ورىس ءتىلىن شەكتەۋ: ۋكراينادا مەملەكەتتىك ءتىل تۋرالى زاڭ كۇشىنە ەندى

16 شىلدە ۋكراينادا مەملەكەتتىك ءتىل تۋرالى زاڭ كۇشىنە ەندى، – دەپ حابارلايدى ۋكراينفورم.  

وسىدان ەكى اي بۇرىن قۇجات ءماتىنى رەسمي باسپاسوزدە جاريالانعان بولاتىن. جوعارى رادا قابىلداعان زاڭ بويىنشا، ۋكراين ءتىلى مەملەكەتتىك جانە رەسمي ءتىل بولىپ بەكىتىلدى. زاڭدا لاۋازىمدى تۇلعالاردىڭ ۋكراين ءتىلىن بىلمەگەنى ءۇشىن جازا دا قاراستىرىلعان. رادا توراعاسى اندرەي پارۋبي بۇل تۋرالى پىكىرىندە: «ۋكراين ءتىلى – ەلدىڭ ۇلتتىق قاۋىپسىزدىگى. 2014 جىلى رەسەي تانكتەرى قاي جەردە ورىس ءتىلى بولسا سول جەرگە باردى. ۋكراين ءتىلى مەملەكەتتىك نەگىزىن قۇرايدى. بۇل تۋرالى زاڭنىڭ بولۋى ۋكرايندىقتاردىڭ ءوزىن ءوزى قۇرمەتتەگەنىن كورسەتەدى»، – دەپ مالىمدەدى.

جاڭا زاڭ مەملەكەتتىك ءتىلدى ءسوزسىز ءبىلۋدى مىندەتتەيدى جانە باسقا تىلدەردىڭ قولدانىلۋىن شەكتەيدى. زاڭ تارماقتارىندا ورىس ءتىلى تۋرالى بىردە-ءبىر رەت ايتىلماعان. ەسەسىنە، اعىلشىن ءتىلى تۋرالى 18 جەردە ايتىلعان. ەندى ۋكراين حالقىنىڭ انا ءتىلى ورتالىق جانە جەرگىلىكتى بيلىكتىڭ، سونداي-اق بارلىق قوعامدىق تارماقتارىندا  ارتىقشىلىققا يە بولادى. ۋكراينا ازاماتتىعىن الۋ ءۇشىن مىندەتتى تۇردە مەملەكەتتىك ءتىلدى بىلەتىنىن دالەلدەۋى كەرەك. ال ۋكراينادا تۇراتىن وزگە از ساندى ۇلتتاردىڭ مەكتەپكە دەيىنگى جانە مەكتەپتە ءوز انا تىلىندە ءبىلىم الۋعا قۇقىعى بار دەپ كورسەتىلگەن. سونداي-اق، مەملەكەتتىك ءتىل تۋرالى اتالعان زاڭ قابىلدانعاننان كەيىن 2 جىل تولعاندا مەملەكەتتىك تەلەارنالار مەن راديولار مەملەكەتتىك تىلدەگى ەفير ۋاقىتى 90% دەيىن كوتەرۋگە مىندەتتى. جەرگىلىكتى ارنالار بولسا 80% مەملەكەتتىك تىلدە ەفير جۇرگىزۋگە مىندەتتەلگەن. باسقا تىلدەردە جارىق كورەتىن باسىلىمدار ۋكراين تىلىندەگى نۇسقاسىن شىعارۋعا مىندەتتەلدى. قابىلدانعان زاڭ ۋكراين تەرريتورياسىنداعى كومپيۋتەرلىك پروگراممالاردىڭ ينتەرفەيسى ۋكراين جانە اعىلشىن تىلىندە بولۋدى تالاپ ەتەدى. ورىس ءتىلىن قولدانۋدى شەكتەيدى.

ەسكە سالا كەتەيىك، بيىل 15 مامىردا ۋكراينانىڭ بۇرىنعى پرەزيدەنتى پەتر پوروشەنكو مەملەكەتتىك ءتىل تۋرالى زاڭعا قول قويعان بولاتىن. قازىرگى پرەزيدەنت ۆلاديمير زەلەنسكي بۇل قۇجاتتىڭ ادام قۇقىعى پرينتسيپتەرىنە قانشالىقتى ساي ەكەنىن بايقاپ كورەتىنىن ايتقان.

"The Qazaq Times"