پرەزيدەنتتىككە كانديداتتار اراسىندا تەلەدەبات وتكىزۋ قاراستىرىلۋدا

قر ورتالىق سايلاۋ كوميسسياسى قر پرەزيدەنتتىگىنە كانديداتتار اراسىندا تەلەديداردان اشىق پىكىرتالاس وتكىزۋ تۋرالى ۇسىنىستى قاراستىرىپ جاتىر. بۇل تۋرالى وسك توراعاسىنىڭ ورىنباسارى كونستانتين پەتروۆ مالىمدەدى.

قازىرگە دەيىن تەلەدەبات وتكىزۋ تۋرالى ءجۇز قىرىققا جۋىق ۇسىنىس-حات كەلىپ تۇسكەن. مالىمدەمەدە ايتىلعانداي، «سايلاۋ تۋرالى» كونستيتۋتسيالىق زاڭنىڭ 28-بابىنىڭ 3-تارماعىنا جانە قر وسك-نىڭ قاۋلىسىمەن بەكىتىلگەن كۇنتىزبەلىك جوسپاردىڭ 7-تارماعىنا سايكەس ەفير مەن ءباسپاسوز الاڭىن بەرۋ مولشەرى، شارتتارى مەن ءتارتىبى تۋرالى مالىمەتتەر ءتيىستى بۇقارالىق اقپارات قۇرالىمەن 2019 جىلعى 5 مامىردا سايلاۋ الدىنداعى ۇگىت جۇرگىزۋ باستالعانعا دەيىن 5 كۇننەن كەشىكتىرمەي حابارلاندىرىلۋى جانە جاريالانۋى ءتيىس. مەملەكەت سايلاۋ الدىنداعى ۇگىت جۇرگىزۋ ءۇشىن بۇقارالىق اقپارات قۇرالدارىنا قول جەتكىزۋدىڭ تەڭ شارتتارىنا كەپىلدىك بەرەدى. سونىمەن قاتار، ۇمىتكەرلەر باق-قا ۇسىنعان ۇگىت ماتەريالدارى كونستيتۋتسيا مەن سايلاۋ زاڭناماسىنىڭ تالاپتارىنا ساي بولۋى ءتيىس.

ك.پەتروۆ: «پرەزيدەنتتىككە كانديداتتار، ولاردى ۇسىنعان ساياسي پارتيالار ورتالىق سايلاۋ كوميسسياسى ۇيىمداستىراتىن تەلەديدارداعى سايلاۋ الدىنداعى پىكىرتالاستارعا قاتىسۋعا قۇقىلى. قازىرگى ۋاقىتتا ورتالىق سايلاۋ كوميسسياسى مۇنداي مۇمكىندىكتى قاراستىرۋدا. ەرەجەگە سايكەس، كانديداتتاردىڭ بۇقارالىق اقپارات قۇرالدارىندا ءسوز سويلەۋىنىڭ كەزەكتىلىگى جازباشا وتىنىشتەردىڭ كەلىپ ءتۇسۋ تارتىبىمەن نەمەسە وتىنىشتەر ءبىر مەزگىلدە تۇسكەن جاعدايدا جەرەبە بويىنشا بەلگىلەنەدى»، – دەدى.

ايتا كەتەيىك، بۇگىن ورتالىق سايلاۋ كوميسسياسى كانديداتتاردى تىركەۋدى مەرزىمىنەن بۇرىن اياقتادى. قورىتىندى بويىنشا، جەتى كانديداتقا قازاقستان پرەزيدەنتتىگىنە ۇمىتكەر تولقۇجاتى تابىستالدى. كەزەكتەن تىس پرەزيدەنت سايلاۋى 9 ماۋسىمدا وتەدى.

"The Qazaq Times"