Foto: Azattıq radiosı

1 mausımda tañerteñgi sağat 11.00 şamasında elordadağı "Duman" qonaq üyinde belsendilerdiñ qwrıltayı bastaldı. Oğan eldiñ barlıq öñirinen jüzdegen azamat jinaldı – dep habarlaydı Azattıq radiosı.

Azattıq radiosınıñ mälimetinşe, äuel basta aldın ala aqşası tölenip qoyğan qonaq üydiñ küzetşileri jinalğandarğa "orın joq" dep olardı kirgizbeuge tırısqan. Biraq bwğan narazı bolğan jwrt jinalıs ötui tiis ğimaratqa basıp kirgen.

Bwğan deyin jiında «eldegi qoğamdıq-sayasi, äleumettik jağday, prezident saylauında dauıs beruge boykot jariyalau, Qıtaydağı qazaqtar mäselesi, Qazaqstan men Qıtay arasındağı qarım-qatınas, eldegi demokratiya ahualı aytıladı» - dep habarlanğan edi.
Jiında oppoziciyalıq sayasatker Baltaş Twrsımbaev, jurnalist Rısbek Särsenbaywlı, Qazaqstannıñ twñğış ğarışkeri Toqtar Äubäkirov jäne özge de azamattar söz söylegen. Spikerler elde oppoziciyanıñ joqtığın aytıp, "belsendilerdi qudalağan" bilikti sınağan. Qatısuşılar 9 mausımda ötetin prezident saylauına boykot jariyalau kerektigin de aytqan.

Jwrt aldında söylegen Rısbek Särsenbaywlı Qazaqstan Konstituciyasınıñ "bir adam müddesi üşin" bwrmalanğanın aytıp, elde belsendiler qudalanatının, türmede sayasi twtqındar otırğanın aytqan. Ol ereuilşilerge policiya oq atıp, sonıñ saldarınan resmi derek boyınşa 17 adam ölgen 2011 jılğı Jañaözen oqiğasına jeke toqtaldı. Ol Jañaözen oqiğasın "auır qılmıs" dep atap, oğan eldiñ birinşi prezidenti Nwrswltan Nazarbaev jäne sol kezdegi işki ister ministrligin basqarğan Qalmwhanbet Qasımov jauap berui tiis ekenin jetkizgen.

Naurız ayında prezident ökiletin toqtatqan Nwrswltan Nazarbaev qauipsizdik keñesiniñ törağası retinde sayasattağı ıqpalın saqtap qaldı. Al bwrınğı işki ister ministri Qalmwhanbet Qasımov keñes törağasınıñ hatşısı retinde tağayındalıp, ökileti joğarıladı. Rısbek Särsenbaywlı jiında Nazarbaevtı bilikten ketip, eldi tiimdirek basqara alatın azamattarğa jol beruge şaqırdı.

Jiın ortasında qonaq üy äkimşiligi qızmetkeri kelip, mikrofonmen jinalğandarğa "ğimarattan şığuın" talap etken. Biraq qatısuşılar bwdan bas tartqan. Tüs kezinde qwrıltay ötip jatqan ğimarattıñ jarığın söndirip tastağan. Biraq soğan qaramastan belsendiler qwrıltaydı qarañğı zalda jalğastıruda. Ğimarat mañın policiya qızmetkerleri baqılauğa alğan.

"The Qazaq Times"