Foto: https://www.web-canape.ru

QR Ortalıq saylau komissiyası QR prezidenttigine kandidattar arasında teledidardan aşıq pikirtalas ötkizu turalı wsınıstı qarastırıp jatır. Bwl turalı OSK törağasınıñ orınbasarı Konstantin Petrov mälimdedi.

Qazirge deyin teledebat ötkizu turalı jüz qırıqqa juıq wsınıs-hat kelip tüsken. Mälimdemede aytılğanday, «Saylau turalı» Konstituciyalıq zañnıñ 28-babınıñ 3-tarmağına jäne QR OSK-nıñ qaulısımen bekitilgen Küntizbelik jospardıñ 7-tarmağına säykes efir men baspasöz alañın beru mölşeri, şarttarı men tärtibi turalı mälimetter tiisti bwqaralıq aqparat qwralımen 2019 jılğı 5 mamırda saylau aldındağı ügit jürgizu bastalğanğa deyin 5 künnen keşiktirmey habarlandırıluı jäne jariyalanuı tiis. Memleket saylau aldındağı ügit jürgizu üşin bwqaralıq aqparat qwraldarına qol jetkizudiñ teñ şarttarına kepildik beredi. Sonımen qatar, ümitkerler BAQ-qa wsınğan ügit materialdarı Konstituciya men saylau zañnamasınıñ talaptarına say boluı tiis.

K.Petrov: «Prezidenttikke kandidattar, olardı wsınğan sayasi partiyalar Ortalıq saylau komissiyası wyımdastıratın teledidardağı saylau aldındağı pikirtalastarğa qatısuğa qwqılı. Qazirgi uaqıtta Ortalıq saylau komissiyası mwnday mümkindikti qarastıruda. Erejege säykes, kandidattardıñ bwqaralıq aqparat qwraldarında söz söyleuiniñ kezektiligi jazbaşa ötinişterdiñ kelip tüsu tärtibimen nemese ötinişter bir mezgilde tüsken jağdayda jerebe boyınşa belgilenedi», – dedi.

Ayta keteyik, bügin Ortalıq saylau komissiyası kandidattardı tirkeudi merziminen bwrın ayaqtadı. Qorıtındı boyınşa, jeti kandidatqa Qazaqstan prezidenttigine ümitker tölqwjatı tabıstaldı. Kezekten tıs prezident saylauı 9 mausımda ötedi.

"The Qazaq Times"