Orıs tilin şekteu: Ukrainada memlekettik til turalı zañ küşine endi

16 şilde Ukrainada memlekettik til turalı zañ küşine endi, – dep habarlaydı Ukrainform.  

Osıdan eki ay bwrın qwjat mätini resmi baspasözde jariyalanğan bolatın. Joğarı Rada qabıldağan zañ boyınşa, ukrain tili memlekettik jäne resmi til bolıp bekitildi. Zañda lauazımdı twlğalardıñ ukrain tilin bilmegeni üşin jaza da qarastırılğan. Rada törağası Andrey Parubiy bwl turalı pikirinde: «Ukrain tili – eldiñ wlttıq qauipsizdigi. 2014 jılı Resey tankteri qay jerde orıs tili bolsa sol jerge bardı. Ukrain tili memlekettik negizin qwraydı. Bwl turalı zañnıñ boluı ukraindıqtardıñ özin özi qwrmettegenin körsetedi», – dep mälimdedi.

Jaña zañ memlekettik tildi sözsiz biludi mindetteydi jäne basqa tilderdiñ qoldanıluın şekteydi. Zañ tarmaqtarında orıs tili turalı birde-bir ret aytılmağan. Esesine, ağılşın tili turalı 18 jerde aytılğan. Endi ukrain halqınıñ ana tili ortalıq jäne jergilikti biliktiñ, sonday-aq barlıq qoğamdıq tarmaqtarında  artıqşılıqqa ie boladı. Ukraina azamattığın alu üşin mindetti türde memlekettik tildi biletinin däleldeui kerek. Al Ukrainada twratın özge az sandı wlttardıñ mektepke deyingi jäne mektepte öz ana tilinde bilim aluğa qwqığı bar dep körsetilgen. Sonday-aq, memlekettik til turalı atalğan zañ qabıldanğannan keyin 2 jıl tolğanda memlekettik telearnalar men radiolar memlekettik tildegi efir uaqıtı 90% deyin köteruge mindetti. Jergilikti arnalar bolsa 80% memlekettik tilde efir jürgizuge mindettelgen. Basqa tilderde jarıq köretin basılımdar ukrain tilindegi nwsqasın şığaruğa mindetteldi. Qabıldanğan zañ Ukrain territoriyasındağı komp'yuterlik programmalardıñ interfeysi ukrain jäne ağılşın tilinde boludı talap etedi. Orıs tilin qoldanudı şekteydi.

Eske sala keteyik, biıl 15 mamırda Ukrainanıñ bwrınğı prezidenti Petr Poroşenko memlekettik til turalı zañğa qol qoyğan bolatın. Qazirgi prezident Vladimir Zelenskiy bwl qwjattıñ adam qwqığı principterine qanşalıqtı say ekenin bayqap köretinin aytqan.

"The Qazaq Times"