QR prezidenttigine ümitkerler. Foto: https://bnews.kz

9 mausımda bolatın kezekten tıs prezidenttik saylau kandidattarı arasında telepikirtalas ötui mümkin. Bwl turalı Ükimet otırısınan keyin QR Aqparat jäne qoğamdıq damu ministri Däuren Abaev habarladı.

Abaev sözinde: «Meniñ biluimşe, teledebattar boladı. Jäne ol tikeley efirde ötedi. Teledebat bolğanda, kandidattar özara söz talastıradı. Onıñ qayda, qaşan, qanday formatta ötetini keyinirek belgili boladı. Äzirşe, swraqtar naqtılanğan joq» – dedi.

Osığan deyin Ortalıq saylau komissiyası törağasınıñ orınbasarı Konstantin Petrov QR prezidenttigine kandidattar arasında teledidardan aşıq pikirtalas ötkizu turalı wsınıs qarastırılıp jatır dep mälimdegen bolatın. K.Petrov sözinde: «Prezidenttikke kandidattar, olardı wsınğan sayasi partiyalar Ortalıq saylau komissiyası wyımdastıratın teledidardağı saylau aldındağı pikirtalastarğa qatısuğa qwqılı. Erejege säykes, kandidattardıñ bwqaralıq aqparat qwraldarında söz söyleuiniñ kezektiligi jazbaşa ötinişterdiñ kelip tüsu tärtibimen nemese ötinişter bir mezgilde tüsken jağdayda jerebe boyınşa belgilenedi», – dep mälimdegen.

Qazirgi uaqıtqa deyin ümitkerler arasında teledebat ötkizu turalı jalpı sanı jüz qırıqqa juıq wsınıs-hat kelip tüsken. Zañğa säykes memleket saylau aldındağı ügit jürgizu üşin bwqaralıq aqparat qwraldarına qol jetkizudiñ teñ şarttarına kepildik beredi. Sonımen qatar, ümitkerler BAQ-qa wsınğan ügit materialdarı Konstituciya men saylau zañnamasınıñ talaptarına say boluı tiis.

Eske sala keteyik, osı jolı QR OSK jeti kandidattı tirkedi. Olardıñ işinde «Nur Otan» partiyasınan Qasım-Jomart Toqaev, «Wlt tağdırı» wlttıq-patriottıq qozğalısı wsınğan kandidat Ämirjan Qosanov, «Auıl» halıqtıq-demokratiyalıq patriottıq partiyasınan Töleutay Rahımbekov, Qazaqstannıñ kommunister partiyasınan Jambıl Ahmetbekov, «Wlı dala qırandarı» respublikalıq qozğalısınan Sädi-Bek Tügel, Qazaqstan Respublikasınıñ käsipodaqtar federaciyasınan Amangeldi Taspihov jäne «Aq jol» Qazaqstannıñ demokratiyalıq partiyasınan Daniya Espaeva bar.

"The Qazaq Times"