M1A2 Abrams تانكى7 فوتو: VOA.

امەريكا قۇراما شتاتتارى تايۋانعا (تايۆان) قۇنى 2 ملرد دوللار تۇراتىن قارۋ-جاراق ساتىپ بەرۋدى جوسپارلاپ وتىر. ترامپ ۇكىمەتىنىڭ كونگرەسكە قارۋ-جاراق ساتۋ تۋرالى العاشقى جوباسىن ۇسىنعان.  Reuters اگەنتتىگىنىڭ حابارىنا قاراعاندا، تايۋانعا ساتىلاتىن قارۋلاردىڭ قاتارىندا General Motors كومپانياسى جاساعان العاشقى M1A2 Abrams تانكىلەرى مەن تانككە قارسى زىمىران باتەريالارى دا بار.

Reuters اقپاراتتىق اگەنتتىگى بۇنداي مالىمەتتى اتى-ءجونىن بىلدىرگىسى كەلمەگەن 4 بىردەي جوعارى لاۋازىمدىنىڭ مالىمەتىنە سىلتەمە جاساي وتىرىپ تاراتقان. الايدا، وسى حابار تاراعان كۇنى كەشتە تايۋاننىڭ اقش-تاعى وكىلى گاۋ شۋوتاي مالىمدەمە جاساپ: «تايۋان تارابى بۇل تۋرالى ءالى دە تولىق مالىمەتكە يە بولعان جوق. سوندىقتان، قارۋ-جاراق ساتۋ جانە ساتىپ بەرۋ تۋرالى انىق تۇسىنىك بەرە المايمىز»، – دەگەن.

دەگەنمەن ول اقش ۇكىمەتىنىڭ تايۋان قورعانىس قابىلەتىن جوعارلاتىپ، ىقتيمال قاتەرلەرگە قارسى تۇرۋ قۋاتىن ارتتىرۋىنا كومەكتەسۋىن قۋاتتاعان. ءارى بۇل ءۇندى-تىنىق مۇحيت ايماعىنىڭ اشىق، قاۋىپسىز جانە تۇراقتى بولۋى ءۇشىن دە ماڭىزدى ەكەنىن اتاپ كورسەتكەن.

بۇل اقپاراتتار مەن مالىمدەمەلەردەن كەيىن كوپ وتپەي Bloomberg اگەنتتىگى دە سوعان ۇقساس حابار تاراتتى. بۇل اقپارات اگەنتتىگى اقش پەن تايۋان اراسىنداعى قارۋ-جاراق ساۋداسىنا قاتىستى تۇلعانىڭ بىرىنە سىلتەمە بەرگەن. مالىمەتكە قاراعاندا، كەزەكتى قارۋ ساۋداسىندا 108 تانكىدەن تىس، تانكىگە قارسى TOW-II زىمىراندارىنان 1240 دانا، Javelin انتي-تانك زىمىراندارىنان 409 دانا، سونداي-اق 250 دانا «ستينگەر»  زىمىرانى دا بار.

كەزەكتى قارۋ-جاراق ساۋداسى تۋرالى جوبانى كونگرەسس 30 كۇن ىشىندە قاراپ ماقۇلداۋى ءتيىس. ال، تايۋان تارابى ساتىپ الۋعا ءوتىنىش ەتكەن F-16 ۇشاقتارى بۇل رەتكى قارۋ ساۋداسىنا كىرمەيدى. اتالعان ۇشاقتاردى ساتىپ بەرۋ ءىسى ءالى دە اقش قورعانىس مينيسترلىگى مەن مەملەكەتتىك دەپارتامەنتىنىڭ تالقىلاۋىندا.

بەيجىڭ بيلىگى اقش پەن تايۋان اراسىنداعى قورعانىس ىنتىماقتاستىعى مەن قارۋ-جاراق ساۋداسىنا قارسى بولىپ كەلەدى. اقش-تايۋان اراسىنداعى جاڭا قارۋ ساۋداسى بەيجىڭنىڭ نارازىلىعىن ورشىتەدى دەپ قارايدى ساراپشىلار.

“The Qazaq Times”