Qazaqstan prezidenti Qasım-Jomart Toqaevtıñ jarlığımen Baqıtjan Sağıntaev Almatı qalasınıñ äkimi bolıp tağayındaldı, – dep habarlaydı Aqordanıñ baspasöz qızmeti.

Prezident Q.Toqaevtıñ jarlığına säykes, Sağıntaev prezident äkimşiliginiñ jetekşisi qızmetinen bosatılıp, onıñ ornına altı jıl Qızılorda oblısın basqarğan Qırımbek Köşerbaev tağayındalğan. Osığan deyin qala äkimi bolğan Bauırjan Baybek memleket basşısınıñ jarlığımen basqa qızmetke auıstı.

Ayta keteyik, Baqıtjan Sağıntaev 2016 jılı qırküyekten 2019 jıldıñ aqpanına deyin Qazaqstan ükimetin basqarğan. 20 aqpanda bwrınğı prezident Nazarbaev Sağıntaev basqarğan ükimetti «ekonomikanı damıta almadı» dep sınğa alıp, otstavkağa jibergen bolatın. Keyinnen Sağıntaevtıñ ornına Asqar Mamin keldi.

Baqıtjan Äbdirwlı Sağıntaev 1963 jılı 13 qazanda düniege kelgen. S.M.Kirov atındağı Qazaq memlekettik universitetiniñ filosofiya-ekonomika fakul'tetin bitirgen. 1985 jıldan - Almatı halıq şaruaşılığı institutınıñ sayasi ekonomiya kafedrasınıñ meñgeruşisi. 1988 jıldan S.M.Kirov atındağı Qazaq memlekettik universitetiniñ äleumettanu kafedrasında assistent, ağa oqıtuşı, docent. 1992 jıldan kommerciyalıq qwrılımdarda basşılıq jwmıstarda boldı.

1998 jıldan Jambıl oblısı äkiminiñ orınbasarı; 1999 jıldan – QR şağın biznesti qoldau agenttigi törağasınıñ orınbasarı; 2000 jıldan – «Şağın käsipkerlikti damıtu qorı» JAQ basqarma törağası; 2001 jıldan QR Tabiği monopoliyalardı retteu, bäsekelestikti qorğau jäne şağın biznesti qoldau agenttigi törağasınıñ birinşi orınbasarı; 2004 jıldan – QR Tabiği monopoliyalardı retteu agenttiginiñ törağası bolğan.

2007 jıldan – QR Prem'er-Ministri Keñsesiniñ basşısı. 2008 jıldan – Pavlodar oblısınıñ äkimi. 2012 jılğı qañtardan qırküyekke deyin – QR Ekonomikalıq damu jäne sauda ministri. 2012-2013 jıldarı – «Nur Otan» partiyası Törağasınıñ birinşi orınbasarı qızmetterin atqarğan.

2013-2016 jıldarı – QR Prem'er-Ministriniñ birinşi orınbasarı; 2016-2019 jıldarı - QR Prem'er-Ministri. 2019 jıldıñ 24 naurızınan osı uaqıtqa deyin QR Prezidenti Äkimşiliginiñ basşısı boldı.

 

"The Qazaq Times"