فوتو: https://vk.tula.su

ۆەنەسەۋلا پرەزيدەنتى نيكولاس مادۋرو ەلدەگى وپپوزيتسيالىق توپتاردى كۇشپەن تاراتىپ، جاڭا قۇرام دايىنداماق. بۇل جاعداي ۇكىمەتتەگى شيەلەنىستى (ەسكالاتسيا) كۇشەيتىپ، ساياساتتاعى كريزيس جالعاسۋى مۇمكىن، – دەيدى ۆەنەسۋەلالىق وپپوزيتسيا ليدەرى حۋان گۋايدو.

گۋايدو ءوزىنىڭ Twitter پاراقشاسىنداعى ۆيدەو-ۇندەۋدە: «وسى اپتا مادۋرو پارلامەنتتە ادىلەتسىز سايلاۋ وتكىزىپ، وپپوزيتسيالىق توپتاردى كۇشپەن تاراتۋدى جوسپارلاپ وتىر. ارتىنشا ول وپپوزيتسيا وكىلدەرىن، ءبىزدىڭ جاقتاستارىمىزدى قۋداۋلاۋعا ۇشىراتۋى ابدەن مۇمكىن. بۇل جايت ءبىزدىڭ نورۆەگيامەن جاقىندا جۇزەگە اسقان ديپلوماتيالىق سەرىكتەستىگىمىزگە نۇقسان كەلتىرىپ، ەلدەگى داعدارىس، ساياسي كريزيستى جالعاستىرادى. پرەزيدەنتتىڭ بۇل قادامى بيلىك ءۇشىن دە، حالىق ءۇشىن دە اۋىر تيمەك»، – دەدى.

Reuters اگەنتتىگى حابارلاعانداي، ەلدىڭ اقپارات مينيسترلىگى وپپوزيتسيانىڭ بۇل ۇندەۋىنە قاتىستى رەسمي مالىمدەمە جاساعان جوق. دەگەنمەن، باسقارۋشى توپ جاقتاستارى، ساياساتكەرلەر گۋايدونىڭ بۇل ءسوزىن نەگىزسىز دەپ تانىپ، پارلامەنتتىك سايلاۋدىڭ 2020 جىلدىڭ جەلتوقسانىنا جوسپارلانعانىن ايتتى. سوتسياليستىك پارتيا وكىلى ديوسدادو كابەللو عالامتوردا «گۋايدو مىرزا، ەگەر بيلىكتەن قورىقساڭىز، يت ساتىپ الىڭىز!» – دەپ جاۋاپ قاتقان.

بيىل ۆەنەسەۋلا اسسامبلەياسى گۋايدونى قۇقىقتىق يممۋنيتەتىنەن ايىرۋ تۋرالى ۇكىم شىعارىپ، بەلسەندى 15 جىلعا بيلىكتەن الاستاتىلدى. اتالعان جاعدايدان كەيىن گۋايدو جەرگىلىكتى باق وكىلدەرىنە سۇحباتىندا «بيلىك قىسىم كورسەتىپ، ارنايى ۇيىمداسقان توپ قاستاندىق جاساماق» دەگەن. كەيىننەن حۋان گۋايدو باستاعان وپپوزيتسيالىق توپ بۇۇ-دان گۋمانيتارلىق كومەك سۇراپ، نورۆەگيامەن ارنايى كەلىسىمگە كەلەتىنىن حابارلاعان بولاتىن. گۋايدونىڭ ايتۋىنشا، ونىڭ نورۆەگيامەن كۇش بىرىكتىرۋى پرەزيدەنت پەن ەلدەگى بيلىك قۇرىلىمدارىنىڭ اۋىسۋىنا اكەلەدى. ەگەر جوسپار تيىسىنشە ورىندالماسا، كاراكاستا كەزەكتى مارتە نارازىلىق اكتسيالارى ورىن الۋى مۇمكىن.

ۆەنەسۋەلاداعى ساياسي داعدارىس قاڭتاردا ۋشىعا تۇسكەن. سول ۋاقىتتا ۇلتتىق اسسامبلەيا باقىلاۋىنداعى وپپوزيتسيانى باسقارعان حۋان گۋايدو ءوزىن ۇكىمەت باسشىسى رەتىندە جاريالاعان. وعان اقش-پەن قوسا العاندا 50-دەن استام مەملەكەت قولداۋ كورسەتتى. ەۋروپالىق وداق گۋايدونى ەلدىڭ لەگيتيمدى باسشىسى رەتىندە تانىدى. ال قىتاي مەن رەسەي بيلىگى قازىرگى پرەزيدەنت نيكولاس مادۋرو ۇكىمەتىنە سەنىم ءبىلدىرىپ، اقش جانە ەۋروپا ەلدەرىنىڭ ۆەنەسۋەلا وپپوزيتسياسىنا قولداۋ ءبىلدىرۋىن «حالىقارالىق قۇقىقبۇزۋشىلىق» دەپ اتاعان.

"The Qazaq Times"