2015 jılı kelisim ökilderi. Foto: Tehran Times.

Europa elderi AQŞ sankciyalarınıñ salmağın jeñildetuge kömektespese, Iran atom bağdarlamasın üşinşi deñgeyge jetkizedi. Iran Europağa 60 kün uaqıt berdi, osı uaqıt işinde işinde ekonomikalıq järdem berilmese  Iran qajetti şara qoldanbaq.

Irannıñ BWW-dağı ökili Majid Tahr-Ravançi  BBC-ge bergen swhbatında: «Prezident Tramp yadrolıq qarudı şekteu turalı kelisimnen birjaqtı şığıp ketken kezde, Europanıñ üş lideri bizge kelisimdi saqtap qaludı ötingen edi. Olar özderiniñ kelisimge say mindetterin atqaruğa jäne AQŞ kelisimnen şığıp ketkennen keyingi şığınnıñ ornın toltırıp beruge uäde berisken edi. Qazir europalıqtar öz uädesinde twrmay jatqanın biz qabılday almaymız», – degen.

Irannıñ yadrolıq bağdarlamasın şekteu turalı 2015 jılı qol qoyılğan kelisimnen AQŞ bir jıl bwrın şığıp ketti. Osıdan keyin AQŞ pen Iran arasındağı qayşılıq örşip, büginde taraptar qarulı küşterin jii körsete bastadı. Iran AQŞ sankciyası qalpına keltirilgennen keyin birden jauap qaytarmasa da, bwdan eki ay bwrın kelisimniñ keybir şarttarın qısqarttı. Al, osı aptada urandı bayıtu turalı qoyılğan şekti ekinşi ret bwzdı.

BWW-nıñ YAdrolıq qarudı şekteu turalı wyımı AQŞ talabı boyınşa Iran äreketin bağalau üşin Venada jiın ötkizdi. Al, Europa elderi yadrolıq qarudı şekteu turalı kelisimge qatısqan ökilderimenen bas qosıp, Tehrannıñ kezekti qadamın talqılağan bolatın.

BBC-diñ tilşisi Betani Belldiñ arnayı habarında Europa elderi «eki ottıñ arasında qaldı» dep bağalağan edi.  «AQŞ sankciyası Iran ekonomikasına ülken äser etti. Tehran bolsa, Irannıñ ekonomikalıq damuın qoldau turalı kelisimdegi mindettemelerin Europa elderi atqarmay jatır dep ayıptap otır. Al, Europa bolsa Irannıñ yadrolıq qarudı şekteu turalı kelisimge qaytıp keluin ötinedi», – deydi Bell.

2015 jılığı kelisimniñ özi Iran yadrolıq qaru jasauğa jaqın qaldı degen qauiptenuden keyin jasalğan bolatın. AQŞ biligine Tramp kelgennen keyin bwl kelisim Irannıñ yadrolıq qaruğa qol jetkizu äreketterin şektey almaydı dep sanağan.

“The Qazaq Times”