20 tamız, seysenbi QR-nıñ prezidenti Q.Toqaevtıñ jarlığımen Eñbek jäne halıqtı äleumettik qorğau ministri qızmetindegi Berdibek Maşbekwlı Saparbaevtı lauazımınan bosatılıp, QR Prem'er-Ministriniñ orınbasarı qızmetine tağayındaldı. Aqordanıñ baspasöz qızmetiniñ habarlauınşa, bügin erteñgilik Mäjiliste Äleumettik-mädeni damu komitetiniñ otırısı ötip, deputattar Ükimet basşısınıñ  orınbasarı lauazımına tağayındau üşin Berdibek Saparbaevtıñ kandidaturasına birauızdan kelisim bergen.

Elge belgili 66 jastağı Berdibek Mäşbekwlı SAPARBAEV 1953 jılı 9 aqpanda Qızılorda oblısınıñ Jañaqorğan audanında düniege kelgen.

Ekonomika ğılımdarınıñ doktorı, professor degen ğılımi märtebesi bar. 1977 jılı ekonomist retinde memlekettik kar'erasın bastağan B.Saparbaev wzaq jıldar boyı basqarma-bölim basşılığında, törağalıqta, äkimdikte qızmet etip keledi.

Biılğı qıs auasında astanadağı bes büldirşinniñ ört işinde köz jwmğan qayğılı oqiğadan keyin el işindegi asqınğan äleumettik jaranıñ auzı aşılıp, qoğamdıq rezonans bwqaranıñ qarsılıq köñil-küyin tudırğan edi. Sol kezde 2018 jıldıñ 9 aqpanınan 2019 jıldıñ 25 aqpanına deyin eñbek jäne halıqtı äleumettik qorğau ministri bolğan Madina Äbilqasımova «analardı millionerge» teñep, qoğam tarapınan jii sınğa wşırağan edi. Jıl basında Ükimettiñ taratılıp, tek şendiler lauazımın auıstırıp «qayta qwrılğan» kezden, yağni aqpan ayınan beri B.Saparbaev Eñbek jäne äleumettik qorğau ministri qızmetin atqarıp keledi.

Saparbaev twsında astana men aymaqtarda ondağan köpbalalı analar narazılıq jiındarı bolıp, ministr özi tikeley dialogqa tüsuge tırısqan edi. Sarapşılar 21 mıñ teñgeni tiisti twlğalarğa ülestirude möldir äri jüyeli algoritmniñ dwrıs qwrılmağandığın aytadı.

"The Qazaq Times"