20 تامىز، سەيسەنبى قر-نىڭ پرەزيدەنتى ق.توقاەۆتىڭ جارلىعىمەن ەڭبەك جانە حالىقتى الەۋمەتتىك قورعاۋ ءمينيسترى قىزمەتىندەگى بەردىبەك ماشبەكۇلى ساپارباەۆتى لاۋازىمىنان بوساتىلىپ، قر پرەمەر-ءمينيسترىنىڭ ورىنباسارى قىزمەتىنە تاعايىندالدى. اقوردانىڭ ءباسپاسوز قىزمەتىنىڭ حابارلاۋىنشا، بۇگىن ەرتەڭگىلىك ماجىلىستە الەۋمەتتىك-مادەني دامۋ كوميتەتىنىڭ وتىرىسى ءوتىپ، دەپۋتاتتار ۇكىمەت باسشىسىنىڭ  ورىنباسارى لاۋازىمىنا تاعايىنداۋ ءۇشىن بەردىبەك ساپارباەۆتىڭ كانديداتۋراسىنا ءبىراۋىزدان كەلىسىم بەرگەن.

ەلگە بەلگىلى 66 جاستاعى بەردىبەك ماشبەكۇلى ساپارباەۆ 1953 جىلى 9 اقپاندا قىزىلوردا وبلىسىنىڭ جاڭاقورعان اۋدانىندا دۇنيەگە كەلگەن.

ەكونوميكا عىلىمدارىنىڭ دوكتورى، پروفەسسور دەگەن عىلىمي مارتەبەسى بار. 1977 جىلى ەكونوميست رەتىندە مەملەكەتتىك كارەراسىن باستاعان ب.ساپارباەۆ ۇزاق جىلدار بويى باسقارما-ءبولىم باسشىلىعىندا، توراعالىقتا، اكىمدىكتە قىزمەت ەتىپ كەلەدى.

بيىلعى قىس اۋاسىندا استاناداعى بەس ءبۇلدىرشىننىڭ ءورت ىشىندە كوز جۇمعان قايعىلى وقيعادان كەيىن ەل ىشىندەگى اسقىنعان الەۋمەتتىك جارانىڭ اۋزى اشىلىپ، قوعامدىق رەزونانس بۇقارانىڭ قارسىلىق كوڭىل-كۇيىن تۋدىرعان ەدى. سول كەزدە 2018 جىلدىڭ 9 اقپانىنان 2019 جىلدىڭ 25 اقپانىنا دەيىن ەڭبەك جانە حالىقتى الەۋمەتتىك قورعاۋ ءمينيسترى بولعان مادينا ابىلقاسىموۆا «انالاردى ميلليونەرگە» تەڭەپ، قوعام تاراپىنان ءجيى سىنعا ۇشىراعان ەدى. جىل باسىندا ۇكىمەتتىڭ تاراتىلىپ، تەك شەندىلەر لاۋازىمىن اۋىستىرىپ «قايتا قۇرىلعان» كەزدەن، ياعني اقپان ايىنان بەرى ب.ساپارباەۆ ەڭبەك جانە الەۋمەتتىك قورعاۋ ءمينيسترى قىزمەتىن اتقارىپ كەلەدى.

ساپارباەۆ تۇسىندا استانا مەن ايماقتاردا ونداعان كوپبالالى انالار نارازىلىق جيىندارى بولىپ، مينيستر ءوزى تىكەلەي ديالوگقا تۇسۋگە تىرىسقان ەدى. ساراپشىلار 21 مىڭ تەڭگەنى ءتيىستى تۇلعالارعا ۇلەستىرۋدە ءمولدىر ءارى جۇيەلى الگوريتمنىڭ دۇرىس قۇرىلماعاندىعىن ايتادى.

"The Qazaq Times"