Kärim Mäsimov AQŞ-qa ne üşin bardı?

WQK basşısı Kärim Mäsimov AQŞ-qa ne üşin bardı?

Säuir ayınıñ 26-ı küni Wlttıq qauipsizdik komitetiniñ törağası Kärim Mäsimov issaparmen Uaşingtonğa bardı. Sol uaqıtta bwl jöninde Qazaqstanda bir de bir resmi BAQ mardımdı aqparat taratqan joq. Tek «Azattıq radiosı» ğana qısqaşa mälimet jariyaladı. Onıñ özinde AQŞ Memlekettik departamenti atalmış kezdesuge baylanıstı mälimet taratpağanda bwl sapar jöninde qalıñ jwrtşılıq bilmey de qalar edi.

«Mayk Pompeo Qazaqstan prezidentiniñ arnayı ökili Kärim Mäsimovpen bilik tranziti, alda kele jatqan prezident saylauı jäne terrorizmmen küres jöninde kelissözder jürgizdi» - delingen AQŞ Memlekettik departamenti taratqan mälimdemede.

AQŞ Memlekettik departamentiniñ Mäsimov pen Pompeo kezdesui jönindegi aqparattı qalıñ jwrtşılıq nazarına ne üşin wsınğandığı beseneden belgili jayt. Sebebi Uaşington osı arqılı Mäskeu men Beyjiñge özderiniñ Ortalıq Aziya aumağında äli de bolsa bar ekendikterin jäne qarqındı jwmıs istep jatqandıqtarın körsetuge tırısuda.

Al endi Qazaqstan atınan AQŞ-qa ne sebepti Kärim Mäsimovtıñ barğandığı beymälim. Bwl jerde tek boljam jasauğa ğana boladı. Negizi Mäsimovtan bölek atalmış missiyanı atqaruğa layıqtı üş adam bar. Olar prezident Qasım-Jomart Toqaev, prem'er-ministr Asqar Mämin jäne SİM Beybit Atamqwlov.  Biraq joğarıda atalğan üş twlğanıñ üşeui de Pompeomen kezdesuge barğan joq. Olardıñ barmauına sebep te joq emes. Öytkeni Qasım-Jomart Toqaev qazir alda kele jatqan kezekten tıs prezident saylauına baylanıstı el aralap, öziniñ saylaualdı ügit-nasihat jwmıstarın jürgizude. Asqar Mämin onsız da jağdayı mäz emes ekonomika mäselelerimen bas qatıruda. Al Beybit Atamqwlovtıñ onday kezdesulerge baruına sayasi salmağı jetkiliksiz ekendigi aytpasa da tüsinikti. Bwdan bölek AQŞ-qa basqa-basqa emes, däl Kärim Mäsimovtıñ baruı onıñ «twñğış prezident» Nwrswltan Nazarbaevtıñ eñ senimdi serikteriniñ biri ekendigin körsetedi.

Jalpı, Aqorda Nwrswltan Nazarbaev otstavkağa ketken sätten bastap sırtqı sayasatta öziniñ bwrınğışa köp vektorlığın bwdan äri de jalğastıra beretindigin sırt elderge däleldep bağuda. Mısalı, Qasım-Jomart Toqaev öziniñ eñ alğaşqı issaparın Mäskeuden bastadı. Al Nwrswltan Nazarbaev jaqında Beyjiñ qalasında ötken «Bir beldeu-bir jol» sammitine qatısıp, Qıtay basşısı Şi Jiñpiñniñ qolınan «Dostıq» ordennin aldı. Al Kärim Mäsimov bolsa, joğarıda aytqanımızday Qazaqstan prezidentiniñ senimdi ökili retinde AQŞ-qa issaparmen bardı. Bir qarağanda bwl kezdesuler men issaparlardıñ bir-birimen eşqanday qatısı bolmauı mümkin. Biraq AQŞ, Resey jäne Qıtaydıñ Ortalıq Aziyada wzaq uaqıttan beri «ülken oyın» jürgizip kele jatqanın eskersek, bwl qadamdardıñ sinhrondı jürip jatqanına köziñiz jetedi.

"The Qazaq Times"