Foto: https://vk.tula.su

Veneseula prezidenti Nikolas Maduro eldegi oppoziciyalıq toptardı küşpen taratıp, jaña qwram dayındamaq. Bwl jağday ükimettegi şielenisti (eskalaciya) küşeytip, sayasattağı krizis jalğasuı mümkin, – deydi venesuelalıq oppoziciya lideri Huan Guaydo.

Guaydo öziniñ Twitter paraqşasındağı video-ündeude: «Osı apta Maduro parlamentte ädiletsiz saylau ötkizip, oppoziciyalıq toptardı küşpen taratudı josparlap otır. Artınşa ol oppoziciya ökilderin, bizdiñ jaqtastarımızdı qudaulauğa wşıratuı äbden mümkin. Bwl jayt bizdiñ Norvegiyamen jaqında jüzege asqan diplomatiyalıq seriktestigimizge nwqsan keltirip, eldegi dağdarıs, sayasi krizisti jalğastıradı. Prezidenttiñ bwl qadamı bilik üşin de, halıq üşin de auır timek», – dedi.

Reuters agenttigi habarlağanday, eldiñ Aqparat ministrligi oppoziciyanıñ bwl ündeuine qatıstı resmi mälimdeme jasağan joq. Degenmen, basqaruşı top jaqtastarı, sayasatkerler Guaydonıñ bwl sözin negizsiz dep tanıp, parlamenttik saylaudıñ 2020 jıldıñ jeltoqsanına josparlanğanın ayttı. Socialistik partiya ökili Diosdado Kabello ğalamtorda «Guaydo mırza, eger bilikten qorıqsañız, it satıp alıñız!» – dep jauap qatqan.

Biıl Veneseula assambleyası Guaydonı qwqıqtıq immunitetinen ayıru turalı ükim şığarıp, belsendi 15 jılğa bilikten alastatıldı. Atalğan jağdaydan keyin Guaydo jergilikti BAQ ökilderine swhbatında «bilik qısım körsetip, arnayı wyımdasqan top qastandıq jasamaq» degen. Keyinnen Huan Guaydo bastağan oppoziciyalıq top BWW-dan gumanitarlıq kömek swrap, Norvegiyamen arnayı kelisimge keletinin habarlağan bolatın. Guaydonıñ aytuınşa, onıñ Norvegiyamen küş biriktirui prezident pen eldegi bilik qwrılımdarınıñ auısuına äkeledi. Eger jospar tiisinşe orındalmasa, Karakasta kezekti märte narazılıq akciyaları orın aluı mümkin.

Venesueladağı sayasi dağdarıs qañtarda uşığa tüsken. Sol uaqıtta Wlttıq assambleya baqılauındağı oppoziciyanı basqarğan Huan Guaydo özin ükimet basşısı retinde jariyalağan. Oğan AQŞ-pen qosa alğanda 50-den astam memleket qoldau körsetti. Europalıq odaq Guaydonı eldiñ legitimdi basşısı retinde tanıdı. Al Qıtay men Resey biligi qazirgi prezident Nikolas Maduro ükimetine senim bildirip, AQŞ jäne Europa elderiniñ Venesuela oppoziciyasına qoldau bildiruin «halıqaralıq qwqıqbwzuşılıq» dep atağan.

"The Qazaq Times"