويماي كۇدىكتىلەر قىلمىس ورنىنان بوي تاسالاعان. قالالىق پوليتسيا دەپارتامەنتى ءباسپاسوز قىزمەتىنىڭ حابارلاۋىنشا، جارالانعان ءتورت كىسىنىڭ بىرەۋى اۋرۋحانادا ءحالىنىڭ اۋىرلىعىنا بايلانىستى كوز جۇمعان. مامان كوشەسىنىڭ قاق ورتاسىندا ءبىر توپ ادام جانجالداسىپ قالىپ، بىرەۋى مىلتىقپەن قارسىلاستارىنا وق جاۋدىرعان. قازىرگى تاڭدا وقيعاعا قاتىسى بار ەكى كۇدىكتى قاماۋدا. سوتقا دەيىنگى تەرگەۋ ءجۇرىپ جاتقان ىستە وق اتىلعان قارۋ-جاراق تاركىلەنىپ، ءتيىستى سوت-مەديتسينالىق ساراپتاما تاعايىندالعان.

ءدال سول ءتۇنى تاڭعا قاراعان 4-تەر شاماسىندا وڭتۇستىك استانانىڭ ورتالىعىندا دا جانتۇرشىكتىرەرلىك وقيعا بولدى. اپات ەمەس، ادام قولىنان تۋعان قىلمىس. سەبەپ – گاگارين كوشەسىندەگى كورشىلەس ەكى كوڭىل كوتەرۋ ورىندارىنىڭ كەلۋشىلەرى اراسىنداعى جانجال. الەۋمەتتىك جەلىدە لەزدە تاراعان ۆيدەودان اق ءتۇستى اۆتوكولىكتىڭ جۇرگىزۋشىسى ەرەگەسكەندەردىڭ بىرەۋىن قاعىپ كەتە جازداعانىن، ال قارا ءتۇستى كولىكتىڭ جۇرگىزۋشىسى قاساقانا قۋىپ ءجۇرىپ ءۇش ادامدى قاققانىن كورۋگە بولادى. پوليتسيا مالىمەتىنشە، «جانجال سوڭىندا ەرەگەسكەندەردىڭ ءبىرى قارسىلاستارىن كولىكپەن قاعىپ، وقيعا ورنىنان قاشىپ كەتكەن». سونداي-اق قوعام تارپىنان «تەراكت» رەتىندە باعالانىپ ۇلگەرگەن وقيعا سالدارىنان ءۇش كىسى زارداپ شەككەن، ولاردىڭ قول-اياعى جاراقاتتانىپ، باس سۇيەك ميى شايقالعان. سوڭعى مالىمەتتەرگە قاراعاندا، اق Toyota Camry ماركالى كولىكتى تىزگىندەگەن الماتى وبلىسىنىڭ ەڭبەكشىقازاق اۋدانىنىڭ تۇرعىنى 24 جاستاعى ا. ەسىمدى ازامات ۇستالعان.

اق تويوتا كولىگى قىلمىس ايعاعى رەتىندە ارنايى اۆتوتۇراققا قويىلعان. فوتو: الماتى پد ءباسپاسوز قىزمەتى

ءۇش كىسىنى قاققان قارا كولىك تە اۆتوتۇراققا اكەلىنگەن. فوتو: الماتى پد ءباسپاسوز قىزمەتى

ەكى كۇننىڭ ىشىندە الەم جارىقتى جاڭعىرتىپ جىبەرگەن بۇل وقيعالاردان بولەك، كەشە الماتى ماڭىنداعى تالعاردا ازاماتتىق بەلسەندى گالينا ارزاماسوۆاعا بەلگىسىز بىرەۋلەر وق اتقان. بۇعان دەيىن مامىر ايىندا «جيىرما جىلدان بەرى قوعامدىق جۇمىسپەن اينالىسىپ، تۇرعىندار ماسەلەسىن كوتەرىپ جۇرگەن» قاراعاندىلىق بەلسەندى عالى باقتىباەۆقا بەلگىسىز بىرەۋلەر وق اتىپ، مەرت بولعان. سونىمەن قاتار، تالدىقورعاندا بيىلعى جەتى ايدىڭ وزىندە كامەلەتكە تولماعاندار اراسىندا 39 قىلمىس تىركەلگەن. بۇل وتكەن جىلدىڭ وسى مەرزىمىمەن سالىستىرعاندا 11 فاكتىگە ارتىق ەكەندىگى تۋرالى جاريالاندى.

