M1A2 Abrams tanki7 Foto: VOA.

Amerika Qwrama Ştattarı Tayuanğa (Tayvan') qwnı 2 mlrd dollar twratın qaru-jaraq satıp berudi josparlap otır. Tramp ükimetiniñ Kongreske qaru-jaraq satu turalı alğaşqı jobasın wsınğan.  Reuters agenttiginiñ habarına qarağanda, Tayuanğa satılatın qarulardıñ qatarında General Motors kompaniyası jasağan alğaşqı M1A2 Abrams tankileri men tankke qarsı zımıran bateriyaları da bar.

Reuters aqparattıq agenttigi bwnday mälimetti atı-jönin bildirgisi kelmegen 4 birdey joğarı lauazımdınıñ mälimetine silteme jasay otırıp taratqan. Alayda, osı habar tarağan küni keşte Tayuannıñ AQŞ-tağı ökili Gau Şuotay mälimdeme jasap: «Tayuan tarabı bwl turalı äli de tolıq mälimetke ie bolğan joq. Sondıqtan, qaru-jaraq satu jäne satıp beru turalı anıq tüsinik bere almaymız», – degen.

Degenmen ol AQŞ ükimetiniñ Tayuan qorğanıs qabiletin joğarlatıp, ıqtimal qaterlerge qarsı twru quatın arttıruına kömektesuin quattağan. Äri bwl Ündi-Tınıq mwhit aymağınıñ aşıq, qauipsiz jäne twraqtı boluı üşin de mañızdı ekenin atap körsetken.

Bwl aqparattar men mälimdemelerden keyin köp ötpey Bloomberg agenttigi de soğan wqsas habar tarattı. Bwl aqparat agenttigi AQŞ pen Tayuan arasındağı qaru-jaraq saudasına qatıstı twlğanıñ birine silteme bergen. Mälimetke qarağanda, kezekti qaru saudasında 108 tankiden tıs, tankige qarsı TOW-II zımırandarınan 1240 dana, Javelin anti-tank zımırandarınan 409 dana, sonday-aq 250 dana «Stinger»  zımıranı da bar.

Kezekti qaru-jaraq saudası turalı jobanı Kongress 30 kün işinde qarap maqwldauı tiis. Al, Tayuan tarabı satıp aluğa ötiniş etken F-16 wşaqtarı bwl retki qaru saudasına kirmeydi. Atalğan wşaqtardı satıp beru isi äli de AQŞ Qorğanıs ministrligi men Memlekettik departamentiniñ talqılauında.

Beyjiñ biligi AQŞ pen Tayuan arasındağı qorğanıs ıntımaqtastığı men qaru-jaraq saudasına qarsı bolıp keledi. AQŞ-Tayuan arasındağı jaña qaru saudası Beyjiñniñ narazılığın örşitedi dep qaraydı sarapşılar.

“The Qazaq Times”