Düniejüzi qazaqtarı qauımdastığı törağasınıñ birinşi orınbasarı Zauıtbek Twrısbekov Burabaydağı «Baldäuren» respublikalıq balalar oqu-sauıqtıru ortalığında «Tuğan jer – altın besik» taqırıbımen ötip jatqan halıqaralıq balalar qwrıltayınıñ onınşı auısımına qatısuşılarmen kezdesti, dep habarlaydı DQQ baspasöz qızmeti

Kezdesude Zauıtbek Qauısbekwlı qazaq halqınıñ ötken-ketken tarihınan, alıs-jaqın şet elderdegi qandastarımızdıñ twrmıs-tirşiliginen aqparat berip, tağılımdı äñgime örbitti.

Ol 1864 jılğı Şäueşek kelisiminen bastap halqımızdıñ köşi-qon tauqımetinen tälimdi derekter keltirdi. Tipti, qazaq halqınıñ şığu tegi, ornalasu mekeni, şeteldegi qandastarımızdıñ sanı, QR Twñğış Prezidenti – Elbası N.Nazarbaevtıñ bastamasımen tuğan elge köşu ürdisi, oralman märtebesi, bauırlarımızdıñ Qazaqstandağı ülgili twrmısı jaylı qızıqtı mağlwmattar berildi. «Bizdiñ bastı qwndılığımız – el Täuelsizdigi», – dedi ol söziniñ bir parasında.

«Onı twğırlandıru wltımızdıñ mereyin, halıqaralıq abıroyın köteredi. Sender «Baldäurendegi» ärbir künderiñdi mändi ötkizuge tırısıñdar. Bolaşaq sendirdiki. Uaqıttıñ tolqındı teñizi wlttardı bılay qoyıp, twtas halıqtı jwtıp jatqan bügingi jağdayda senderdiñ moyındarıñda zor salmaq bolatının este wstağaysıñdar. Qazaqstan tağı da 1 million qandasımızdı şaqıruğa dayın. Bwl sender qoyğan köp swraqtıñ birine jauabım. Senderge «densaulıqtarıñdı kütiñder, bilimdi bolıñdar, köbeyuimiz kerektigin wmıtpañdar, ömirde aspañdar, jaman jerdi baspañdar degim keledi»,– dedi Z.Twrısbekov.

Şaranıñ negizgi maqsatı – älemniñ är qiırında jürgen qazaq balalarına atajwrttıñ tarihın, tamaşa dästürlerin, ädemi ädep-ğwrpın, äuezdi tilin, mändi mädenietin tanıtu arqılı wlttıq qwndılıqtar wlağatın qalıptastıru.

Eske sala keteyik, Burabaydağı «Baldäuren» respublikalıq balalar oqu-sauıqtıru ortalığında «Tuğan jer – altın besik» taqırıbımen halıqaralıq balalar qwrıltayınıñ onınşı auısımı ötude. Oğan Resey, Moñğoliya, Qıtay, Özbekstan, Qırğızstan, Iran jäne Germaniyadan 300-ge juıq jetkinşek arnayı kelgen. Atajwrtqa kelgen balalardıñ deni öz ortalarında oqu ozatı jäne türli darın ieleri.

"The Qazaq Times"