دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ بۋرابايداعى «بالداۋرەن» رەسپۋبليكالىق بالالار وقۋ-ساۋىقتىرۋ ورتالىعىندا «تۋعان جەر – التىن بەسىك» تاقىرىبىمەن ءوتىپ جاتقان حالىقارالىق بالالار قۇرىلتايىنىڭ ونىنشى اۋىسىمىنا قاتىسۋشىلارمەن كەزدەستى، دەپ حابارلايدى دقق ءباسپاسوز قىزمەتى

كەزدەسۋدە زاۋىتبەك قاۋىسبەكۇلى قازاق حالقىنىڭ وتكەن-كەتكەن تاريحىنان، الىس-جاقىن شەت ەلدەردەگى قانداستارىمىزدىڭ تۇرمىس-تىرشىلىگىنەن اقپارات بەرىپ، تاعىلىمدى اڭگىمە ءوربىتتى.

ول 1864 جىلعى شاۋەشەك كەلىسىمىنەن باستاپ حالقىمىزدىڭ كوشى-قون تاۋقىمەتىنەن ءتالىمدى دەرەكتەر كەلتىردى. ءتىپتى، قازاق حالقىنىڭ شىعۋ تەگى، ورنالاسۋ مەكەنى، شەتەلدەگى قانداستارىمىزدىڭ سانى، قر تۇڭعىش پرەزيدەنتى – ەلباسى ن.نازارباەۆتىڭ باستاماسىمەن تۋعان ەلگە كوشۋ ءۇردىسى، ورالمان مارتەبەسى، باۋىرلارىمىزدىڭ قازاقستانداعى ۇلگىلى تۇرمىسى جايلى قىزىقتى ماعلۇماتتار بەرىلدى. «ءبىزدىڭ باستى قۇندىلىعىمىز – ەل تاۋەلسىزدىگى»، – دەدى ول ءسوزىنىڭ ءبىر پاراسىندا.

«ونى تۇعىرلاندىرۋ ۇلتىمىزدىڭ مەرەيىن، حالىقارالىق ابىرويىن كوتەرەدى. سەندەر «بالداۋرەندەگى» ءاربىر كۇندەرىڭدى ءماندى وتكىزۋگە تىرىسىڭدار. بولاشاق سەندىردىكى. ۋاقىتتىڭ تولقىندى تەڭىزى ۇلتتاردى بىلاي قويىپ، تۇتاس حالىقتى جۇتىپ جاتقان بۇگىنگى جاعدايدا سەندەردىڭ مويىندارىڭدا زور سالماق بولاتىنىن ەستە ۇستاعايسىڭدار. قازاقستان تاعى دا 1 ميلليون قانداسىمىزدى شاقىرۋعا دايىن. بۇل سەندەر قويعان كوپ سۇراقتىڭ بىرىنە جاۋابىم. سەندەرگە «دەنساۋلىقتارىڭدى كۇتىڭدەر، ءبىلىمدى بولىڭدار، كوبەيۋىمىز كەرەكتىگىن ۇمىتپاڭدار، ومىردە اسپاڭدار، جامان جەردى باسپاڭدار دەگىم كەلەدى»،– دەدى ز.تۇرىسبەكوۆ.

شارانىڭ نەگىزگى ماقساتى – الەمنىڭ ءار قيىرىندا جۇرگەن قازاق بالالارىنا اتاجۇرتتىڭ تاريحىن، تاماشا داستۇرلەرىن، ادەمى ادەپ-عۇرپىن، اۋەزدى ءتىلىن، ءماندى مادەنيەتىن تانىتۋ ارقىلى ۇلتتىق قۇندىلىقتار ۇلاعاتىن قالىپتاستىرۋ.

ەسكە سالا كەتەيىك، بۋرابايداعى «بالداۋرەن» رەسپۋبليكالىق بالالار وقۋ-ساۋىقتىرۋ ورتالىعىندا «تۋعان جەر – التىن بەسىك» تاقىرىبىمەن حالىقارالىق بالالار قۇرىلتايىنىڭ ونىنشى اۋىسىمى وتۋدە. وعان رەسەي، موڭعوليا، قىتاي، وزبەكستان، قىرعىزستان، يران جانە گەرمانيادان 300-گە جۋىق جەتكىنشەك ارنايى كەلگەن. اتاجۇرتقا كەلگەن بالالاردىڭ دەنى ءوز ورتالارىندا وقۋ وزاتى جانە ءتۇرلى دارىن يەلەرى.

"The Qazaq Times"