فوتو: ازاتتىق راديوسى

1 ماۋسىمدا تاڭەرتەڭگى ساعات 11.00 شاماسىندا ەلورداداعى "دۋمان" قوناق ۇيىندە بەلسەندىلەردىڭ قۇرىلتايى باستالدى. وعان ەلدىڭ بارلىق وڭىرىنەن جۇزدەگەن ازامات جينالدى – دەپ حابارلايدى ازاتتىق راديوسى.

ازاتتىق راديوسىنىڭ مالىمەتىنشە، اۋەل باستا الدىن الا اقشاسى تولەنىپ قويعان قوناق ءۇيدىڭ كۇزەتشىلەرى جينالعاندارعا "ورىن جوق" دەپ ولاردى كىرگىزبەۋگە تىرىسقان. بىراق بۇعان نارازى بولعان جۇرت جينالىس ءوتۋى ءتيىس عيماراتقا باسىپ كىرگەن.

بۇعان دەيىن جيىندا «ەلدەگى قوعامدىق-ساياسي، الەۋمەتتىك جاعداي، پرەزيدەنت سايلاۋىندا داۋىس بەرۋگە بويكوت جاريالاۋ، قىتايداعى قازاقتار ماسەلەسى، قازاقستان مەن قىتاي اراسىنداعى قارىم-قاتىناس، ەلدەگى دەموكراتيا احۋالى ايتىلادى» - دەپ حابارلانعان ەدى.
جيىندا وپپوزيتسيالىق ساياساتكەر بالتاش تۇرسىمباەۆ، جۋرناليست رىسبەك سارسەنبايۇلى، قازاقستاننىڭ تۇڭعىش عارىشكەرى توقتار اۋباكىروۆ جانە وزگە دە ازاماتتار ءسوز سويلەگەن. سپيكەرلەر ەلدە وپپوزيتسيانىڭ جوقتىعىن ايتىپ، "بەلسەندىلەردى قۋدالاعان" بيلىكتى سىناعان. قاتىسۋشىلار 9 ماۋسىمدا وتەتىن پرەزيدەنت سايلاۋىنا بويكوت جاريالاۋ كەرەكتىگىن دە ايتقان.

جۇرت الدىندا سويلەگەن رىسبەك سارسەنبايۇلى قازاقستان كونستيتۋتسياسىنىڭ ء"بىر ادام مۇددەسى ءۇشىن" بۇرمالانعانىن ايتىپ، ەلدە بەلسەندىلەر قۋدالاناتىنىن، تۇرمەدە ساياسي تۇتقىندار وتىرعانىن ايتقان. ول ەرەۋىلشىلەرگە پوليتسيا وق اتىپ، سونىڭ سالدارىنان رەسمي دەرەك بويىنشا 17 ادام ولگەن 2011 جىلعى جاڭاوزەن وقيعاسىنا جەكە توقتالدى. ول جاڭاوزەن وقيعاسىن "اۋىر قىلمىس" دەپ اتاپ، وعان ەلدىڭ ءبىرىنشى پرەزيدەنتى نۇرسۇلتان نازارباەۆ جانە سول كەزدەگى ىشكى ىستەر مينيسترلىگىن باسقارعان قالمۇحانبەت قاسىموۆ جاۋاپ بەرۋى ءتيىس ەكەنىن جەتكىزگەن.

ناۋرىز ايىندا پرەزيدەنت وكىلەتىن توقتاتقان نۇرسۇلتان نازارباەۆ قاۋىپسىزدىك كەڭەسىنىڭ توراعاسى رەتىندە ساياساتتاعى ىقپالىن ساقتاپ قالدى. ال بۇرىنعى ىشكى ىستەر ءمينيسترى قالمۇحانبەت قاسىموۆ كەڭەس توراعاسىنىڭ حاتشىسى رەتىندە تاعايىندالىپ، وكىلەتى جوعارىلادى. رىسبەك سارسەنبايۇلى جيىندا نازارباەۆتى بيلىكتەن كەتىپ، ەلدى تيىمدىرەك باسقارا الاتىن ازاماتتارعا جول بەرۋگە شاقىردى.

جيىن ورتاسىندا قوناق ءۇي اكىمشىلىگى قىزمەتكەرى كەلىپ، ميكروفونمەن جينالعاندارعا "عيماراتتان شىعۋىن" تالاپ ەتكەن. بىراق قاتىسۋشىلار بۇدان باس تارتقان. ءتۇس كەزىندە قۇرىلتاي ءوتىپ جاتقان عيماراتتىڭ جارىعىن ءسوندىرىپ تاستاعان. بىراق سوعان قاراماستان بەلسەندىلەر قۇرىلتايدى قاراڭعى زالدا جالعاستىرۋدا. عيمارات ماڭىن پوليتسيا قىزمەتكەرلەرى باقىلاۋعا العان.

"The Qazaq Times"