قر پرەزيدەنتتىگىنە ۇمىتكەرلەر. فوتو: https://bnews.kz

9 ماۋسىمدا بولاتىن كەزەكتەن تىس پرەزيدەنتتىك سايلاۋ كانديداتتارى اراسىندا تەلەپىكىرتالاس ءوتۋى مۇمكىن. بۇل تۋرالى ۇكىمەت وتىرىسىنان كەيىن قر اقپارات جانە قوعامدىق دامۋ ءمينيسترى داۋرەن اباەۆ حابارلادى.

اباەۆ سوزىندە: «مەنىڭ بىلۋىمشە، تەلەدەباتتار بولادى. جانە ول تىكەلەي ەفيردە وتەدى. تەلەدەبات بولعاندا، كانديداتتار ءوزارا ءسوز تالاستىرادى. ونىڭ قايدا، قاشان، قانداي فورماتتا وتەتىنى كەيىنىرەك بەلگىلى بولادى. ازىرشە، سۇراقتار ناقتىلانعان جوق» – دەدى.

وسىعان دەيىن ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆ قر پرەزيدەنتتىگىنە كانديداتتار اراسىندا تەلەديداردان اشىق پىكىرتالاس وتكىزۋ تۋرالى ۇسىنىس قاراستىرىلىپ جاتىر دەپ مالىمدەگەن بولاتىن. ك.پەتروۆ سوزىندە: «پرەزيدەنتتىككە كانديداتتار، ولاردى ۇسىنعان ساياسي پارتيالار ورتالىق سايلاۋ كوميسسياسى ۇيىمداستىراتىن تەلەديدارداعى سايلاۋ الدىنداعى پىكىرتالاستارعا قاتىسۋعا قۇقىلى. ەرەجەگە سايكەس، كانديداتتاردىڭ بۇقارالىق اقپارات قۇرالدارىندا ءسوز سويلەۋىنىڭ كەزەكتىلىگى جازباشا وتىنىشتەردىڭ كەلىپ ءتۇسۋ تارتىبىمەن نەمەسە وتىنىشتەر ءبىر مەزگىلدە تۇسكەن جاعدايدا جەرەبە بويىنشا بەلگىلەنەدى»، – دەپ مالىمدەگەن.

قازىرگى ۋاقىتقا دەيىن ۇمىتكەرلەر اراسىندا تەلەدەبات وتكىزۋ تۋرالى جالپى سانى ءجۇز قىرىققا جۋىق ۇسىنىس-حات كەلىپ تۇسكەن. زاڭعا سايكەس مەملەكەت سايلاۋ الدىنداعى ۇگىت جۇرگىزۋ ءۇشىن بۇقارالىق اقپارات قۇرالدارىنا قول جەتكىزۋدىڭ تەڭ شارتتارىنا كەپىلدىك بەرەدى. سونىمەن قاتار، ۇمىتكەرلەر باق-قا ۇسىنعان ۇگىت ماتەريالدارى كونستيتۋتسيا مەن سايلاۋ زاڭناماسىنىڭ تالاپتارىنا ساي بولۋى ءتيىس.

ەسكە سالا كەتەيىك، وسى جولى قر وسك جەتى كانديداتتى تىركەدى. ولاردىڭ ىشىندە «Nur Otan» پارتياسىنان قاسىم-جومارت توقاەۆ، «ۇلت تاعدىرى» ۇلتتىق-پاتريوتتىق قوزعالىسى ۇسىنعان كانديدات ءامىرجان قوسانوۆ، «اۋىل» حالىقتىق-دەموكراتيالىق پاتريوتتىق پارتياسىنان تولەۋتاي راحىمبەكوۆ، قازاقستاننىڭ كوممۋنيستەر پارتياسىنان جامبىل احمەتبەكوۆ، «ۇلى دالا قىراندارى» رەسپۋبليكالىق قوزعالىسىنان ءسادى-بەك تۇگەل، قازاقستان رەسپۋبليكاسىنىڭ كاسىپوداقتار فەدەراتسياسىنان امانگەلدى تاسپيحوۆ جانە «اق جول» قازاقستاننىڭ دەموكراتيالىق پارتياسىنان دانيا ەسپاەۆا بار.

"The Qazaq Times"