جارتى جىلدىڭ وزىندە ورىن الىپ وتىرعان وقيعالارعا قاراپ وتىرىپ، ەلىمىزدەگى قاۋىپسىزدىك ماسەلەسى دابىل دەڭگەيىندە كورىنەدى. كونستيتۋتسيا مەن «نۇر وتان» باعدارلاماسىندا «ادام باستى قۇندىلىعى سانالاتىن» ازاماتتىق-زايىرلى قوعامدا بەيبىت تۇرعىنداردىڭ ۋايىم-تولعانىسى كۇشەيە ءتۇستى. مانەرلەپ سىرعاناۋشى دەنيس تەننىڭ قايعىلى قازاسىنان كەيىن قازاقستان جۇرتشىلىعى ىشكى ىستەر مينيسترلىگىن سىناپ، "كوسمەتيكالىق" وزگەرىستەر ەمەس، تۇپكىلىكتى رەفورما تالاپ ەتكەن ەدى. توپ كىسىگە وق جاۋدىراتىن قارۋلار قىلمىسكەرلەردىڭ قولىنا قالايشا ءتۇستى؟ فوبيا مەن اگرەسسيا ترەندىنە اينالعان پەدوفيليا اكتىلەرىنە قاتىستى پروفيلاكتيكا  نەلىكتەن ءونىمسىز، ءالسىز؟ قىلمىس جاساۋشىلاردىڭ سانى نەگە جاسارۋدا؟ كەۋدەسىن اشۋ كەرنەگەندەر قىلمىسقا جەڭىل قارايتىندىعى زاڭ السىزدىگىنەن بە، الدە اينالىپ وتەر جولىنا سەنىمدىلىگىنەن بە؟ اقورداعا شاعىمىن ايتا بارعان بەس-التى انانىڭ الدىنان شىعا قوياتىن توپ-توپ اسكەريلەر قىلمىس ۋاقىتىندا قايدا كەتەدى؟ نارازىلىقتاردى مىڭداعان كىسىنى ۇستاپ-قاماۋعا قاۋقارلى قۇقىق قورعاۋ ورگاندارى وسىنداي قىلمىستاردىڭ جولىن كەسۋگە كەلگەندە نەگە دارمەنسىز؟ ءىىم نەلىكتەن الدى-ارتى ەكى ءتۇرلى ءنومىرلى كولىكپەن جۇرەدى؟ وسى ءتارىزدى ازاماتتىق قوعام وكىلدەرىن مازالاعان سان الۋان ساۋالداردىڭ جاۋابى ازىرگە تابىلا قويعان جوق. جول پوليتسياسى الا تاياقشانى بىردە ال دەيدى، بىردە قايتارۋ كەرەك دەيدى. ايتەۋىر، ەكىنشى پلانداعى تاقىرىپتار توبە كورسەتۋگە شەبەر. بۇقارانى ۋايىمعا سالعان، ەرتەڭىنە الاڭداتقان ەڭ وزەكتى ماسەلەلەر تۇپكىلىكتى تۇردە شەشىم تابۋدىڭ ءبىر جولى – جۇيەنىڭ اشىقتىعى دەيدى ساراپشىلار. ءىىم ەلدىڭ سەنىم كرەديتىنە قول جەتكىزۋى – ۇيرەنىسكەن تەرىس تۇسىنىكتەرىنەن تولىقتاي ارىلىپ، ىزگىلىك مۇراتتارىن كاسىبي مۇددەسىنە قابىستىرا بىلۋىندە.

P.S.: ەلوردا مەن الماتىعا بالالارىن وقۋعا جىبەرگەن وڭىردەگى اتا-انا ءار كۇنى تىلەۋىن تىلەپ، ەلەڭدەپ جۇرەرى ءسوزسىز مىناداي باسسىزدىقتاردان سوڭ. قوعامعا ءمالىم بولعان ءاربىر قىلمىستىڭ استارىندا ازاماتتارعا سترەسس «سىيلايتىن» جانجەگى بار ەكەنىن ۇمىتپاعان ءجون.

"The Qazaq Times"