Бақытжан Сағынтаев. Фото: https://alau.kz

Қазақстан президенті Қасым-Жомарт Тоқаевтың жарлығымен Бақытжан Сағынтаев Алматы қаласының әкімі болып тағайындалды, – деп хабарлайды Ақорданың баспасөз қызметі.

Президент Қ.Тоқаевтың жарлығына сәйкес, Сағынтаев президент әкімшілігінің жетекшісі қызметінен босатылып, оның орнына алты жыл Қызылорда облысын басқарған Қырымбек Көшербаев тағайындалған. Осыған дейін қала әкімі болған Бауыржан Байбек мемлекет басшысының жарлығымен басқа қызметке ауысты.

Айта кетейік, Бақытжан Сағынтаев 2016 жылы қыркүйектен 2019 жылдың ақпанына дейін Қазақстан үкіметін басқарған. 20 ақпанда бұрынғы президент Назарбаев Сағынтаев басқарған үкіметті «экономиканы дамыта алмады» деп сынға алып, отставкаға жіберген болатын. Кейіннен Сағынтаевтың орнына Асқар Мамин келді.

Бақытжан Әбдірұлы Сағынтаев 1963 жылы 13 қазанда дүниеге келген. С.М.Киров атындағы Қазақ мемлекеттік университетінің философия-экономика факультетін бітірген. 1985 жылдан - Алматы халық шаруашылығы институтының саяси экономия кафедрасының меңгерушісі. 1988 жылдан С.М.Киров атындағы Қазақ мемлекеттік университетінің әлеуметтану кафедрасында ассистент, аға оқытушы, доцент. 1992 жылдан коммерциялық құрылымдарда басшылық жұмыстарда болды.

1998 жылдан Жамбыл облысы әкімінің орынбасары; 1999 жылдан – ҚР шағын бизнесті қолдау агенттігі төрағасының орынбасары; 2000 жылдан – «Шағын кәсіпкерлікті дамыту қоры» ЖАҚ басқарма төрағасы; 2001 жылдан ҚР Табиғи монополияларды реттеу, бәсекелестікті қорғау және шағын бизнесті қолдау агенттігі төрағасының бірінші орынбасары; 2004 жылдан – ҚР Табиғи монополияларды реттеу агенттігінің төрағасы болған.

2007 жылдан – ҚР Премьер-Министрі Кеңсесінің басшысы. 2008 жылдан – Павлодар облысының әкімі. 2012 жылғы қаңтардан қыркүйекке дейін – ҚР Экономикалық даму және сауда министрі. 2012-2013 жылдары – «Nur Otan» партиясы Төрағасының бірінші орынбасары қызметтерін атқарған.

2013-2016 жылдары – ҚР Премьер-Министрінің бірінші орынбасары; 2016-2019 жылдары - ҚР Премьер-Министрі. 2019 жылдың 24 наурызынан осы уақытқа дейін ҚР Президенті Әкімшілігінің басшысы болды.

 

"The Qazaq Times"